قازاقستاندا كىتاپ شىعارۋ سالاسىندا جاڭا ەرەجە قابىلدانادى

استانا. KAZINFORM - ق ر مادەنيەت جانە اقپارات ءمينيسترى ايدا بالايەۆا ەلىمىزدە كىتاپ شىعارۋ سالاسىن دامىتۋ بويىنشا قابىلدانىپ جاتقان شارالارعا قاتىستى تۇسىنىك بەردى.

«كىتاپ - ادامزات ءۇشىن ەڭ قۇندى قازىنا. مادەنيەت جانە اقپارات مينيسترلىگى كىتاپ شىعارۋ جۇمىسىن كۇشەيتۋدى قولعا الىپ وتىر. بۇل رەتتە، وسى سالاداعى تىڭ باستامالارمەن تانىستىرۋدى ءجون كوردىم. بىرىنشىدەن، كىتاپ باسۋ ءىسى ۇلكەن جاۋاپكەرشىلىكتى تالاپ ەتەدى. سوندىقتان بۇل سالانى دامىتۋ ءۇشىن جاڭا ەرەجە قابىلدانادى. سوعان سايكەس كىتاپتار بىرنەشە ساراپتامالىق ساتىدان ءوتىپ، تەك ۇزدىكتەرى عانا جارىق كورەدى»، - دەدى ا. بالايەۆا الەۋمەتتىك پاراقشاسىندا جاريالاعان بەينە ۇندەۋىندە.

ونىڭ ايتۋىنشا، وتىنىمدەر جىلىنا ەكى رەت قابىلدانىپ، تۇسكەن قۇجاتتاردى تەكسەرۋ 10 كۇن الادى. قوعامدىق تالقىلاۋعا 15 كۇن، ارنايى قۇرىلعان تاۋەلسىز كوميسسياعا 15 كۇن، ساراپشىلاردىڭ قورىتىندىسىن دايىنداۋعا ەكى اي بەرىلەدى.

«ارينە، وسى ۋاقىت ىشىندە وقىرمانداردىڭ پىكىرىنەن بولەك، وتاندىق عىلىمي- زەرتتەۋ ورتالىقتارىنىڭ الەۋمەتتىك زەرتتەۋلەرى، كىتاپ دۇكەندەرىنىڭ ساتىلىمعا قاتىستى ستاتيستيكالىق مالىمەتتەرى، باسپالاردىڭ باسىلىم رەيتينگ- تىزبەسى نازارعا الىنادى. وسىدان كەيىن عانا وكىلەتتى ورگان ناقتى شەشىم قابىلدايدى»، - دەدى مينيستر.

ەكىنشىدەن، ەگەر بۇرىن قولجازباعا گونورار تولەنسە، ەندى ونىڭ ورنىنا جاڭا ادەبي تۋىندىلارعا گرانت بەرىلمەك. ياعني، بيىلدان باستاپ قالامگەرلەردىڭ ءبىر پاراق جاڭا تۋىندىسىنا 6 ەڭ تومەنگى جالاقى مولشەرىندە گرانت تولەنەدى. ماسەلەن، ورتاشا ەسەپپەن العاندا، 160 بەتتىك كىتاپقا 4 ميلليون تەڭگەدەن استام قالاماقى بەرىلەدى. گرانت مينيسترلىكتىڭ جانىنان قۇرىلعان ساراپتامالىق كوميسسيانىڭ شەشىمىمەن بەكىتىلەدى. ال كىتاپتى باسىپ شىعارۋ جانە ساتىلىمعا شىعارۋ قۇقىعى اۆتوردىڭ وزىندە بولادى. ەگەر ول كىتاپ ءبىر جىل ىشىندە جارىققا شىعىپ، كىتاپ دۇكەندەرى ارقىلى ساتىلىمدا جاقسى كورسەتكىشتەر بولسا، ونىڭ كەزەكتى باسىلىمى مەن تارالىمىن مەملەكەت ءوز موينىنا الادى.

ۇشىنشىدەن، اۋدارما ادەبيەتى بويىنشا «مادەنيەت تۋرالى» زاڭىنا ءبىرقاتار وزگەرىس ەنگىزىلمەك. مەملەكەتتىك تاپسىرىسپەن باسىلىپ شىعاتىن ادەبيەتتەردىڭ ەلەكتروندى نۇسقاسى ۇلتتىق ەلەكتروندى كىتاپحانادا جاريالانادى. بۇل ءوز كەزەگىندە ەلەكتروندى نۇسقالارىن جاريالاۋداعى اۆتورلىق قۇقىقتىق شەكتەۋلەرگە سايكەس، الەمدىك تانىمال تۋىندىلاردى باسىپ شىعارۋعا مۇمكىندىك بەرمەي وتىر. كىتاپ باسىپ شىعارۋعا بەرىلەتىن وتىنىمدەر اياسىن كەڭەيتۋ ماقساتىندا بۇل تارماقشانى تولىعىمەن الىپ تاستاۋ ۇسىنىلدى.

تورتىنشىدەن، بەستسەللەرگە اينالعان الەمدىك ادەبيەتتىڭ كلاسسيكالىق ءارى زاماناۋي تۋىندىلارىن قازاق تىلىنە اۋدارۋ قازىر جەكە باسپالار ارقىلى رەتتەلىپ جاتىر. ەندى باسپاگەرلەر اۆتورلىق قۇقىعىن الىپ، قازاق تىلىنە اۋدارعان بەلگىلى شەتەلدىك تۋىندىلاردى مەملەكەتتىك تاپسىرىسپەن باسىپ شىعارا الادى.

بەسىنشىدەن، جاڭا ەرەجەدە ساراپتاما كوميسسياسىنىڭ ادەبيەتتەردى وقىپ، قورىتىندى پىكىر جازۋ ۋاقىتى ەكى ايعا قىسقارعاندىقتان، جۇمىستىڭ كۇردەلىلىگىنە قاراي وتەماقى كولەمىن ەكى ەسەگە ۇلعايتۋ قاراستىرىلماق.

التىنشىدان، «مادەنيەت تۋرالى» زاڭدا جازۋشىنىڭ مارتەبەسىن ايقىنداۋ ۇسىنىلدى. بۇل زاڭنىڭ تولىق جۇمىس ىستەۋىنە سەپتىگىن تيگىزەدى.

اۆتور

رۋسلان عابباسوۆ