قازاقستاندا ۇلتتىق پاركتەرگە كىرۋ تاريفى نەلىكتەن ءارتۇرلى

استانا. KAZINFORM - ق ر ەكولوگيا جانە تابيعي رەسۋرستار ءمينيسترى ەرلان نىسانبايەۆ ۇكىمەتتە وتكەن بريفينگتە ۇلتتىق پاركتەرگە كىرۋ تاريفى قالاي وزگەرەتىنىن ءتۇسىندىردى.

بيىل 8-شىلدەدە مەملەكەت باسشىسى «ق ر كەيبىر زاڭنامالىق اكتىلەرىنە ەرەكشە قورعالاتىن تابيعي اۋماقتار جانە ەلەكتر ەنەرگەتيكاسى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭعا قول قويعانى بەلگىلى. وسىلايشا، سالىق كودەكسىنەن ەرەكشە قورعالاتىن تابيعي اۋماقتاردى پايدالانعانى ءۇشىن الىناتىن تولەم رەسپۋبليكالىق بيۋدجەتكە تۇسەتىنى تۋرالى نورمالار الىنىپ تاستالدى.

«بىزدە ەكى ءتۇرلى تولەم بولدى. ونىڭ ءبىرى - سالىق، ۇزاق مەرزىمگە دەيىن قولدانعانى ءۇشىن تىكەلەي بيۋدجەتكە تۇسەتىن اقشا. بۇگىن سالىق كودەكسىندە سول سالىقتى الىپ تاستادى. ال ەكىنشىسى - قىزمەت ءۇشىن تولەم ورنىندا قالدى. باعانا ايتقان سالىعىمىز 0,1 ا ە ك بولدى. ال قىزمەت ءۇشىن ناقتى ايتا المايمىن، ماسەلەن الماتىنىڭ باسىنداعى ىلە-الاتاۋ پاركىندە ول جەردە كىسى باسىنان 200 تەڭگەدەن الادى. كولساي مەن شارىندا 500 تەڭگە الادى»، - دەدى ە. نىسانبايەۆ ۇكىمەتتە.

جاڭا زاڭعا سايكەس، ق ر بيۋدجەت كودەكسىنىڭ رەسپۋبليكالىق جانە جەرگىلىكتى ماڭىزى بار ەرەكشە قورعالاتىن تابيعي اۋماقتاردى پايدالانعانى ءۇشىن بيۋدجەت تۇسىمدەرى تۋرالى نورمالار وزگەردى. ەندى تابيعات قورعاۋ مەكەمەلەرى كورسەتەتىن قىزمەتتەر ءۇشىن تاريفتەر مولشەرىن بەكىتۋ قۇزىرەتى ە ق ت ا-نى باقىلايتىن مەملەكەتتىك ورگاندارعا بەرىلىپ وتىر.

اشىق ۇكىمەت پورتالىندا ەكولوگيا جانە تابيعي رەسۋرستار مينيسترلىگى ورمان شارۋاشىلىعى جانە جانۋارلار الەمى كوميتەتىنىڭ تاريفتەرگە قاتىستى ارنايى بۇيرىعى جاريالانعانىن ايتا كەتەيىك.

وندا ەلىمىزدەگى ۇلتتىق پاركتەردىڭ قىزمەتىنە قاتىستى الىناتىن تولەم كولەمى كورسەتىلگەن. ايتالىق، ءۇستىرت مەملەكەتتىك تابيعي قورىعىندا موتوسيكل، موپەد، كۆادروتسيكل سىندى شاعىن تەحنيكالار ءۇشىن ستاۆكا 1 ا ە ك (3692 ت) بولسا، جەڭىل اۆتوكولىكتەر - 1,5 ا ە ك، 16 ادامعا دەيىنگى شاعىن اۆتوبۋس پەن جۇك كولىگى - 4 ا ە ك، 32 ادامعا دەيىنگى اۆتوبۋس - 8 ا ە ك، 32-دەن جوعارى ادام سياتىن اۆتوبۋستار 13 ا ە ك كولەمىندە تولەيدى.

ياعني، ەرەكشە قورعالاتىن تابيعي اۋماقتاردى پايدالانعانى ءۇشىن كورسەتىلەتىن قىزمەتتەردىڭ تولەمى بۇرىنعىسىنشا الىنادى. الايدا قاراجات ۇلتتىق پاركتەردىڭ ارنايى شوتىندا قالىپ، قىزمەتكەرلەر جالاقىسى، تابيعاتتى قورعاۋ شارالارى، باقىلاۋ- وتكىزۋ بەكەتتەرىن اۆتوماتتاندىرۋ، تۋريستىك سوقپاقتاردى جاقسارتۋ، قاۋىپسىزدىك جۇيەسىن جەتىلدىرۋ سىندى ءوز قاجەتتىلىكتەرىنە جۇمسالادى.

ەرەكشە قورعالاتىن تابيعي اۋماقتار قىزمەتتەرى ءۇشىن تولەم الۋ نورماسى «ەرەكشە قورعالاتىن تابيعي اۋماقتار تۋرالى» ق ر زاڭىنىڭ 38-بابى جانە ەكولوگيا جانە تابيعي رەسۋرستار مينيسترلىگى ورمان شارۋاشىلىعى جانە جانۋارلار دۇنيەسى كوميتەتى ءتوراعاسىنىڭ 2020 -جىلعى 30-جەلتوقسانداعى №27-5-6/253 بۇيرىعى («ءوزىنىڭ قاراۋىنداعى زاڭدى تۇلعا مارتەبەسى بار رەسپۋبليكالىق ماڭىزى بار ەرەكشە قورعالاتىن تابيعي اۋماقتار كورسەتەتىن قىزمەتتەر ءۇشىن تاريفتەردىڭ مولشەرىن بەكىتۋ») ارقىلى رەتتەلەدى.

اۆتور
ايجان سەرىكجان قىزى