قازاقستاندا ءزايتۇن مەن بانان ءوسىرۋ جوبالارى كەڭەيتىلۋى مۇمكىن
استانا. KAZINFORM - اۋىل شارۋاشىلىعى ۆيتسە- ءمينيسترى ازات سۇلتانوۆ قازاقستان اۋماعىندا ءزايتۇن مەن بانان ءوسىرۋ جوبالارىنا قاتىستى پىكىر ايتتى.
ونىڭ سوزىنشە، تۇركىستان وبلىسىندا مىڭ تونناعا جۋىق بانان وندىرۋگە باعىتتالعان ينۆەستيتسيالىق جوبا جۇزەگە اسىرىلدى. بۇل قازاقستان رەسپۋبليكاسىنا يمپورتتالاتىن جالپى باناننىڭ شامامەن ءبىر پايىزىن قۇرايدى.
«قازىرگى كەزدە باعا كونەكتۋراسىن، ءونىمدى جەتكىزۋ شىعىندارىن ەسكەرە وتىرىپ، بۇل بانان قۇنى ىشكى نارىقتاعى باعامەن باسەكەگە قابىلەتتى بولۋى مۇمكىن. ءتىپتى، ەلىمىزدە وسىرىلگەن وسى ءونىم جىلدام ساتىلىپ كەتەدى دەگەن جارناما ايتىلىپ جاتىر، ياعني ءىرى ساۋدا ورىندارى ءىرى كولەمدە الۋعا مۇددەلى ەكەن. ماسەلەن، رەسەي فەدەراتسياسى ءبىزدىڭ كليماتتىق جاعدايدا جەكە كومپانيانىڭ بانان سياقتى باسەكەگە قابىلەتتى ءونىم ءوسىرۋى تاجىريبەسىنە نازار اۋدارىپ وتىر»، - دەدى ا. سۇلتانوۆ سەناتتا تىلشىلەر سۇراعىنا جاۋاپ بەرە وتىرىپ.
ونىڭ ايتۋىنشا، تۇركىستان وبلىسىندا ءزايتۇن ءوسىرۋ بويىنشا جوسپار بار.
«مۇنىمەن قوسا، باتىستا دا ءزايتۇن اعاشىن وسىرۋگە ارنالعان ينۆەستيتسيالىق جوبانى جۇزەگە اسىرۋدى جوسپارلاپ وتىرمىز. ءبىز ەكسپەريمەنت جۇرگىزدىك، جاقسى كورسەتكىشتەر بار»، - دەدى ۆيتسە- مينيستر.
ەسكە سالساق، جاقىندا بۇقارالىق اقپارات قۇرالدارىندا رەسەيدىڭ اۋىل شارۋاشىلىعى مينيسترلىگى قازاقستاننىڭ بانان وسىرۋدەگى تاجىريبەسىنە نازار اۋدارىپ وتىرعانى جايىندا مالىمەت تارادى.
بيىل كوكتەمدە تۇركىستان وبلىسىندا وسىرىلگەن باناندار مامىر ايىندا ساتىلىمعا شىعاتىنىن جازعان ەدىك.
وسىعان دەيىن تۇركىستاندىق شارۋالار ەكزوتيكالىق جەمىستەردى ءوسىرۋدى قولعا الا باستاعانى حابارلاندى.
بىلتىر كۇزدە ماڭعىستاۋ وبلىسىندا تاجىريبە تۇرىندە 2 مىڭ ءتۇپ ءزايتۇن اعاشى ەگىلگەنى جاريالاندى.
