«قازاقستاندا جاسالعان» - استانادا ءۇش كۇن بويى وتاندىق ونىمدەر كورمەسى وتەدى
EXPO حالىقارالىق كورمە ورتالىعىندا «Ulttyq ónim» VIII وتاندىق وندىرۋشىلەر كورمەسى باستالدى. ءۇش كۇن بويى كورمەدە قازاقستاننىڭ بارلىق وڭىرىنەن 350 ءوندىرۋشى قاتىسىپ، ءوز ونىمدەرىن ۇسىنادى.
2015 -جىلدان بەرى «دامۋ» قورى قازاقستاندىق وندىرۋشىلەر كورمەسىن ۇيىمداستىرىپ كەلەدى. وندا مەملەكەتتەن قولداۋ العان شاعىن جانە ورتا بيزنەس سۋبەكتىلەرىنىڭ تاۋارلارى، تاماق، قۇرىلىس، جيھاز، كيىم، ارنايى تەحنيكا مەن جابدىقتار، كادەسىي جانە پوليگرافيا ونىمدەرى ۇسىنىلىپ، وتاندىق كومپانيالار اراسىنداعى كووپەراتسيانى كەڭەيتۋ جانە ءوندىرىستىڭ جاڭا تەحنولوگيالارىن ەنگىزۋ كوزدەلگەن.
− Ulttyq ónim سەگىزىنشى كورمەسى - وتاندىق كاسىپكەرلىكتى دامىتۋدىڭ ەڭ جاقسى دالەلى مەن كورىنىسى. وندىرۋشىلەر ەلىمىزدىڭ ىشكى نارىعىنداعى ۇستانىمىن نىعايتىپ، ەكسپورتقا شىعىپ جاتىر. شەتەلدە تانىمال برەندكە اينالىپ جاتىر. ال شاعىن جانە ورتا بيزنەستى مەملەكەتتىڭ قولداۋى تەك كۇشەيە بەرمەك. بيىل ەكونوميكانىڭ ناقتى سەكتورىن جەدەل دامىتۋعا بەت بۇردىق. مەملەكەت اقپاراتتىق تەحنولوگيا، لوگيستيكا، تۋريزمگە، تاماق ءونىمىن، قۇرىلىس ماتەريالىن وندىرۋگە، ماشينا جاساۋ، جەڭىل جانە حيميا ونەركاسىبى سياقتى باسىم سالالارداعى شوب ينۆەستيتسيالىق جوبالارىنا اشىق تاپسىرىس جاريالادى. بۇل باعىتتا جان-جاقتى قولداۋ كورسەتىلەدى، - دەدى پرەمەر-ءمينيستردىڭ ورىنباسارى - ۇلتتىق ەكونوميكا ءمينيسترى سەرىك جۇمانعارين كورمەنىڭ اشىلۋىندا.
كورمەدە تاعام ونىمدەرى، جەڭىل جانە حيميا ونەركاسىبىنەن باستاپ، ماشينا جاساۋ، قۇرال-جابدىقتار مەن زەرگەرلىك بۇيىمدارعا دەيىن ءارتۇرلى ءونىم تۇرلەرى ۇسىنىلعان. ولاردىڭ قاتارىندا «گورمولزاۆود»، «Aq Dam» ۇلتتىق تاتتىلەرى، Galamilk, Altay Outwear بەلسەندى دەمالىس پەن تۋريزمگە ارنالعان كيىم-كەشەك، «Balausa Jewelry» زەرگەرلىك بۇيىمدارى سەكىلدى تانىمال برەندتەر بار.
سونىمەن بىرگە، اس ءۇي پليتالارى، جەلدەتكىش، مەديتسينالىق جابدىقتار، ترانسفورماتورلار، قوسپا جەم، شاباداندار، توقىما بۇيىمدارى، قۇرىلىس ماتەريالدارى، انتيسەپتيكتەر، كيىم، اياق كيىم جانە باسقا دا سۇرانىسقا يە تاۋارلار ۇسىنىلعان.
