قازاقستاندا جەر تەلىمدەرىنىڭ قۇنى قانشا تۇرادى
استانا. KAZINFORM - ەلىمىزدە حالىق جەردى كوبىنە ءۇي نەمەسە ساياجاي سالۋ سەكىلدى ماقساتپەن ساتىپ الادى. ودان كەيىنگى ورىندا اۋىل شارۋاشىلىعىنا ارنالعان جەر تەلىمدەرىن مەنشىككە الۋ تۇر. وسى سەكىلدى جەرلەردىڭ قۇنى ەل وڭىرلەرىندە قانشا تەڭگەگە باعالانادى؟ Kazinform وسى تاقىرىپتا شولۋ جاساپ كوردى.
اتاپ وتەرلىك جايت، ەڭ تومەنگى باعا مەن ەڭ جوعارعى باعا اراسىنداعى الشاقتىق تىم ۇلكەن. جەر تەلىمدەرىنىڭ قۇنى قانشا تۇراتىنىن جان-جاقتى اشىپ كورسەتۋ ءۇشىن وبلىس ورتالىعىنىڭ اۋماعىنا كىرەتىن جانە ودان تىس تەرريتورياداعى جەكە تۇرعىن ءۇي سالۋعا ارنالعان جەر ۋچاسكەلەرى، سونداي-اق اۋىل شارۋاشىلىعى ماقساتىنداعى جەر ۋچاسكەلەرى مىسالعا الىندى.
جەكە تۇرعىن ءۇي سالۋعا ارنالعان جەر تەلىمدەرى قانشا تۇرادى؟
جەكە تۇرعىن ءۇي قۇرىلىسىنىڭ باعاسى كوپ جاعدايدا ينفراقۇرىلىمنىڭ بار-جوعىنا، ينجەنەرلىك جانە كوممۋنيكاتسيالىق جەلىلەردىڭ تارتىلعانىنا، ورنالاسقان جەرىنە (قالا اۋماعىندا الدە قالا سىرتىندا ورنالاسۋى) بايلانىستى قالىپتاسادى. كەيبىر ۋچاسكەلەر ارحيتەكتۋرالىق قۇرىلىمىمەن ساتىلادى، بۇنداي جاعدايدا باعاسى دا جوعارى بولاتىنى تۇسىنىكتى.
شولۋدى ازىرلەۋ بارىسىندا ساتىلاتىن جەر تەلىمدەرىنىڭ ەڭ ءجيى كەزدەسەتىن اۋماعىنا ءمان بەرىلدى. جىلجىمايتىن مۇلىك ساتۋ جارنامالارى ورنالاستىرىلعان سايتتارداعى دەرەكتەرگە سۇيەنسەك، بۇل - ەشتەڭە سالىنباعان 6 جانە 10 سوتىق جەرلەر.
باسقا وڭىرلەرمەن سالىستىرعاندا جەر ۋچاسكەلەرى تۇركىستاندا، وسكەمەندە، جەزقازعان جانە پەتروپاۆلدا ارزانىراق. ماسەلەن، تۇركىستاندا 6 سوتىق جەردىڭ ورتاشا باعاسى 5 ميلليون تەڭگە، ال 10 سوتىق جەر شامامەن 14-15 ميلليون تەڭگە تۇرادى. قالا ماڭىندا ءسال ارزانىراق - 2,5 ميلليون تەڭگە.
وسكەمەندە 6 سوتىق جەر ورتاشا العاندا 5,4 ميلليون تەڭگە، 10 سوتىق جەر 11 ميلليون تەڭگە تۇرادى. قالا ماڭىنداعى جەرلەر بولسا 450 مىڭ مەن 3,5 ميلليون تەڭگە اراسىندا ساتىلادى.
جەزقازعاندا اۋماعى 6 سوتىق جەردى 5,5 ميلليون تەڭگە شاماسىندا ساتىپ الۋعا بولادى. ال 10 سوتىق جەر ورتاشا ەسەپپەن 12,6 ميلليونعا باعالانادى.
