قازاقستاندا كىمدەر زەينەتكە ەرتە شىعا الادى

استانا. KAZINFORM - ەلىمىزدە كەيبىر ساناتتاعى ازاماتتاردىڭ زەينەتكە جالپى بەلگىلەنگەن جاستان ەرتە شىعۋ مۇمكىندىگى بار. تولىعىراق ەڭبەك جانە حالىقتى الەۋمەتتىك قورعاۋ مينيسترلىگى حالىقتى الەۋمەتتىك قورعاۋ سالاسىنداعى رەتتەۋ جانە باقىلاۋ كوميتەتىنىڭ زەينەتاقى جانە الەۋمەتتىك قامسىزداندىرۋ باسقارماسىنىڭ باسشىسى انەل شەنەيەۆا ءتۇسىندىرىپ بەردى.

- بۇگىندە قازاقستاندا ەر ادامدار ءۇشىن جالپى بەلگىلەنگەن زەينەتكەرلىك جاس - 63, ايەلدەر ءۇشىن - 61 جاس. سونىمەن قاتار الەۋمەتتىك كودەكسكە سايكەس، 8 جاسقا دەيىنگى 5 جانە ودان دا كوپ بالا تاربيەلەگەن ايەلدەر 53 جاستا زەينەتكە شىعا الادى. مەملەكەت باسشىسىنىڭ تاپسىرماسىن ورىنداۋ ماقساتىندا 2024 -جىلعى 1- قاڭتاردان باستاپ زياندى ەڭبەك جاعدايىندا جۇمىس ىستەيتىن قىزمەتكەرلەردىڭ الەۋمەتتىك قورعاۋىن ارتتىرۋ ماقساتىندا ارنايى الەۋمەتتىك تولەمدەردى تاعايىنداۋ كوزدەلگەن. اتالعان تولەمدى 55 جاسقا تولىپ، كەمىندە 7 جىل مىندەتتى كاسىپتىك زەينەتاقى جارناسىن تولەگەن ازاماتتار الۋعا قۇقىلى. وسىلايشا، بۇل ساناتتاعى جۇمىسشىلاردىڭ زەينەت جاسىنا جەتكەنگە دەيىنگى زياندى جاعدايى بار جۇمىستان شىعۋعا جانە ارنايى الەۋمەتتىك تولەم الۋ قۇقىعى بار، - دەپ ءتۇسىندىردى انەل شەنەيەۆا.

سونداي-اق مينيسترلىك وكىلى قۇقىق قورعاۋ ورگاندارىنىڭ قىزمەتكەرلەرى دە ەڭبەك وتىلىنە قاراي زەينەتكە ەرتە شىعا الاتىنىن ايتىپ وتىر.

- ەڭبەك ءوتىلى بويىنشا زەينەتاقى تاعايىنداۋدى قىزمەتكەر جۇمىس ىستەيتىن بولىمگە بايلانىستى ءتيىستى مەملەكەتتىك ورگاندار جۇرگىزەدى، - دەيدى ۆەدومستۆو مامانى.

ايتا كەتسەك، بيىل قازاقستاندىقتارعا 2 تريلليون تەڭگەدەن استام زەينەتاقى تولەندى.

سونداي-اق قازاقستاندىقتار زەينەتاقى قورىنان 449,9 ميلليارد تەڭگە جيناعىن شەشىپ الدى.

اۆتور

داۋلەت ىزتىلەۋ