قازاقستاندا ءبىر جىلدا سۋىق سۋدىڭ تاريفى قانشا پايىزعا ءوستى

استانا. KAZINFORM - ناۋرىز ايىندا ەل بويىنشا تۇرعىن ءۇيدى جالعا الۋ تولەمى 14,9 پايىز، جاڭا جەڭىل كولىك باعاسى 21,6 پايىز، كارتوپ باعاسى 66,4 پايىز، سۋىق سۋ تاريفى 88,4 پايىز وسكەن. بۇل تۋرالى ۇلتتىق ستاتيستيكا بيۋروسىنىڭ ناۋرىز ايىنداعى باعالار تۋرالى رەسمي مالىمەتىندە ايتىلعان.

رەسمي ستاتيستيكا بويىنشا، ناۋرىزداعى ينفلياتسيا 2024-جىلدىڭ ناۋرىزىنداعى كورسەتكىشتەن 10 پايىز جوعارى بولعان. ونىڭ ىشىندە اقىلى قىزمەتتەردىڭ باعاسى ءبىر جىلدا 14,3 پايىز، ازىق-تۇلىك ەمەس تاۋارلار قۇنى 9,1 پايىز، ازىق-تۇلىك تاۋارلاردىڭ باعاسى 7,6 پايىز وسكەن.

تاريفتەردىڭ ىشىندە اسىرەسە سۋىق سۋمەن جابدىقتاۋ قۇنى قاتتى كوتەرىلگەن - ءبىر جىلدا 88,4 پايىز. سونداي-اق سۋ بۇرۋ ءتاريفى 23,7 پايىز، ورتالىقتان جىلىتۋ تاريفى 19 پايىز، ىستىق سۋ تاريفى 14,6 پايىز، ەلەكتر ءتاريفى 14,3 پايىز، تۇرمىستىق گازدى قۇبىر ارقىلى تاراتۋ تاريفى 13,3 پايىز، قوقىس شىعارۋ ءتاريفى 11,1 پايىز، تۇرعىن ءۇيدى كۇتىپ ۇستاۋعا جۇمسالعان تولەم 11 پايىز وسكەن.

بايلانىس قىزمەتتەرىنىڭ باعاسى 13,9 پايىز، دەنساۋلىق ساقتاۋ قىزمەتتەرىنىڭ باعاسى 13,4 پايىز، كولىككە تەحنيكالىق قىزمەت كورسەتۋ جانە جوندەۋ باعاسى 12,9 پايىز، شاشتارازدارداعى باعا 12,6 پايىز، قوعامدىق ورىندا تاماقتانۋ قۇنى 11,3 پايىز ارتقان. ال تەمىر جول بيلەتى 23,6 پايىز، قالالىق اۆتوبۋسپەن قاتىناۋ 11,2 پايىز، ۇشاق بيلەتى 10 پايىز قىمباتتاعان. تۇرعىن ءۇيدى جالعا الۋ تولەمى 14,9 پايىز وسكەن.

ال زەرگەرلىك بۇيىمدار مەن ساعاتتار 26,6 پايىز، جاڭا جەڭىل اۆتوموبيل 21,6 پايىز، كىلەم 13,9 پايىز، كيىم مەن اياق كيىم 10,9 پايىز، جيھاز 10 پايىز، باللونعا قۇيىلعان سۇيىتىلعان گاز 23 پايىز، اعاش 14,8 پايىز قىمباتتاعان.

ازىق-تۇلىكتىڭ ىشىندە كارتوپ ەڭ قاتتى قىمباتتاعان - 66,4 پايىز.

سونىمەن قاتار پياز باعاسى 32,2 پايىز، قىرىققابات باعاسى 27,3 پايىز، مينەرالدى جانە اۋىز سۋ باعاسى 17,1 پايىز، كۇنباعىس مايىنىڭ قۇنى 16,8 پايىز، كونديتەرلىك ونىمدەر باعاسى 15 پايىز، قىزاناق باعاسى 14,9 پايىز، بانان باعاسى 14,6 پايىز، الكوگولدى ىشىمدىكتەر مەن تەمەكى ونىمدەرىنىڭ باعاسى 13 پايىز، سارى ماي باعاسى 12,2 پايىز، جەمىس جانە كوكونىس شىرىندارىنىڭ باعاسى 11,4 پايىز، سيىر ەتىنىڭ باعاسى 11,2 پايىز، بالىق جانە تەڭىز ونىمدەرىنىڭ باعاسى 10,6 پايىز وسكەن.

بىلتىرعى ناۋرىزدان بەرى تەك قاراقۇمىق جارماسى 17,7 پايىز، جۇمىرتقا 8,3 پايىز، ءسابىز 7,4 پايىز، كۇرىش 6,3 پايىز ارزانداعان.

ەسكە سالساق، جۋىردا عانا دۇنيەجۇزىلىك بانك قازاقستاننىڭ ەكونوميكالىق بەلسەندىلىگى 2025-جىلدىڭ باسىندا سەنىمدى ءوسىم كورسەتكەنىمەن، ينفلياتسيا تاۋەكەلى ساقتالاتىنىن ءمالىم ەتكەن ەدى.