قازاقستاندا بۇگىن - ەڭبەك كۇنى
بۇگىن، 24-قىركۇيەك ەلىمىزدە ەڭبەك كۇنى اتالىپ وتەدى، دەپ حابارلايدى قازاقپارات ءتىلشىسى.
بۇل مەرەكە 2013 -جىلى جۇمىسشى ماماندىقتارعا قۇرمەت كورسەتۋ ءداستۇرىن جاڭعىرتۋ جانە ەرتە جاستان ەڭبەكتىڭ ماڭىزدىلىعىن ءتۇسىنۋ ماقساتىندا قازاقستان رەسپۋبليكاسى پرەزيدەنتىنىڭ 2013 -جىلعى 22-قاراشاداعى №698-جارلىعىمەن بەكىتىلگەن. ەڭبەك كۇنى قىركۇيەكتىڭ سوڭعى جەكسەنبىسى اتاپ وتىلەدى.
ەلىمىزدە ەڭبەك ادامىنىڭ بەدەلىن ارتتىرۋ ماقساتىندا «ەڭبەك ارداگەرى» مەدالى مەن «قازاقستاننىڭ ەڭبەك ەرى» جوعارى ەرەكشەلىك بەلگىسى بەكىتىلگەن.
«ەڭبەك ارداگەرى» مەدالى جۇمىس ءوتىلى 40 جىلدان اسقان، ونىڭ 10 جىلىن ءبىر سالادا ىستەگەن، سونىمەن قاتار ەڭبەك قىزمەتىندە ەڭ ۇزدىك ناتيجەگە قول جەتكىزگەن، زەينەت جاسىنا جەتكەن ەكونوميكانىڭ ءتۇرلى سالالارىنىڭ جۇمىسشىلارى مەن تۇلعالارىنا بەرىلەدى.
«قازاقستاننىڭ ەڭبەك ەرى» جوعارى ەرەكشەلىك بەلگىسى ەلىمىزدىڭ ەكونوميكالىق جانە الەۋمەتتىك- گۋمانيتارلىق دامۋىندا ايرىقشا تابىسقا جەتكەن ازاماتتارعا تابىستالادى.
«قازاقستاننىڭ ەڭبەك ەرى» اتاعىن العان تۇلعا التىن جۇلدىز ايرىقشا ەرەكشەلىك بەلگىسى مەن «وتان» وردەنىنە يە بولادى. 2016 -جىلدان باستاپ ەلىمىزدە جىل سايىن ەڭبەك كۇنىنە جانە «ەڭبەك ادامىن» ماراپاتتاۋعا ارنالعان «ەڭبەك جولى» رەسپۋبليكالىق كونكۋرسى وتكىزىلەدى. بايقاۋ اتالىمدارىنىڭ ءبىرى - «جۇمىس ىستەيتىن جاستاردىڭ ۇزدىك تالىمگەرى».
بۇل اتالىمعا لاۋرەاتتاردىڭ ءارقايسىسىنىڭ 20 جىلدان استام ەڭبەك ءوتىلى بار. ولار وسى جىلداردىڭ ىشىندە جۇزدەگەن جاس ماماندى وقىتتى.
استانادا ەڭبەك كۇنىنە ارنالعان فورۋم اياسىندا جاستار اراسىندا جۇمىسشى ماماندىقتارىن ناسيحاتتاۋعا جانە ەڭبەك تاربيەسىن الدىڭعى ورىنعا قويعان اۋلەتتەردىڭ كوپجىلدىق ءداستۇرىن نىعايتۋعا باعىتتالعان «ەڭبەك جولى» رەسپۋبليكالىق كونكۋرسىنىڭ وڭىرلىك كەزەڭىنىڭ جەڭىمپازدارى ماراپاتتالدى.
مەملەكەت باسشىسى قاسىم-جومارت توقايەۆتىڭ «ادىلەتتى قازاقستاننىڭ ەكونوميكالىق باعدارى» اتتى قازاقستان حالقىنا بيىلعى جولداۋىندا ەل ازاماتتارىن قازاقستاندى قۋاتتى ءارى تابىستى ەلگە اينالدىرۋ ءۇشىن ەڭبەك ەتۋگە جانە ءوزىن ءوزى دامىتۋعا شاقىرعان بولاتىن.
«قازاقستان - ءبىزدىڭ جالعىز عانا وتانىمىز. ونىڭ ىرگەسى بەرىك، كەرەگەسى كەڭ، ءتورت قۇبىلاسى تۇگەل بولۋى - ءوز قولىمىزدا. بابالاردان ميراس بولعان ۇلان-عايىر جەردى قورعاۋ، ونى وركەندەتۋ - ءبىزدىڭ پەرزەنتتىك پارىزىمىز. مەن ەلىمىزدىڭ ءاربىر ازاماتىن وسى قاسيەتتى پارىزعا ادال بولۋعا شاقىرامىن. بەرەكەلى بىرلىگىمىزدى ساقتاپ، تاباندى ەڭبەك ەتسەك، وتانىمىزدى كوركەيتىپ، ۇرپاققا دامىعان مەملەكەت رەتىندە تابىستاساق، بابالار اماناتىنا ادالدىق دەگەن - وسى!»، - دەدى ەدى پرەزيدەنت.
ەلىمىزدە ەڭبەك كۇنىن كوپتەگەن كاسىپورىن مەن ەڭبەك ۇجىمدارى اتاپ وتەدى. مەرەكەگە وراي ءتۇرلى مۋزىكالىق كونسەرتتەر، ۇزدىك ەڭبەك تالىمگەرى، ۇزدىك جاس جۇمىسشى اتاقتارىنا ارنالعان تاقىرىپتىق بايقاۋلار جانە باسقا دا ءىس-شارالار وتەدى.