پەتروپاۆلدا 6 سوتىق جەر 6 ميلليون تۇرادى. 10 سوتىق جەر قالا اۋماعىندا 9 ميلليونعا، قالا ماڭىندا 600 مىڭنان ساۋدالانادى.
قونايەۆ قالاسىندا 6 سوتىق جەر الۋ ءۇشىن ساتىپ الۋشى 7 ميلليون تەڭگە تولەۋى كەرەك. ال 10 سوتىق جەرگە 18 ميلليون شىعىنداۋىنا تۋرا كەلەدى. ساياجاي اۋماعىندا جانە قالا ماڭىندا باعا ءسال تومەن - 1,5 ميلليون تەڭگەدەن باستالادى.
پاۆلوداردا 6 سوتىق جەردىڭ باعاسى 7 ميلليون تەڭگە شاماسىندا تۇر. 10 سوتىق جەر بولسا، 15 ميلليون تەڭگەگە شىعادى. قالا تەرريتورياسىنىڭ سىزىعىنان سىرت جەردەگى ۋچاسكەلەر مۇندا دا ارزانىراق بولادى: 10 سوتىعى - 1 ميلليون تەڭگە.
تالدىقورعاندا 6 سوتىق جەردىڭ ورتاشا باعاسى 7,5 ميلليون تەڭگەگە جەتەدى. قالا ماڭىنداعى جەر بولسا، 2 ميلليون تەڭگەدەن باستالادى. 10 سوتىق جەر قالا اۋماعىندا 12-15 ميلليون تەڭگە تۇرادى. ال ساياجايلاردا 1 ميلليون تەڭگەگە باعالانادى.
سەمەيدە 6 سوتىق جەر كەيبىر قالالارمەن سالىستىرعاندا جوعارى تۇرعانى بايقالادى. 6 سوتىق جەردىڭ باعاسى 9 ميلليونعا جەتەدى. 10 سوتىق بولسا - 13 ميلليون تەڭگە. قالا ماڭىنداعى جەرلەر 800 مىڭنان باستالىپ ساتىلادى.
اقتوبەدە 6 سوتىق جەر ورتاشا العاندا 9,5 ميلليون تەڭگە، قالا سىرتىندا 2-3,5 ميلليون تەڭگە تۇرادى. قالادا باسىم سۇرانىسقا يە - 10 سوتىق جەر، ونىڭ قۇنى 13 ميلليون تەڭگە تۇرادى. ال قالا سىرتىنان جەر الۋشى 400 مىڭنان جوعارى سۋمما تولەيدى.
كوكشەتاۋدا بولسا، 6 سوتىق جەردىڭ ورتاشا باعاسى 9,7 ميلليون تەڭگە. 10 سوتىقتىڭ ورتاشا باعاسى 15 ميلليون تەڭگە شاماسىندا. ال قالا ماڭىنداعى جەرلەر 2,5-4 ميلليون تەڭگە اراسىندا ساتىلادى.
قىزىلوردالىقتار 6 سوتىق جەردى 10 ميلليون تەڭگەدەن ساتىپ الىپ ءجۇر. ال 10 سوتىق جەر الۋ ءۇشىن قالتاڭدا 12-13 ميلليون تەڭگەڭ بولۋى كەرەك. قالا سىرتىنداعى جەرلەر 400 مىڭ شاماسىندا باعالانادى.
قوستانايدا دا 6 سوتىق جەردىڭ باعاسى وسىعان ۇقساس - 10 ميلليون تەڭگە. ال 10 سوتىق جەر الدەقايدا قىمبات - 22 ميلليون تەڭگە.
قاراعاندىدا 6 سوتىق جەر شامامەن 12 ميلليون تەڭگە تۇرادى. كوممۋنيكاتسيا تارتىلعان- تارتىلماعانىنا بايلانىستى ساياجايلارداعى ءدال وسى اۋماقتاعى جەر 500 مىڭ مەن 1,2 ميلليون تەڭگە اراسىندا ساتىلادى. قالا اۋماعىندا 10 سوتىق جەر 28 ميلليون، ال قالا سىرتىندا 1,5 ميلليون تەڭگە تۇرادى.
