قازاقستاندا شەتەلدىك ستۋدەنتتەر كوبەيدى
استانا. KAZINFORM - ەلدە شەتەلدىك ستۋدەنتتەر كوبەيىپ كەلەدى. كەيىنگى ەكى جىلدىڭ وزىندە ولاردىڭ سانى %17- كە ارتقان، دەپ حابارلايدى 24kz.
اسىرەسە، مەديتسينا، IT، ينجەنەريا سالالارى بويىنشا ءبىلىم الىپ جاتقاندار كوپ. جوعارى وقۋ ورنىنا ءتۇسۋ ءاربىر ستۋدەنت ءۇشىن ماڭىزدى كەزەڭ. ال وزگە مەملەكەتتە ءبىلىم الۋ - جاڭا ومىرلىك تاجىريبە. قازىرگى تاڭدا ەلىمىزدە جىلدان جىلعا شەتەلدەن كەلگەن ستۋدەنتتەر سانى ارتىپ كەلەدى. ولار قازاقستانداعى ستۋدەنتتىك ومىرگە قالاي بەيىمدەلەدى؟
بيلال ماكبۋل - ءۇندىستاننان كەلگەن ستۋدەنت. قازىر استانا مەديتسينا ۋنيۆەرسيتەتىندە وقيدى. بالا كۇنىنەن دارىگەر بولۋدى ارمانداپتى. جولى بولىپ، قازاقستانعا وقۋعا تۇسكەن. جالپى ءبىزدىڭ ەلگە شەتەلدەن كەلەتىن ستۋدەنتتەردىڭ ىشىندە ءۇندىستاندىقتار كوش باستاپ تۇر. ءبىر عانا استانا مەديتسينا ۋنيۆەرسيتەتىندە 729 شەتەلدىك ءبىلىم الادى. ونىڭ 500-دەن استامى ءۇندىستان ازاماتتارى.
بيلال ماكبۋل، جالپى مەديتسينا فاكۋلتەتىنىڭ 4-كۋرس ستۋدەنتى:
- ءۇندىستانداعى حالىق سانىنىڭ كوپتىگىنە بايلانىستى ۋنيۆەرسيتەتتەر بارلىق ستۋدەنتتەردى قابىلداي المايدى. سول سەبەپتى جاستار قولجەتىمدى ءارى ساپالى ءبىلىم الۋدىڭ مۇمكىندىكتەرىن ىزدەيدى. قازاقستان سول باعىتتاعى ەڭ جاقسى تاڭداۋدىڭ ءبىرى. سەبەبى مۇندا الەمنىڭ كوپتەگەن ەلدەرىندە مويىندالعان مەديتسينالىق ديپلوم بەرىلەدى. مەن ءارقاشان كوپ ۇلتتى ورتادا ءبىلىم الۋدى ارماندادىم. قازاقستان ماعان وسى مۇمكىندىكتى ۇسىندى.
بيىل ەلدە 31 مىڭنان استام شەتەلدىك ستۋدەنت ءبىلىم الىپ ءجۇر. ولاردىڭ سانى 2022 -جىلمەن سالىستىرعاندا %17- كە وسكەن. ولاردىڭ ىشىندە ۇلى بريتانيا، ا ق ش، قىتاي، فرانسيا جانە وڭتۇستىك كورەيا سياقتى دامىعان ەلدەردەن دە ستۋدەنتتەر بار.
گۇلزات كوبەنوۆا، جوعارى جانە جوعارى وقۋ ورنىنان كەيىنگى ءبىلىم كوميتەتىنىڭ ءتورايىمى:
- بۇگىنگى كۇنى ەلىمىزدە 31 مىڭنان استام شەتەلدىك ستۋدەنتتەر ءبىلىم الۋدا. وزدەرىڭىز بىلەسىزدەر، بۇگىندە قازاقستاننىڭ جوعارى وقۋ ورىندارى ءبىلىمدى مەملەكەتتىك تىلدە دە، ورىس تىلىندە دە، شەت تىلدەرىندە دە ۇسىنادى. سول سەبەپتەن، بۇگىنگى كۇنى جىلدان جىلعا قىزىعۋشىلىق ءوسىپ كەلە جاتىر. سوڭعى ەكى جىلدىڭ ىشىندە بىزدە شەتەلدىك ستۋدەنتتەردىڭ قىزىعۋشىلىعىنىڭ جانە سانىن ارتقانىن كورىپ وتىرمىز.
