قازاقستاندا جەردە سيرەك كەزدەسەتىن مەتالدار تابىلدى
استانا. KAZINFORM - قازاقستاندا جەردە سيرەك كەزدەسەتىن مەتالداردىڭ پەرسپەكتيۆالى اۋماقتارى تابىلدى. بۇل تۋرالى ونەركاسىپ جانە قۇرىلىس ءمينيسترى قانات شارلاپايەۆ ۇكىمەت وتىرىسىندا ايتتى.
مينيستر قازاقستانداعى جەردە سيرەك كەزدەسەتىن مەتالداردى گەولوگيالىق بارلاۋدىڭ پەرسپەكتيۆالى ۋچاسكەلەرى تۋرالى مالىمدەدى. ول سيرەك كەزدەسەتىن مەتالدار سالاسىن دامىتۋعا باعىتتالعان جەر قويناۋىن مەملەكەتتىك گەولوگيالىق زەرتتەۋ اياسىندا 12 ۋچاسكەدە ىزدەۋ جۇمىستارى جالعاسىپ جاتقانىن اتاپ ءوتتى.
«بۇگىنگى تاڭدا جەردە سيرەك كەزدەسەتىن مەتالدار قورى شامامەن 800 مىڭ تونناعا باعالاناتىن كۇيرەكتىكول ۋچاسكەسىنىڭ بولاشاعى تۋرالى دەرەكتەر بار»، - دەدى قانات شارلاپايەۆ.
سونداي-اق مينيسترلىكتىڭ مالىمەتىنشە، جەردە سيرەك كەزدەسەتىن مەتالداردى بارلاۋدى - Cove Capital جانە HMS Bergbau سياقتى جەكە كومپانيالار جۇرگىزەدى.
قازاقستاندا بارلانعان التىن قورى ونى ءوندىرۋ كولەمىنەن اسادى
ونەركاسىپ جانە قۇرىلىس ءمينيسترى قانات شارلاپايەۆ ۇكىمەت وتىرىسىندا كەيىنگى 30 جىلدا قازاقستاندا تەمىر، مارگانەتس، التىن، ۋران، مۇناي جانە گاز قورلارىنىڭ ءوسۋى بايقالعانىن حابارلادى. ول قازاقستاننىڭ مينەرالدىق-شيكىزات بازاسىنا 987 قاتتى پايدالى قازبالار بار ەكەنىن جانە ولاردى بارلاۋ ديناميكاسى وڭ بولىپ قالاتىنىن اتاپ ءوتتى.
«التىننىڭ ورنىن تولتىرۋ كوەففيتسيەنتى - 1,2. بۇل التىننىڭ بارلانعان قورىنىڭ كولەمى التىن ءوندىرۋدىڭ كولەمىنەن كوپ ەكەنىن كورسەتەدى. مىس بويىنشا كوەففيتسيەنت - 0,7. بۇل رەتتە جەر قويناۋىن پايدالانۋشىلارىمەن مىس بويىنشا پەرسپەكتيۆالى جەر قويناۋى ۋچاسكەلەرى بەلسەندى تۇردە بارلانۋدا»، - دەدى قانات شارلاپايەۆ.