وتكەن جىلى ەل ۇكىمەتى ۇلتتىق ەكونوميكا مينيسترلىگىنىڭ جانە «بايتەرەك» حولدينگىنىڭ بەلسەندى قاتىسۋىمەن سۋبسيديالاۋ جانە كەپىلدىك بەرۋ قۇرالدارى ارقىلى بيزنەستى قولداۋ باعدارلامالارىنا 336 ميلليارد تەڭگە ءبولدى. جالپى نەسيە سوماسى 1,7 تريلليون تەڭگەگە 29,5 مىڭ جوبا مەملەكەت قولداۋىن الدى. ونىڭ ىشىندە 2,7 مىڭ جوبا جەڭىلدىكپەن 254 ميلليارد تەڭگە نەسيە العان.
بۇل شارالار 9,7 مىڭ جۇمىس ورنىن قۇرۋعا، 25,4 تريلليون تەڭگە سوماسىنا ءونىم شىعارۋعا جانە 1,7 تريلليون تەڭگە سالىق ءتۇسىمىن قامتاماسىز ەتۋگە مۇمكىندىك بەردى. ناتيجەسىندە 2024 -جىلى حالىق سانىنىڭ %48 شوب سەكتورىندا جۇمىسپەن قامتىلعاندار قاتارىندا بولدى، ال ەلدىڭ جالپى ىشكى ونىمىنە قوسقان ۇلەسى شامامەن %40 كورسەتتى.
«بايتەرەك» حولدينگىنىڭ باسقارما ءتوراعاسى رۋستام قاراعويشين ەكونوميكالىق ءوسىمدى ىنتالاندىرۋ، اسىرەسە ەكونوميكانىڭ ناقتى سەكتورىن قولداۋ مەن بيزنەستىڭ قارجىلعا قولجەتىمدىگىن ارتتىرۋ ماقساتىنداعى شارالاردىڭ ماڭىزىن ايتتى.
− وتاندىق ءوندىرىستى قولداۋ - «بايتەرەك» حولدينگىنىڭ ستراتەگيالىق باسىمدىعى. ءبىز قازاقستاندىق بيزنەستىڭ ۇلتتىق ەكونوميكانىڭ تىرەگى، يننوۆاتسيالار مەن جۇمىسپەن قامتۋ كوزى ەكەنىنە سەنىمدىمىز. بۇل كورمە - قازاقستاندىق وندىرۋشىلەردىڭ ەل دامۋىنداعى باستى ءرولىن كورسەتۋ. ءبىز ولاردىڭ تۇراقتى وسۋىنە جانە كاسىپكەرلىك الەۋەتىن اشۋعا جاعداي جاساي وتىرىپ، ۇنەمى جانىندا بولۋعا تىرىسامىز، - دەدى رۋستام قاراعويشين.
كورمە اياسىندا وتاندىق كاسىپكەرلىكتى دامىتۋ ماسەلەلەرىنە ارنالعان پانەلدىك سەسسيالار ءوتتى. ولارعا جەتەكشى قازاقستاندىق جانە حالىقارالىق ساراپشىلار قاتىسادى. قاتىسۋشىلار ەلىمىزدەگى بيزنەستى دامىتۋداعى وزەكتى ترەندتەردى، سىن-قاتەرلەر مەن مۇمكىندىكتەردى تالقىلايدى.
سونىمەن قاتار كورمە بارىسىندا «حالىق تاڭداۋى» اتتى تاۋەلسىز ءدام بايقاۋى، ايەلدەر مەن ەرلەر كيىم توپتامالارىنىڭ كورسەتىلىمى، كاسىپكەرلەردەن شەبەرلىك ساباقتارى، كورمە قاتىسۋشىلارىنان كۇن سايىن سىيلىقتار ۇتىسى جانە كونتسەرتتىك باعدارلاما وتەدى.
جالپى «دامۋ» قورىنىڭ قۇرالدارى ارقىلى 225,3 مىڭ جوباعا مەملەكەتتىك قولداۋ كورسەتىلىپ، 14,1 تريلليون تەڭگە كولەمىندە نەسيە بەرىلگەن. ناتيجەسىندە 210 مىڭنان استام جاڭا جۇمىس ورنى قۇرىلىپ، 1,2 ميلليوننان استام جۇمىس ورنى ساقتالعان، 104,5 تريلليون تەڭگەنىڭ ءونىمى ءوندىرىلىپ، 7,3 تريلليون تەڭگە سالىق ءتۇسىمى قامتاماسىز ەتىلگەن.
ءساۋىر ايىندا سەنات وتاندىق وندىرۋشىلەردى قورعاۋعا باعىتتالعان قۇجاتتى ماقۇلداعان ەدى.
اۆتور
ايجان سەرىكجان قىزى
