قازاقستاندا جىل باسىنان بەرى 4 توننادان استام ەسىرتكى تاركىلەندى
استانا. KAZINFORM - حالىقارالىق ناشاقورلىققا جانە ەسىرتكىنىڭ زاڭسىز اينالىمىنا قارسى كۇرەس كۇنىنە وراي ىشكى ىستەر مينيسترلىگى ەلىمىزدە وسى باعىتتا اتقارىلىپ جاتقان جۇمىستاردىڭ قورىتىندىسىن ۇسىندى.
ءى ءى م باسپا ءسوز حاتشىسى شۇعىلا تۇرلىبەكتىڭ مالىمدەۋىنشە، 2025 -جىلدىڭ العاشقى بەس ايىندا قازاقستاندا ەسىرتكىگە قاتىستى 1445 قىلمىس تىركەلىپ، ولاردىڭ 991 ى ساتۋ فاكتىسى رەتىندە انىقتالعان. سونىمەن قاتار اسا ءىرى مولشەردە ساقتاۋ بويىنشا 165 دەرەك تىركەلگەن.
زاڭسىز اينالىمنان 4 توننادان استام ءارتۇرلى ەسىرتكى زاتتارى تاركىلەندى، ونىڭ ىشىندە 476 ك گ سينتەتيكالىق ەسىرتكى بار. 18 ۇيىمداسقان قىلمىستىق توپتىڭ ارەكەتىنە توسقاۋىل قويىلدى.
- ينتەرنەت جەلىسى ارقىلى ەسىرتكى قىلمىستارىن انىقتاۋ باعىتىندا جۇيەلى جۇمىس جۇرگىزىلىپ جاتىر. جىل باسىنان بەرى مادەنيەت جانە اقپارات مينيسترلىگىنە 16 مىڭنان استام ەسىرتكى سايتتارىن بۇعاتتاۋ جونىندە سۇرانىس جىبەرىلگەن. دەگەنمەن بۇگىندە ەسىرتكى جارناماسى «جاسىرىن» سيپاتقا كوشىپ، حابارلاندىرۋ سايتتارى ارقىلى تارالۋدا، - دەدى شۇعىلا تۇرلىبەك.
ماۋسىم ايىندا باستالعان «قاراسورا» جەدەل-الدىن الۋ ءىس- شاراسى دا ناتيجەسىن بەرىپ كەلەدى. بۇل وپەراتسيا ماۋسىمنىڭ 1 ىنەن قازاننىڭ 31 ىنە دەيىن جۇرگىزىلەدى.
بيىل «قاراسورا» وپەراتسياسى اياسىندا 299 ەسىرتكى قۇقىقبۇزۋشىلىعى انىقتالدى، ونىڭ ىشىندە 168 ءى قىلمىس. زاڭسىز اينالىمنان 1 توننا 788 ك گ ەسىرتكى، 6 توننا پرەكۋرسور تاركىلەنىپ، 7155 ءتۇپ قاراسورا جويىلدى. بارلىعى 272 ادام ۇستالدى.
- تۇركىستان وبلىسىندا ترامادول پرەپاراتىن زاڭسىز ساتۋمەن اينالىسقان ءبىر ۇيىمداسقان توپ قۇرىقتالدى. سونداي-اق ءتورت ەسىرتكى زەرتحاناسى جويىلدى، ولاردىڭ ەكەۋى سينتەتيكالىق زاتتار وندىرسە، قالعان ەكەۋى فيتوزەرتحانا بولعان، - دەدى ءى ءى م باسپا ءسوز حاتشىسى.
ودان بولەك، اباي، پاۆلودار جانە جامبىل وبلىستارىندا ءۇش ءىرى ىشكى ەسىرتكى ارناسى جويىلدى.
- قاراسورا وسەتىن ايماقتاردى باقىلاۋ ءۇشىن ءى ءى م ۇلتتىق ۇلانىنىڭ تىكۇشاقتارى مەن قورعانىس مينيسترلىگىنىڭ ۇشقىشسىز اپپاراتتارى قولدانىلۋدا. بۇل قۇرىلعىلار ءشولدى، قولجەتىمسىز ايماقتاردا ەسىرتكى وسىمدىكتەرىن باقىلاۋعا مۇمكىندىك بەرىپ وتىر. سونداي-اق ورمانشىلارمەن، گەولوگيالىق بارلاۋ كومپانيالارىمەن، شارۋا جانە اڭشىلىق قوجالىقتارىمەن تىعىز ارىپتەستىك ورناتىلعان، - دەدى سپيكەر بريفينگ بارىسىندا.
بۇل ءىس-شارالار قازاقستاندا ەسىرتكىنىڭ زاڭسىز اينالىمىنا قارسى كۇرەستىڭ جۇيەلى ءارى كەشەندى تۇردە جۇرگىزىلىپ جاتقانىن كورسەتەدى.
ەسكە سالا كەتەيىك، بۇعان دەيىن كەيىنگى بەس جىلدا زاڭسىز اينالىمنان الىنعان سينتەتيكالىق ەسىرتكىنىڭ كولەمى 100 ەسە ۇلعايعانىن جازعان ەدىك.
