قازاقستاندا دومبىراعا قويىلعان قانداي ەسكەرتكىشتەر بار
قىزىلوردا. قازاقپارات - 2018-جىلدان بەرى شىلدەنىڭ العاشقى جەكسەنبىسى قازاقستاندا ۇلتتىق دومبىرا كۇنى رەتىندە تويلانىپ كەلەدى. Kazinform ءتىلشىسى اتاۋلى كۇن قارساڭىندا ۇلتتىق اسپاپتىڭ قۇرمەتىنە ارنالعان توپ-10 ەسكەرتكىش ءتىزىمىن وقىرمان نازارىنا ۇسىنادى.
دومبىراعا ارنالعان ەڭ العاشقى ەسكەرتكىش اقتوبە قالاسىندا 2016-جىلى بوي كوتەردى.
اۆتورى - ءمۇسىنشى ق. ەسجانوۆ. ەسكەرتكىشتىڭ بيىكتىگى - 6,30 مەتر، ەنى - 1,40 مەتر، شاناعى - 2,5 مەتر، مويىنى - 4 مەتر شاماسىندا.
دومبىرا تەمىردەن قۇيىلعان، 12 پەرنەسى بار، قوس ىشەگى تروس سىمنان جاسالعان. ۇستا وعان ۇكى تاعۋدى دا ۇمىتپاي، مۋزىكالىق اسپاپتىڭ زاڭدىلىعىن ساقتاي وتىرىپ جاساعان.
كوكشەتاۋداعى «دومبىرا» ارحيتەكتۋرالىق كومپوزيتسياسى 2019-جىلى قالانىڭ 195 جىلدىعىنا تارتۋ بولدى.
جەرگىلىكتى ءمۇسىنشى جانە سۋرەتشى م. بۇرماعانوۆ 11 مەترلىك ستەلانى مەتال كونسترۋكتسياسى مەن بەتوننان سالعان. ستەللا دەمەۋشىلەر قارجىسى ەسەبىنەن ازىرلەندى.
ەلىمىزدە سونداي-اق دومبىرا پىشىنىندەگى سۋبۇرقاق بار. ونى الماتىداعى قۇرمانعازى اتىنداعى قازاق ۇلتتىق كونسەرۆاتورياسىنىڭ ماڭىنان كورۋگە بولادى.
ەسكەرەتىنى، بۇل - ۇلتتىق اسپاپتى ۇلىقتايتىن العاشقى سۋبۇرقاق. ۇزىندىعى - 10,25 مەتر، ەنى - 2,85 مەتر. اۆتورى - ن. قانىبەكوۆ، ن. قۋانىشبەكوۆ.
اتىراۋ وبلىسىنىڭ يندەربور كەنتىندەگى ورتالىق ساياباقتا «ابدوللا دومبىراسى» دەگەن جازۋى بار دومبىرا مونۋمەنتى تۇر.
التىن تۇستەس مەتاللدان قۇيىلعان مونۋمەنتتىڭ بيىكتىگى - 7,5 مەتر. تۇندە جارقىراپ تۇرادى. مونۋمەنتكە ءبىرقاتار جەرگىلىكتى ونەرپازدىڭ ەسىمى قاشالىپ جازىلعان.
شىمكەنتتە قاسىنا جاقىنداساڭ، كۇي كۇمبىرلەپ قويا بەرەتىن «دومبىرا» ەسكەرتكىشى بار.
«تۇركىستان» سالتانات سارايىنىڭ الدىندا ورنالاسقان نىسان اۆتورى - قازاقستان سۋرەتشىلەر وداعى شىمكەنت قالالىق فيليالىنىڭ مۇشەلەرى.
ەسكەرتكىشتىڭ ۇزىندىعى - 7,5 مەتر، ەنى - 1,5 مەتر.
شىعىس قازاقستان وبلىسىنىڭ جارما اۋدانىندا دا اتاۋلى كۇننىڭ قۇرمەتىنە وراي 2018-جىلى اشىلعان ەسكەرتكىش بار.
ونى سەمەيلىك ءمۇسىنشى ن. قالييەۆ شىنى پلاستيكتەن ازىرلەپ، قولا تۇستەس قوياۋمەن ارلەگەن. تۋىندىنىڭ بيىكتىگى – 7، ەنى - 3 مەتر.
تۇركىستان وبلىسىندا ۇلتتىق ساز اسپابىنا ارنالعان ءبىر ەمەس، بىرنەشە ەسكەرتكىشتى كەزىكتىرەسىز. ونىڭ ءبىرى وتىرار اۋدانىنىڭ ءشاۋىلدىر اۋىلىندا تۇر.
«كۇي قۇدىرەتى» دەپ اتالاتىن ەكىنشى بەلگى سوزاق اۋدانىنىڭ ورتالىعى شولاققورعان اۋىلىنداعى تۋ تۇعىرى الاڭىندا ورنالاسقان. وندا جەرگىلىكتى قالامگەرلەر مەن كۇيشىلەردىڭ ەسىمدەرى جازىلعان.
تۇركىستان وبلىسى تولەبي اۋدانىنىڭ قاراتوبە اۋىلدىق وكرۋگىندە دە دومبىرا ۇلگىسىندەگى ەسكەرتكىش بار. ول 2019-جىلى سالىنعان، بيىكتىگى - 1,40 م، ەنى - 1,20×1,20.
باتىس قازاقستان وبلىسى قازتالوۆ اۋدانى جالپاقتال اۋىلىنداعى «دومبىرا» مونۋمەنتى - 20 جىل بۇرىنعى مەكتەپ تۇلەكتەرىنىڭ تۋعان جەرگە تارتۋى.
اۋىلدىڭ سانىنە ءسان قوسقان ارحيتەكتۋرالىق نىسان بىلتىر قويىلدى.
ەندى ءبىر ەسكەرتكىش قاراعاندى وبلىسىنىڭ اقتوعاي اۋدانىندا ورنالاسقان. بيىكتىگى - 12 مەتر، مونۋمەنت 80 شارشى مەتر اۋماقتى الىپ جاتىر.
قىزىلوردا قالاسىنداعى «سىر سۇلەيلەرى» اللەياسىنىڭ قاق ورتاسىندا دا وسى مازمۇنداعى ەسكەرتكىش بار. وندا قوبىز بەن دومبىرا بەينەسىنە قوساقتالعان قالام مەن نايزا ورناتىلعان.
ەسكەرتكىش اۆتورلارى - ا. كەنەنبايەۆ، م. سىدىقوۆ جانە س. ماكىبايەۆ.
قىزىلوردا وبلىسىنىڭ شيەلى اۋدانىنان ۇلتتىق اسپاپتىڭ قۇرمەتىنە قويىلعان بەلگىنى كەزدەستىرەسىز. ول كۇيشى ادىلبەك ءتاشىموۆتىڭ «شيەلى تولعاۋى» اتتى كۇيىنە ارناپ ورناتىلعان.
ەسكە سالا كەتەيىك، ۇلتتىق دومبىرا كۇنىنە وراي بيىل ەل كولەمىندە 300 گە جۋىق ءىس-شارا ۇيىمداستىرىلادى، ونىڭ 200 دەن استامى وڭىرلەردە جوسپارلانعان.
