قازاقستاندا كەدەن جۇمىسى قالاي وزگەردى؟
استانا. KAZINFORM - قازاقستاندا كەدەندىك ينفراقۇرىلىمدى جاڭعىرتۋ، راسىمدەردى سيفرلاندىرۋ جانە شەكارا قىزمەتىن دامىتۋ بويىنشا كەشەندى باعدارلاما جۇزەگە اسىرىلىپ جاتىر.
قارجى مينيسترلىگى قىتاي، وزبەكستان جانە تۇرىكمەنستانمەن شەكارادا 9 وتكىزۋ پۋنكتىنە تولىققاندى جاڭعىرتۋ جۇرگىزىپ جاتىر. ەندى ەسكىرگەن ينفراقۇرىلىم تولىعىمەن اۋىسىپ، زاماناۋي وتكىزۋ پۋنكتتەرى پايدا بولادى.
2025-جىلدىڭ باسىنان بەرى وسىنداي 4 وتكىزۋ پۋنكتى ىسكە قوسىلعان:
قىتايمەن شەكارادا - «كولجات» جانە «الاكول»؛
وزبەكستانمەن شەكارادا - «قاپلانبەك» جانە «اتامەكەن».
جىلدىڭ اياعىنا دەيىن «قازىعۇرت»، «تاجەن»، «تەمىر بابا»، «مايقاپشاعاي» جانە «باقتى» وتكىزۋ پۋنكتىندە دە جۇمىستاردى اياقتاۋ جوسپارلانعان.
جاڭا پۋنكتتەردە شەكارانى كەسىپ ءوتۋ ءۇشىن بارلىق جاعداي جاسالعان:
قوزعالىس جولاقتارى 2 دەن 6 عا دەيىن ۇلعايتىلعان،
جۇرگىزۋشى كابينادان شىقپاي-اق باقىلاۋدان وتەدى،
ال شەكارادان ورتا ەسەپپەن 30 مينۋتقا دەيىن ءوتىپ بولادى.
بۇل رەتتە ەڭ ءىرى «نۇر جولى» وتكىزۋ پۋنكتى تاۋلىك بويى جۇمىس رەجيمىنە اۋىسىپ، «الاكول» جانە «مايقاپشاعاي» وتكىزۋ پۋنكتىنىڭ جۇمىس ۋاقىتى ۇزارعان.
ايتا كەتەتىن جايت، 2023-جىلدان بەرى ە ا ە و سىرتقى شەكاراسىنىڭ بارلىق اۆتوموبيل وتكىزۋ پۋنكتىندە «CarGoRuqsat» ەلەكتروندى كەزەك جۇيەسى ەنگىزىلگەن. بۇل رەسپۋبليكالىق ماڭىزى بار جولداردا كولىكتەر كەزەگىن جويۋعا، تاسىمالداۋ پروتسەسىنىڭ اشىقتىعى مەن تيىمدىلىگىن ارتتىرۋعا مۇمكىندىك بەردى.
كەدەندىك اكىمشىلەندىرۋدى جەتىلدىرۋ جۇمىستارى شەڭبەرىندە 76 بيزنەس-پروتسەستى وڭتايلاندىرۋ جۇرگىزىلگەن. وسىلايشى، ا ك ق وتكىزۋ پۋنكتتەرى ارقىلى ءوتۋدىڭ ورتاشا ۋاقىتى ءۇش ەسەگە قىسقاردى.
سونىمەن قاتار، «كەدەن» اقپاراتتىق جۇيەسى دە ەنگىزىلىپ جاتىر. ناتيجەسىندە 20 مامانداندىرىلعان مودۋلدى ىسكە اسىرۋ جوسپارلانعان، ونىڭ 13 ءى ىسكە اسىرىلىپ، قازىر جۇمىس ىستەپ تۇر.
ەكسپرەسس-جۇكتەردى دەكلاراتسيالاۋ ەلەكترون فورماتقا اۋىسقان،
«قورعاس» ش ى ح و- دا جەكە تاۋارلاردى ەسەپكە الۋ تولىق سيفرلاندىرىلعان،
ارتىق تەكسەرۋ جوق، تەك تاۋارلار سيپاتتاماسى بويىنشا قاجەتتى قىزمەتتەردەن ءوتۋى كەرەك،
دەرەكتەردى قايتالاپ ەنگىزۋدىڭ قاجەتى جوق، ەندى حابارلامانى ترانزيتتىك دەكلاراتسياعا تۇرلەندىرۋ مۇمكىندىگى بار.
سەق كەدەن ورگاندارىمەن قاشىقتىقتان ءوزارا ءىس-قيمىل جاساۋ مۇمكىندىگىن قامتاماسىز ەتەدى. بارلىق ارەكەت جەكە كابينەت ارقىلى جۇرگىزىلەدى.
قازىر وتكىزۋ پۋنكتتەرىنىڭ مۇمكىندىگى 2022-جىلى 640 مىڭ كولىك قۇرالىنان 2024-جىلدىڭ قورىتىندىسى بويىنشا 1,4 ميلليونعا دەيىن ۇلعايتىلعان.
مينيسترلىك بۇل جۇمىستار باقىلاۋ راسىمدەرىنىڭ اشىقتىعى مەن تيىمدىلىگىن ارتتىرۋعا، تاۋار اعىنىن جەدەلدەتۋگە، سەق قاتىسۋشىلارى ءۇشىن قولايلى ورتا قۇرۋعا جانە شەكارا ماڭى ەكونوميكاسىن دامىتۋعا باعىتتالعانىن ەسكە سالادى.
