قازاقستاندا «Jibek Joly» راديوسى ءوز جۇمىسىن باستادى
استانا. KAZINFORM - ق ر پرەزيدەنتى تەلەراديوكەشەنىنىڭ جاڭا «Jibek Joly» راديوسى ءوز جۇمىسىن باستادى. اۋە تولقىنىندا العاشقى مەرەكەلىك تاڭعى ەفير ءوتىپ جاتىر، دەپ حابارلايدى Kazinform ءتىلشىسى.
جاڭا راديو «استانا» راديوسىنىڭ بازاسىندا قۇرىلدى جانە 101.4 FM جيىلىگىندە حابار تاراتۋدى جالعاستىرادى. راديو قازاق جانە ورىس تىلدەرىندە حابار تاراتادى.
العاشقى مەرەكەلىك ەفيردى ق ر پرەزيدەنتى تەلەراديوكەشەنى «Jibek Joly» تەلەارناسىنىڭ جۇلدىزدى جۇرگىزۋشىلەرى - ايگۇل مۇكەي مەن ءانۋار كاربوزوۆ جۇرگىزىپ جاتىر. بۇدان بولەك، كۇن سايىن ساعات 7:00 دە جاسۇلان ايساعالي مەن ديلبار جۇمەكەنوۆا تىكەلەي ەفيردە «تاڭعى ەسپرەسسو» شوۋىن وتكىزەدى.
ال راديونىڭ باس رەداكتورى بەكنۇر نۇرماعانبەت پەن جۇرگىزۋشى قىرمىزى جاندوسوۆا «JJ PRIMe» كەشكى شوۋىن جۇرگىزەدى. سونداي- اق ءار ساعات سايىن ەفيردەن وزەكتى جاڭالىقتار بەرىلىپ وتىرادى.
− بۇل تۇساۋكەسەرگە بىرنەشە اي دايىندالدىق، جۇمىس ءالى دە جالعاسىپ جاتىر. راديوفورماتتى وزگەرتۋ، مۋزىكالىق بازانى جاڭارتۋ - ءبىر كۇندە شەشىلەتىن شارۋا ەمەس. ليتسەنزيالاۋ، اۆتورلىق قۇقىق ماسەلەلەرى بار، سوندىقتان پروتسەسس ءالى ءجۇرىپ جاتىر. ءبىزدىڭ باستى ماقساتىمىز - تابىستى راديو كونتسەپتسياسىن قۇرۋ، تىڭدارماندار قاتارىن كەڭەيتۋ جانە جاڭا فورماتتاعى باق بولۋ. راديو مۋزىكاعا، كوڭىل كۇي مەن ەموتسياعا باسىمدىق بەرەدى، راديو قاسىڭدا وتىرعان دوسىڭداي اسەر بەرەدى. ءبىزدى كوبىرەك ادام تىڭداپ، ءار تاڭى مەن كەشىن بىزبەن وتكىزسە، جاڭالىقتاردى بىزدەن بىلسە دەيمىز. بۇل رەتتە وتە كەڭ اۋديتورياعا باعىتتالىپ وتىرمىز، تىڭدارماندارىمىز بەلسەندى ءومىر سالتىن ۇستاناتىن، ەل مەن قالادا، الەمدە بولىپ جاتقان وقيعالارعا بەيجاي قارامايتىن ازاماتتار بولادى دەپ ويلايمىز، − دەيدى «Jibek Joly» راديوسىنىڭ جەتەكشىسى ناتاليا بۋرەنكوۆا.
«Jibek Joly» − ەڭ تالعامپاز اۋديتورياعا ارنالعان مۋزىكا مەن ەركىن سۇحبات، وزەكتى كونتەنت الاڭى بولماق. راديو جاڭا تالانتتاردى تانىستىرىپ، قازاقستاننىڭ زاماناۋي مۋزىكاسىن ىلگەرىلەتۋ فورماتتارىن ەنگىزەدى.
ال «Jibek Joly» ءان فەستيۆالىندە قازاقستاننىڭ جاڭا مۋزىكالىق بۋىن وكىلدەرى تىڭدارمانىن قۋانتا تۇسپەك. ولاردىڭ اندەرى راديونىڭ بىرەگەي اۆتورلىق پلەيليسىنە قوسىلادى. سونداي- اق ورتالىق ازيا ەلدەرىنەن جاس، زاماناۋي، قىزىقتى ورىنداۋشىلاردى تارتىپ، اۋديتوريانى كەڭەيتۋدى كوزدەيدى.
سونداي-اق جاڭا راديو تەلەراديوكەشەن قۇرامىنداعى Jibek Joly تەلەارناسىمەن، Kazinform اگەنتتىگىمەن بىرلەسكەن كوللابوراتسيالار جاساۋدى، ورتالىق ازيا اۋديتورياسىنا شىعۋدى، ورتالىق ازيا ورىنداۋشىلارىمەن جۇمىس ىستەپ، ولاردىڭ شىعارماشىلىعىن تانىستىرۋدى كوزدەپ وتىر.
كۇن سايىن راديوەفير ديماش قۇدايبەرگەننىڭ ورىنداۋىنداعى قازاقستان رەسپۋبليكاسىنىڭ انۇرانىمەن باستالادى. تانىمال ءانشىنىڭ ورىنداۋىندا پرەزيدەنت تەلەراديوكەشەنى تۇسىرگەن ەدى.
ەسكە سالا كەتسەك، 16- ساۋىردە ەلوردادا وتكەن II ورتالىق ازيا مەديافورۋمىندا ايماقتىڭ اقپاراتتىق ىنتىماقتاستىعىن جانداندىرۋ، ورتاق SilkWay تەلەارناسىن قۇرۋ باستامالارى ايتىلعان ەدى.
سونداي-اق، مادەنيەت جانە اقپارات ءمينيسترى ايدا بالايەۆا ورتالىق ازيا ەلدەرىمەن قانداي مەدياجوبالار جاسالاتىنىن ايتتى.
ايجان سەرىكجان قىزى
