قازاقستاندا جوشى ەسىمدى 31 ادام تىركەلگەن

 استانا. KAZINFORM - مەملەكەت باسشىسى قاسىم-جومارت توقايەۆ جوشى حاننىڭ ەسىمىن ۇلىقتاۋدىڭ، كەسەنەسىن مادەني تۋريزم نىسانىنا اينالدىرۋدىڭ ماڭىزدىلىعىن ايقىنداعان بولاتىن.

ەسىم دەمەكشى، قازاقستاندىقتار بالاسىنا ەرەكشە ات قويۋعا ۇمتىلاتىنى بەلگىلى. وسى ورايدا، ۇلتتىق ستاتيستيكا بيۋروسىنا حابارلاسىپ، جوشى ەسىمدى قانشا قازاقستاندىق بار ەكەنىن سۇراپ بىلگەن ەدىك.

قوعامدا جوشى حان تۋرالى ماعلۇماتتار ەندى عانا قىزۋ تالقىلانىپ جاتقاندىقتان، جوشى ەسىمدى قازاقستاندىقتاردىڭ از بولاتىنىن بولجاعان ەدىك. دەسە دە، جوشى ەسىمدى 31 ادامنىڭ بارىن ءبىلىپ، ەلەڭ ەتە قالدىق. ايتپاقشى، دجۋچي ەسىمدى 3، دجوشى جانە جوشي ەسىمدى 1 ادام تىركەلگەن ەكەن.

ءبىزدى بۇل تاريحي ەسىم ەلىمىزدىڭ قاي بولىگىندە كوپ ەكەنى قىزىقتىردى. ءسويتىپ، ۇلتتىق ستاتيستيكا بيۋروسىنىڭ سايتىنا كىرىپ، ءار ايماقتى تۇگەندەپ شىقتىق. سونىمەن 31 ادام ەلىمىزدىڭ قاي وڭىرىندە تىركەلگەن؟

استانا قالاسى - 5

الماتى قالاسى - 3

شىمكەنت قالاسى - 4

اباي وبلىسى - 2

الماتى وبلىسى - 3

اتىراۋ وبلىسى - 1

باتىس قازاقستان وبلىسى - 3

جامبىل وبلىسى - 1

قاراعاندى وبلىسى - 3

قىزىلوردا وبلىسى - 2

ماڭعىستاۋ وبلىسى - 1

تۇركىستان وبلىسى - 1

ۇلىتاۋ وبلىسى - 2

بيىل ەلىمىزدە جوشى ۇلىسىنىڭ 800 جىلدىعىنا وراي اۋقىمدى ءىس- شارالار جوسپارلانعانى بەلگىلى. سايلاۋ كەزىندە دۇنيەگە كەلگەن نارەستەگە سايلاۋبەك دەپ ىرىمداپ ات قوياتىن اعايىن جوشى ەسىمىن قوياتىنىنا دا سەنىمدىمىز. ەندەشە، كەلەسى جىلى ەلىمىزدە جوشى ەسىمدى قانشا ادام تىركەلگەنىن تاعى ءبىر زەرتتەپ كورەرمىز.. .