قازاقستاندا كاسساتسيالىق سوتتار جۇمىسىن باستادى
استانا. KAZINFORM - بۇگىن ەلىمىزدە كاسساتسيالىق سوت قىزمەتىن باستادى. بۇل تۋرالى تولىعىراق جوعارعى سوت كەڭەسىنىڭ مۇشەسى ەرلان ايتجانوۆ ايتىپ بەردى.

ەرلان ايتجانوۆتىڭ ايتۋىنشا، بوس لاۋازىمعا ۇمىتكەرلەر ارىپتەستىك نەگىزدە، زاماناۋي HR- قۇرالىن قولدانۋ ارقىلى كونكۋرس ارقىلى ىرىكتەلدى. باعالاۋ كەزىندە ۇمىتكەردىڭ پراكتيكالىق تاجىريبەسى، سۋديالىق ەڭبەك ءوتىلى، جۇمىس ساپاسى، قاراعان ىستەردىڭ كۇردەلىلىگى، بەدەلى، ەتيكانى ساقتاۋى، سۇحباتتاسۋ ناتيجەسى جانە جوعارعى سوت پەن سۋديالار قوعامداستىعىنىڭ قورىتىندىلارى ەسكەرىلدى.
- ودان بولەك، ۇمىتكەرلەرگە قاتىستى قوعام مەن زاڭگەرلەر قاۋىمداستىقتىڭ پىكىرى، سونداي-اق بۇقارالىق اقپارات قۇرالدارىنداعى جاريالانىمدار دا زەرتتەلدى، - دەدى ەرلان ايتجانوۆ ورتالىق كوممۋنيكاتسيالار قىزمەتى الاڭىندا وتكەن باسپا ءسوز ءماسليحاتىندا.
سپيكەردىڭ مالىمەتىنشە، كونكۋرسقا 334 ۇمىتكەر قۇجات تاپسىرعان، ولاردىڭ ىشىنەن بىلىكتىلىك تالاپتارىنا ساي 170 ادام ىرىكتەۋگە جىبەرىلدى. ناتيجەسىندە 75 سۋديا ۇسىنىلدى. ولاردىڭ ىشىندە 9 مامان وبلىستىق سوتتاردا باسشىلىق قىزمەت اتقارعان، 3 ەۋى - زاڭ عىلىمدارىنىڭ كانديداتى، 7 ەۋى - قۇقىق ماگيسترى.
ايتا كەتسەك، ۇسىنىلعان سۋديالاردىڭ باسىم بولىگى - ايەل، ياعني 49 ادام نەمەسە %65، ەرلەر - 26 نەمەسە %35. سپيكەردىڭ ايتۋىنشا، ايەل سۋديالار ۇلەسى ارتىپ كەلەدى.
ەسكە سالايىق، بيىل ساۋىردە 1-شىلدەدەن كاسساتسيالىق سوتتار جۇمىس ىستەي باستايتىنى تۋرالى حابارلاعان ەدىك.
كەشە مەملەكەت باسشىسى كاسساتسيالىق سوتتاردىڭ ءتوراعالارى مەن سۋديالارىن تاعايىندادى.