قازاقستاندا ديپلوم ساۋداسى قىزىپ تۇر - مينيسترلىك نە دەيدى

استانا. KAZINFORM - جەلىدە دايىن ديپلومدى ساتىپ الۋ مۇمكىندىگى تۋرالى جارنامالار قاپتاپ ءجۇر. وسى ورايدا عىلىم جانە جوعارى ءبىلىم مينيسترلىگىنىڭ ۇستانىمى قانداي؟ بۇل ساۋالعا ۆيتسە-مينيستر گۇلزات كوبەنوۆا جاۋاپ بەردى.

- بۇگىندە ديپلومدى ساتىپ الۋدىڭ قاجەتى جوق، سەبەبى ءاربىر ديپلومدى eGov.kz ارقىلى تەكسەرۋگە بولادى. ديپلوم يەسى نەمەسە جۇمىسقا قابىلداۋشى ديپلومنىڭ ءنومىرىن تەرسە، سول جەردە ديپلومنىڭ قاي جەردە، قاشان بەرىلگەنى، قانداي جوعارى وقۋ ورنىن اياقتاعانى تۋرالى اقپارات شىعادى. 1991 -جىلدان بەرى بەرىلگەن 3,5 ميللوننان استام ديپلوم سيفرلاندىرىلدى، - دەدى گۇلزات كوبەنوۆا ۇكىمەت ۇيىندە وتكەن باسپا ءسوز ءماسليحاتىندا.

ۆيتسە-ءمينيستردىڭ ايتۋىنشا، قازىر ءار ديپلومدا QR كودى جانە سەريالىق ءنومىرى بار.

- وكىنىشكە قاراي، الاياقتار بار، ولار ديپلوم ساتۋدى جارنامالاپ ءجۇر. بۇل ورايدا ءبىز ىشكى ىستەر مينيسترلىگى، مادەنيەت جانە اقپارات مينيسترلىگى جانە سيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگىمەن بىرلەسىپ جۇمىس ىستەپ جاتىرمىز. قۇقىقتىق جاۋاپكەرشىلىك بارىن ەسكەرۋ كەرەك، - دەيدى ول.

سونداي-اق ءمينيستردىڭ ورىنباسارى جالعان ديپلوم يەلەرى مەن ونى ساتقاندار جازالاناتىنىن ايتتى.

- ارينە، جازالانادى. بۇل جەردە اكىمشىلىك جانە قىلمىستىق جاۋاپكەرشىلىك بار، - دەپ قورىتىندىلادى گ. كوبەنوۆا.

ايتا كەتەيىك، قازىر جوعارى، ارناۋلى وقۋ ورىندارىن بىتىرگەن تۇلەكتەر قولىنا ديپلوم الىپ، جۇمىس ىزدەۋگە كوشتى. ءبىرى قالادا قالسا، ەندى ءبىرى ەڭبەك جولىن اۋىلدان باستاعاندى ءجون كورەدى. Kazinform ءتىلشىسى جاس مامانداردىڭ قالاي تاڭداۋ جاساعانىن سۇرادى.