ستۋدەنتتەردىڭ ايتۋىنشا، قازاقستاندا وقۋ باعاسى قولجەتىمدى ءارى ءبىلىم بەرۋ جۇيەسى حالىقارالىق ستاندارتتارعا ساي. بۇدان بولەك، شەتەلدىك ستۋدەنتتەردىڭ بەيىمدەلۋىنە جان-جاقتى قولداۋ بار. ولاردىڭ وقۋى مەن تۇرمىس جاعدايىنا دا قولايلى ورتا قالىپتاسقان.
يەففري ۆان دەن برينك، الەۋمەتتىك جانە گۋمانيتارلىق عىلىمدار فاكۋلتەتىنىڭ ستۋدەنتى:
- العاشىندا ءوز ەلىمدە قالىپ، ءبىلىمىمدى جالعاستىرۋ مۇمكىندىگى بولدى. وسىعان قاراماستان، قازاقستاندا وقۋدى تاڭدادىم. ەۋرازيانىڭ جۇرەگىندە ورنالاسقان بۇل ەلدىڭ شىنايى تىنىسىن سەزىنىپ، ومىرىمەن جاقىن تانىسۋ يدەياسى قىزىقتىردى. مۇندا ءبىلىمنىڭ قانشالىقتى حالىقارالىق دەڭگەيدە ەكەنىن كورىپ، تاڭعالدىم. اسىرەسە، شەتەلدىك وقىتۋشىلار مەن ءتۇرلى ەلدەن كەلگەن ستۋدەنتتەردىڭ كوپتىگى ەرەكشە اسەر قالدىردى.
دجوردج سياۋ، جوعارى ءبىلىم بەرۋ مەكتەبىنىڭ ستۋدەنتى:
- مۇنداعى ورتا مەنى شىنىمەن دە تاڭعالدىردى. باسىندا تىلدىك كەدەرگىلەرگە تاپ بولامىن دەپ ويلادىم. الايدا، جەرگىلىكتى حالىقتىڭ ەرەكشە قوناقجايلىعى مەن مەيىرىمدىلىگى تاڭعالدىردى. قىسقا ۋاقىت ىشىندە كوپتەگەن جاڭا دوستار تاپتىم. بوس ۋاقىتىمدا ولارمەن قىزىقتى ۋاقىت وتكىزەمىن.
ەلدەگى جوعارى وقۋ ورىندارىنا شەتەلدىك تالاپكەرلەردى تارتۋ ماقساتىندا مەملەكەتتىك بيۋدجەت ەسەبىنەن جىل سايىن 550 گرانت بولىنەدى. سونداي-اق كەيبىر جوعارى وقۋ ورىندارىندا اي سايىنعى شاكىرتاقى مەن مەديتسينالىق ساقتاندىرۋدى قامتيتىن ىشكى گرانتتار مەن ارنايى كونكۋرستار قاراستىرىلعان.
كاميللا ابديكادىروۆا، نازاربايەۆ ۋنيۆەرسيتەتىنىڭ تالاپكەرلەردى قولداۋ ورتالىعىنىڭ ۇيلەستىرۋشىسى:
- جالپى شەتەلدىك ستۋدەنتتەردىڭ سانى جىلدان جىلعا كوبەيىپ كەلە جاتىر. نازاربايەۆ ۋنيۆەرسيتەتى تاراپىنان شەتەل ازاماتتارىنا «اباي قۇنانباي ۇلى» گرانتى بولىنگەن. ەگەر دە كونكۋرستان وتسەڭىز، سول گرانتپەن وقيسىزدار. ياعني، وقۋ اقىسى جابىلادى جانە دە شاكىرتاقى بەرىلەدى.
عىلىم جانە جوعارعى ءبىلىم مينيسترلىگى 2029 -جىلعا قاراي شەتەلدىك ستۋدەنتتەر قاتارىن %10- كە دەيىن ارتتىرماق. بۇل ەلدەگى جوعارى وقۋ ورىندارىن شەتەلدىك تالاپكەرلەر ءۇشىن تارتىمدى ەتىپ، ءبىلىم بەرۋ جۇيەسىنىڭ جاھاندىق دەڭگەيدە باسەكەگە قابىلەتتىلىگىن كۇشەيتۋ ءۇشىن قاجەت.
