قازاقستاندا جول ەرەجەلەرىن بۇزعانى ءۇشىن جاۋاپكەرشىلىك كۇشەيتىلدى

استانا. KAZINFORM - قازاقستاندا كەيبىر جول قوزعالىسى ەرەجەلەرىن بۇزعانى ءۇشىن جازا كۇشەيتىلدى. بۇل تۋرالى اكىمشىلىك پوليتسيا كوميتەتىنىڭ ءتوراعاسى قايسار سۇلتانبايەۆ مالىمدەدى.

قاتاڭ شارالار جىلدامدىقتى ساعاتىنا 60 شاقىرىمنان نەمەسە ودان دا كوپ ارتتىرۋعا قاتىستى، ول ءۇشىن ەندى 40 ا ە ك كولەمىندە ايىپپۇل سالىنىپ جاتىر.

«قارسى قوزعالىس جولاعىنا شىققانى ءۇشىن 6 ايعا جۇرگىزۋشى كۋالىگىنەن ايىرۋ كوزدەلگەن، ال ەگەر بۇل ارەكەتتەر جول اپاتىنا اكەپ سوقسا، 20 ا ە ك مولشەرىندە ايىپپۇل نەمەسە 6 ايعا جۇرگىزۋشى كۋالىگىنەن ايىرۋ جازاسى كوزدەلگەن. ەندى قارسى جولاققا شىعۋ جول اپاتىنا اكەپ سوقسا، بۇل ءۇشىن جۇرگىزۋشىلەر 9 ايعا جۇرگىزۋشى قۇقىعىنان ايىرىلادى»، - دەدى سۇلتانبايەۆ.

سونىمەن قاتار، 13-ناۋرىزدان باستاپ كولىك قوزعالىسى كەزىندە تۇسىرگەنى ءۇشىن 10 ا ە ك ايىپپۇل سالىنادى. بۇل جاۋاپكەرشىلىك جولاۋشىعا دا، جۇرگىزۋشىگە دە بىردەي بولادى.

«جەدەل جانە ارناۋلى قىزمەتتەردىڭ (598-باپ) قوزعالىسىنا ارتىقشىلىق بەرمەگەنى ءۇشىن دە جاۋاپكەرشىلىك كۇشەيتىلدى، ايىپپۇل 7 دەن 20 ا ە ك- كە دەيىن، ال قايتالانعان جاعدايدا 15 تەن 40 ا ە ك كە دەيىن ۇلعايتىلدى»، - دەدى سۇلتانبايەۆ.

1-قاڭتاردان باستاپ ينتەرنەت پلاتفورما يەلەرى باقىلايتىن جەكە تاسىمالداۋشىلارعا قويىلاتىن جاڭا تالاپتار دا كۇشىنە ەندى.

ولار مىنا نارسەلەرگە مىندەتتى:

قىزمەتىن باستاعانى تۋرالى اكىمدىكتەرگە حابارلاۋ؛

كۇندەلىكتى رەيس الدىنداعى جانە رەيستەن كەيىنگى فيزيكالىق تەكسەرىستەن ءوتۋ؛

كولىكتى كۇندەلىكتى تەحنيكالىق تەكسەرىستەن وتكىزۋ؛

ەڭبەك جانە دەمالىس رەجيمىن ساقتاۋ.

باقىلاۋ ينتەرنەت پلاتفورمالاردىڭ يەلەرىنە (ياندەكس، يندرايۆەر جانە باسقالارىنا) جۇكتەلەدى.

ەسكە سالايىق، بۇعان دەيىن الماتىدا جۇك كولىگى 7 جاسار قىزدى قاعىپ كەتكەن وقيعادان كەيىن اۆتوبۋس جۇرگىزۋشىسى جاۋاپقا تارتىلدى.