اتىراۋدا 6 سوتىق جەر 12 ميلليون تەڭگەگە باعالانادى. 10 سوتىق بولسا، 16,5 ميلليون تەڭگەدەن ساتىلۋدا. قالا ماڭىنداعى جەر بولسا، 800 مىڭ مەن 5 ميلليون تەڭگە اراسىندا ساۋدالانادى.
تارازدا 6 سوتىق جەردىڭ باعاسى 12-13 ميلليون تەڭگە بولادى. ال ساياجايلاردا جانە قالا ماڭىندا 2-3,5 ميلليون اراسىندا باعالانادى. 10 سوتىق جەر بولسا، ورتاشا العاندا 18-20 ميلليون تۇرادى. قالا ماڭىنداعى جەرلەردىڭ باعاسى 2,5 ميلليون تەڭگەدەن باستالادى.
ورالدا ەشتەڭە سالىنباعان تازا 6 سوتىق جەر 15,4 ميلليون تەڭگە تۇرادى. ال قالا سىرتىنداعى جانە ساياجايلارداعى جەردىڭ باعاسى 1,1 ميلليون تەڭگەدەن باستالادى. 10 سوتىق جەرگە كەلەر بولساق، ونىڭ باعاسى ورتاشا ەسەپپەن 35 ميلليون تەڭگە بولادى، ال قالا ماڭىندا - 1,5 ميلليون تەڭگە.
اقتاۋدا جەكە تۇرعىن ءۇي قۇرىلىسىنا ارنالعان 6 سوتىق جەردىڭ ورتاشا باعاسى 18 ميلليون، 10 سوتىق جەردىڭ باعاسى 25 ميلليون تەڭگە شاماسىندا. ال قالا سىرتىنداعى جەرلەر قالادان قانشالىقتى الىستىعىنا جانە تەڭىز جاعالاۋىنا جاقىندىعىنا بايلانىستى 1,5-6 ميلليون تەڭگە اراسىندا ساتىلادى.
مەگاپوليستەردەگى جەر باعاسى
تۇرعىندارىنىڭ سانى ءبىر ميلليوننان اساتىن ەلىمىزدەگى ءۇش قالادا باعا باسقا وڭىرلەرگە قاراعاندا جوعارى.
شىمكەنتتە 6 سوتىق جەر الۋ ءۇشىن 18-20 ميلليون تەڭگە شىعىندايسىڭ. 10 سوتىق الۋ ءۇشىن ءتىپتى 25-27 ميلليون تەڭگەڭ بولۋى شارت. قالا سىرتىندا 10 سوتىق جەر 2 ميلليون تەڭگەدەن باستالادى.
استانادا 6 سوتىق جەردىڭ ورتاشا باعاسى 33 ميلليون تەڭگە، دەيتۇرعانمەن كەيبىر 6 سوتىق جەرلەر 90 ميلليونعا ساتىلىپ تۇر. قالا سىرتىنداعى باعا 1,2 ميلليون تەڭگەدەن 10 ميلليونعا دەيىن قۇبىلادى. ال 10 سوتىق جەر ورتاشا ەسەپپەن 46-48 ميلليون تەڭگە تۇرادى، الايدا 110 ميلليون تەڭگەلىك جەر ۋچاسكەلەرىنىڭ دە جارناماسىن كەزىكتىرۋگە بولادى. ال قالا ماڭىنداعى جەرلەردىڭ باعاسى 2 ميلليون تەڭگەدەن باستالادى.
الماتىدا 56 ميلليون تەڭگەڭ بولماسا، 6 سوتىق جەر ساتىپ الا المايسىڭ. قالا ماڭىنداعى جەرلەر 2,5 ميلليون تەڭگەدەن باستالادى. قالا ىشىندە 10 سوتىق جەر 90 ميلليون تەڭگە شاماسىندا تۇرادى. قالا ماڭىنداعى جەرلەر بولسا (تاۋ ەتەگى جانە جەكەلەگەن اۋداندار) 3,5 ميلليون تەڭگەدەن باستاپ ساتىلادى.
