قازاقستاندا ءدارى-دارمەك ءوندىرىسى تومەندەپ بارادى

استانا. قازاقپارات - 2023 -جىلدىڭ قورىتىندىسىندا فارماتسەۆتيكا سەكتورىنداعى وتاندىق ءوندىرىس كولەمى تومەندەگەن. بۇل تۋرالى ۇكىمەت وتىرىسىندا پرەمەر-مينيستر ولجاس بەكتەنوۆ ايتتى.

«ەرەكشە نازار اۋداراتىن ماڭىزدى سالانىڭ ءبىرى - فارماتسەۆتيكا. وتكەن جىلدىڭ قورىتىندىسى بويىنشا وسى سەكتورداعى وتاندىق ءوندىرىستىڭ ۇلەسى 20 دان 14 پايىزعا دەيىن تومەندەپ كەتتى. دارىلىك زاتتارعا ىشكى سۇرانىس جىل سايىن ۇلعايىپ وتىر. ال، بىزدە ءوندىرىستىڭ بۇل سالاسى كەرىسىنشە تومەندەپ بارادى. مەملەكەت باسشىسى وتاندىق دارىلىك زاتتار مەن مەديتسينالىق بۇيىمداردىڭ ۇلەسىن 2025- جىلعا قاراي 50 پايىزعا دەيىن جەتكىزۋ مىندەتىن قويدى. ول ءۇشىن ءبىرقاتار ينۆەستيتسيالىق جانە سالىق پرەفەرەنسيالارى كوزدەلگەن، قاجەتتى مەملەكەتتىك قولداۋ قۇرالدارى بار»، - دەدى پرەمەر-مينيستر.

ۇكىمەت باسشىسىنىڭ ايتۋىنشا، فارماتسيەۆتيكا ونىمدەرىنە 10 جىلعا مەملەكەتتىك تاپسىرىسقا كەپىلدىك بەرۋ تەتىگى ارقىلى وتاندىق كاسىپورىندار جاڭا وندىرىستەردى ىسكە قوسۋعا نەمەسە قولدانىستاعى وندىرىستەردى جاڭارتۋعا مۇمكىندىك الادى.

«دەنساۋلىق ساقتاۋ مينيسترلىگى تەحنولوگيالار ترانسفەرتى جانە جاڭا وندىرىستەردى لوكاليزاتسيالاۋ ءۇشىن جاھاندىق فارماتسەۆتيكالىق كورپوراتسيالارمەن بايلانىستاردى كۇشەيتۋى كەرەك. سونىمەن قاتار بيىلعى 1- شىلدەدەن باستاپ دارىلىك زاتتاردى تاڭبالاۋدى جانە ولاردىڭ تىركەۋ كۋالىكتەرىن ەۋرازيالىق ەكونوميكالىق وداق تالاپتارىنا سايكەس كەلتىرۋى قاجەت. نارىققا قاتىسۋشىلار تاراپىنان دا بۇعان قاتىستى كوپتەگەن سۇراقتار تۋىنداپ وتىر. دەنساۋلىق ساقتاۋ مينيسترلىگى وسى ماسەلەنىڭ بايىبىن جان- جاقتى، دۇرىس ءتۇسىندىرىپ، رەفورمالاردىڭ ۋاقتىلى ىسكە اسىرىلۋىن قامتاماسىز ەتۋى قاجەت»، - دەدى ولجاس بەكتەنوۆ.

اۆتور
مارلان جيەمباي