قازاقستاندا بايگە اتتارىنىڭ باعاسى قانشا
استانا. KAZINFORM - ات باپتاپ، ونى بايگەگە قوساتىندار قازاقستاننىڭ بارلىق وڭىرىنەن، ءتىپتى شەتەلدەن سايگۇلىك ىزدەيدى. اسىل تۇقىمدى اتتىڭ قۇنى بىرنەشە ميلليون تەڭگە تۇرادى، دەپ حابارلايدى Kazinform ءتىلشىسى.
اسىل تۇقىمدى جىلقىلار
بايگەگە قانى تازا اسىل تۇقىمدى جىلقىلاردى قوسادى. جىلقىنىڭ بۇل ءتۇرىنىڭ مەكەنى - انگليا. ءاۋ باستا اعىلشىن اتتارى اتاۋى بولسا، الەمگە تاراعان سوڭ ول دا وزگەردى.
سونىمەن بىرگە بايگە اتتارى اراسىندا اسىل تۇقىمدى احالتەكە جىلقىلارى دا بار. ارعىماقتىڭ بۇل ءتۇرى اراب جانە قانى تازا اتتاردان قالىس قالمايدى.
قازاقستان يپپودرومدارىنان اراب جىلقىسىندا ءجيى كەزدەستىرۋگە بولادى.
باعاسى وزگەلەرگە قاراعاندا تومەن بولاتىن جىلقىنىڭ تاعى ءبىر ءتۇرى بار. ول - اعىلشىن- اراب تۇقىمى. اتى ايتىپ تۇرعانداي، ەكى تۇقىمنىڭ قانى ارالاسقان جىلقى.
قايدان جانە قالاي تاڭداۋعا بولادى
بايگەگە قوسار سايگۇلىكتى تابۋ قيىننىڭ قيىنى. تاڭداۋ كەزىندە بىرنەشە ەرەكشەلىگىنە نازار اۋدارۋ كەرەك. قاي تۇقىمنان ەكەنى ماڭىزدى. ەگەر ەركەگى نەمەسە ۇرعاشىسى بايگەدە توپ جارىپ جۇرگەن بولسا، سايكەسىنشە باعاسى دا جوعارى بولادى.
سونىمەن بىرگە باعا جىلقىنىڭ جاسىنا قاراي وزگەرىپ تۇرادى. 3-4 جاسار اتتار بايگەگە قوسۋعا جارامدى دەپ ەسەپتەلەدى. ەگەر بايگەگە قوسىپ، جۇلدەگى ورىندارعا يە بولسا، قۇنى ارتا تۇسەدى. قازاقستانداعى جارناما سايتتارىندا تەك سوعىمعا جانە باعۋعا ارنالعان جىلقى، كەيدە ءۇيىر ساتىلادى. ال اسىل تۇقىمدى اتتاردى ساتاتىن ادامدار ساناۋلى عانا. سوندىقتان بايگەگە ات قوساتىن ادامدار شەتەلدەن، ءتىپتى مۇحيتتىڭ ارعى جاعىنان سايگىلىكتى تاڭداپ اكەلەدى.
باعاسى قانشا
قازاقستاننان شىقپاي-اق ساتىپ الىپ، بايگەگە ات قوسقىڭىز كەلسە، 270-390 مىڭ تەڭگەدەن باستاۋعا بولادى. اعىلشىن- اراب جىلقىلارىنىڭ ەڭ ارزانىنىڭ قۇنى وسىنداي.
رەيتينگ بويىنشا ەكىنشى ورىندا اراب جىلقىسى تۇر. باعاسى ورتا ەسەپپەن 300 مىڭ تەڭگەدەن باستالىپ، 1500000 تەڭگەگە جەتەدى.
ال احالتەكە تۇقىمدى جىلقى باعاسى 550 مىڭ تەڭگەدەن باستالادى. ءتىپتى بايگەگە قوسىپ، جۇلدە الۋ ءۇشىن 2 ميلليون 200 مىڭ تەڭگە تولەۋ قاجەت بولادى. ءبىراق بۇل جىلقىلاردىڭ باعاسى ودان دا قىمبات بولۋى مۇمكىن.
ەڭ قىمباتى - قانى تازا جىلقى. ونىڭ باعاسى 250 مىڭ تەڭگەدەن باستالعانىمەن، قۇلىنىنىڭ قۇنى بايگەگە قوسۋعا جارامدى بولۋىنا بايلانىستى باعالانادى. ال اسىل تۇقىمدى جىلقىعا 2,5 ميلليون تەڭگە تولەۋ قاجەت.
اۆتور
التىناي ساعىندىقوۆا
