قازاقستاندا بانكتەردى مەملەكەتتىك قولداۋعا شەكتەۋ ەنگىزىلمەك
استانا. KAZINFORM - ءماجىلىس ءتوراعاسىنىڭ ورىنباسارى دانيا ەسپايەۆا بانكتەرگە مەملەكەتتىك قولداۋ جاساۋدا شەكتەۋ ەنگىزىلەتىنىن ايتتى.
- بيۋدجەت قاراجاتى ەسەبىنەن بانكتەرگە كومەك كورسەتۋ ماسەلەسى دەپۋتاتتار مەن قوعام تاراپىنان ۇنەمى سىنعا الىنىپ كەلەدى. پروبلەمالى بانكتەردى رەتتەۋدىڭ قولدانىستاعى تەتىكتەرى مەملەكەتتىڭ قاتىسۋىن شەكتەۋدەگى حالىقارالىق تاجىريبەنى ەسكەرە وتىرىپ جەتىلدىرۋدى تالاپ ەتەدى، - دەدى د. ەسپايەۆا پارلامەنت ماجىسىندە بانك قىزمەتى تۋرالى زاڭ جوباسىنىڭ تانىستىرىلىمى كەزىندە.
زاڭ جوباسىنا سايكەس، بانكتەر قارجىلىق جاعدايىن دەربەس قالپىنا كەلتىرەدى. بانكتەردىڭ تولەم قابىلەتسىزدىگىن شەشۋ ماسەلەسىندە مەملەكەتتىڭ قاتىسۋىنا شەكتەۋ ەنگىزىلدى.
- بۇل ءوز كەزەگىندە بيۋدجەت قاراجاتىن پايدالانۋدى شەكتەيدى، سونداي-اق مەملەكەتتىك قولداۋعا سۇيەنبەي، باسقارۋدى جاقسارتۋ جانە بانكتىڭ تۇراقتىلىعىن قالپىنا كەلتىرۋ ءۇشىن ىنتالاندىرۋ جاسايدى، - دەدى دەپۋتات.
مەملەكەتتىك قولداۋ تەك جۇيەلىك ماڭىزى بار بانككە عانا كورسەتىلەدى. ونى قارجى نارىعىن رەتتەۋ جانە دامىتۋ اگەنتتىگى مەن ۇلتتىق بانك انىقتايدى.
سونىمەن قاتار، مەملەكەتتىك قولداۋ بويىنشا مىندەتتەمەلەر تولىق وتەلگەنگە دەيىن، اكسيونەرلەر مەن باسشىلارعا ديۆيدەندتەر مەن اقشالاي وتەماقى تولەۋگە تىيىم سالىنادى.
ەسكە سالساق، بيىلعى جولداۋدا مەملەكەت باسشىسى قاسىم-جومارت توقايەۆ بانكتەر تۋرالى زاڭدى 2025 -جىلدىڭ اياعىنا دەيىن قابىلداۋ كەرەك ەكەنىن اتاپ ءوتتى.
اۆتور
رۋسلان عابباسوۆ