وبلىستاردا اۋىل شارۋاشىلىعى جەرلەرىنىڭ باعاسى قانشادان؟
وڭىرلەردەگى شارۋا قوجالىقتارى جەرلەرى باعاسىنىڭ قالىپتاسۋىنا ونىڭ اۋماعى، جايىلىمىنىڭ بار-جوعى سەكىلدى كريتەرييلەر اسەر ەتەدى.
سولتۇستىك قازاقستان وبلىسىندا ساتىلىمداعى اۋىل شارۋاشىلىعى ماقساتىنداعى جەرلەردىڭ اۋماعى 13-506 گەكتار اراسىندا جانە باعالارى 1 ميلليوننان 30 ميلليونعا دەيىن جەتەدى. ماسەلەن، 71 گەكتار جەر 5,7 ميلليون تەڭگەدەن ساتىلىپ تۇر.
اقمولا وبلىسىندا ساتىلىمداعى جەرلەردىڭ اۋماعى 1 گەكتار مەن 11,8 مىڭ گەكتار اراسىندا. باعاسى 1 ميلليوننان 875 ميلليون تەڭگەگە دەيىن بارادى. جارنامالاردىڭ كوبىندە 10 گەكتارعا دەيىنگى اۋماقتاعى جەردىڭ ساتىلاتىنى، باعاسى 20-22 ميلليون تەڭگە ەكەنى جازىلعان.
ۇلىتاۋ وبلىسىندا ساتىلاتىن اۋىل شارۋاشىلىعى جەرلەرىنىڭ اۋماعى 318 گەكتاردان 5000 گەكتار اراسىندا قۇبىلادى. ولاردىڭ باعاسى 1 ميلليون تەڭگەدەن باستالىپ، 20 ميلليون تەڭگەگە جەتەدى. ماسەلەن، 318 گەكتار جەر 4,5 ميلليون تەڭگەگە، 5000 گەكتار جايىلىم 1 ميلليون تەڭگەگە ساتىلىپ تۇر.
اقتوبە وبلىسىندا 1,5 گەكتاردان 30 مىڭ گەكتار ارالىعىندا جەرلەر ساتىلۋدا. باعاسى 3-350 ميلليون تەڭگە اراسىندا وزگەرەدى.
اتىراۋ وبلىسىندا اۋىل شارۋاشىلىعى جەرلەرىنىڭ اۋماعى 1,6 گەكتاردان 1,2 مىڭ گەكتارعا دەيىن وسەدى. باعاسى - 1,6-450 ميلليون تەڭگە اراسىندا.
تۇركىستان وبلىسىندا اۋىل شارۋاشىلىعى جەرلەرىندە تاڭداۋ كوپ. مۇندا اۋماعى 1 گەكتاردان 1,5 مىڭ گەكتارعا دەيىنگى جەرلەردى 1,9 ميلليوننان 230 ميلليونعا دەيىنگى ارالىقتا الۋعا بولادى. كوپ جاعدايدا جەردىڭ قۇنى ونىڭ ورنالاسۋىنا بايلانىستى بەلگىلەنەدى.
تاۋ بوكتەرىنەن 230 ميلليون تەڭگەگە 100 گەكتار جەر ساتىپ الۋعا بولادى نەمەسە 2-5 ميلليون تەڭگە اراسىندا 1-20 گەكتار اۋماعىندا شاعىن جەر ۋچاسكەلەرى ساتىلادى.
پاۆلودار وبلىسىندا 1 گەكتاردان 3775 گەكتارعا دەيىنگى اۋماقتاعى جەرلەر 1-50 ميلليون تەڭگە اراسىندا ساتىلادى. مىسالى، 152 گەكتار جەر ۋچاسكەسى 15 ميلليونعا، باياناۋىلدا تاۋ بوكتەرىندەگى 1600 گەكتار جەر 25 ميلليونعا ساۋدالانىپ تۇر.
1,3 گەكتاردان 1,5 مىڭ گەكتارعا دەيىنگى جەر ۋچاسكەلەرى شىعىس قازاقستان وبلىسىندا 1-200 ميلليون تەڭگە اراسىندا باعالانادى. كوپ جاعدايدا ءبىر گەكتاردىڭ باعاسى 1 ميلليون تەڭگە شاماسىندا كەزدەسەدى. مىسالى، كاتونقاراعايدا 98 گەكتار جەر 98 ميلليونعا ساتىلىپ تۇر.
