قازاقستاندا ءمايىتتى «سويماي» سوت-مەديتسينالىق ساراپتاما جاسايتىن تەحنولوگيا قولدانىسقا ەنەدى

استانا. KAZINFORM - ادىلەت ءمينيسترى ەرلان سارسەمبايەۆ ۇكىمەت وتىرىسىندا سوت-مەديتسينالىق ساراپتاما شارالارى ءداستۇر مەن دىنگە ساي ەتۋ ءۇشىن كومپيۋتەرلىك توموگرافيانى قولدانۋدى ۇسىندى.

- «ۆيرتۋالدى اۋتوپسيانى» ەنگىزۋ جوسپارلانىپ وتىر. بۇل - قايتىس بولعاندارعا سوت-مەديتسينالىق زەرتتەۋلەر جۇرگىزۋ ءۇشىن كومپيۋتەرلىك توموگرافيانى قولدانۋ. زەرتتەۋ ءمايىتتى كەسپەي (سويماي) جۇرگىزىلەدى. بۇل ۇلتتىق جانە ءدىني داستۇرلەرمەن قايشىلىقتى بولدىرماۋعا كومەكتەسەدى، - دەدى ۆەدومستۆو باسشىسى.

سونداي-اق، ول ساراپتاما قىزمەتىن اۆتوماتتاندىرۋ ارقىلى ساراپتاما جۇرگىزۋدىڭ اشىقتىعىن ارتتىرۋعا بولاتىنىن ايتتى.

- پيلوت رەتىندە كۇردەلى ەمەس ەكى-ءۇش ساراپتامانى اۆتوماتتاندىرۋدى جوسپارلاپ وتىرمىز. جاساندى ينتەللەكتتى پايدالانا وتىرىپ، «ە- ساراپتاما 2.0» اقپاراتتىق جۇيەسىنىڭ جاڭا نۇسقاسىن ازىرلەۋ قاجەت. سەبەبى قولدانىستاعى جۇيە زاماناۋي تالاپتارعا ساي كەلمەيدى. ونى باسقا اقپاراتتىق جۇيەلەرمەن، جابدىقتارمەن بىرىكتىرۋ مۇمكىن ەمەس. بۇل زەرتتەۋدى جۇرگىزۋ كەزىندە ساراپشىنىڭ ءىس-ارەكەتىن قاداعالاۋعا، سونداي-اق زەرتتەۋ كەزىندەگى بولۋى مۇمكىن اۋىتقۋلار تۋرالى ەسكەرتۋگە مۇمكىندىك بەرەدى. ساراپشىنىڭ ءىس-ارەكەتى مەن ارەكەتسىزدىگى جونىندە ەسكەرتەدى. جۇيەنىڭ وزىندە زەرتتەۋ جۇرگىزۋگە جانە «ادامنىڭ قاتەلىكتەرىن» بولدىرماۋعا مۇمكىندىك بەرەتىن فۋنكتسيا قاراستىرىلادى، - دەدى ەرلان سارسەمبايەۆ.