ماڭعىستاۋ وبلىسىندا 1 گەكتاردان 123 مىڭ گەكتارعا دەيىنگى جەرلەردىڭ جارناماسىن كەزىكتىرۋگە بولادى. قىمباتتارى كاسپيدىڭ جاعالاۋىندا ورنالاسقان. باعالارى 1,2 ميلليون مەن 50 ميلليون تەڭگە اراسىندا وزگەرەدى.
قىزىلوردا وبلىسىندا 5 گەكتاردان 1000 گەكتارعا دەيىنگى جەرلەردى 1,2-80 ميلليون تەڭگە اراسىندا ساتىپ الۋعا بولادى. ماسەلەن، سۋ قويماسىنا جانە ساياجايعا جاقىن جەردەگى 20 گەكتار جەردى ساتۋشى 80 ميلليون تەڭگە سۇراپ تۇر. ال باقشاعا قولايلى توپىراعى قۇنارلى 29 گەكتار جەر 47 ميلليون تەڭگەدەن تۇر.
جامبىل وبلىسىندا 3 گەكتاردان 1,3 مىڭ گەكتارعا دەيىنگى اۋماقتاعى جەرلەردىڭ باعاسى 1,8-264 ميلليون تەڭگە اراسىندا ساتىلىپ جاتىر.
ەگىنشىلىككە دە، مال وسىرۋگە دە كليماتى قولايلى قوستاناي وبلىسىندا 8 گەكتاردان 10 مىڭ گەكتارعا دەيىنگى جەرلەر ساتىلىمعا شىعارىلعان. باعاسى 900 مىڭنان 55 ميلليونعا دەيىنگى ارالىقتا. ماسەلەن، ارقالىق ماڭىندا اۋماعى 10 مىڭ گەكتار 50 ميلليون تەڭگە دەپ تۇر.
باتىس قازاقستان وبلىسىندا 1 گەكتاردان 1,4 مىڭ گەكتارعا دەيىنگى اۋماقتاعى جەرلەردى ساتىپ الۋعا بولادى. باعاسى 1,5-120 ميلليون تەڭگە اراسىندا.
اباي وبلىسىندا 5 گەكتاردان 1,3 مىڭ گەكتارعا دەيىنگى ارالىقتا جەرلەر ساتىلۋدا. قۇنى 3 ميلليوننان 60 ميلليونعا دەيىن وسەدى. ماسەلەن، 50 گەكتار جەر 34 ميلليون تەڭگەگە باعالانعان، ال اۋماعى 1,3 مىڭ گەكتار جەر 22 ميلليون دەپ تۇر.
الماتى وبلىسىندا باعا باسقا وڭىرلەرگە قاراعاندا جوعارى: 1 گەكتاردان 10 مىڭ گەكتارعا دەيىنگى ارالىقتاعى جەرلەردىڭ باعاسى 400 مىڭنان 7,8 ميللياردقا دەيىن شارىقتايدى.
قاراعاندى وبلىسىندا 2 گەكتاردان 7,5 مىڭ گەكتارعا دەيىنگى جەر تەلىمدەرى 3-200 ميلليون تەڭگە اراسىندا ساتىلۋدا. وڭىردەگى ەڭ قۇنى جوعارى جارنامانى الساق، 7,5 مىڭ گەكتار جايىلىم 200 ميلليون تەڭگەگە باعالاناتىنى جازىلعان.
جەتىسۋ وبلىسىندا ساۋداعا قويىلعان 2 گەكتاردان 2 مىڭ گەكتارعا دەيىنگى اۋماقتاعى جەر تەلىمدەرىن كەزىكتىرۋگە بولادى. باعاسى 1,2 ميلليوننان 950 ميلليونعا دەيىنگى ارالىقتا. ەڭ قىمبات ۇسىنىستى الساق، شەكارانىڭ جانە قۇرعاق پورتتىڭ جانىندا ورنالاسقان 50 گەكتار جەر 950 ميلليون تەڭگەگە ساتىلىپ تۇر.
اۆتور
ەربول جانات
