قازاقستاندا ازيا دامۋ بانكىنىڭ جاڭا ديرەكتورى تاعايىندالدى
استانا. KAZINFORM - ازيا دامۋ بانكى ۋتساۆ كۋماردى قازاقستان بويىنشا جاڭا ديرەكتور ەتىپ تاعايىندادى. بۇل تۋرالى اتالعان بانكتىڭ باسپا ءسوز قىزمەتىنەن مالىمدەلدى.
ۋتساۆ كۋمار بۇل لاۋازىمعا بانكتى 2020-جىلدان بەرى باسقارىپ كەلگەن ناريمان ماناپبەكوۆتىڭ ورنىنا كەلدى جانە جاقىندا ازيا دامۋ بانكى ورتالىق جانە باتىس ازيا دەپارتامەنتىنىڭ كەڭەسشىسى بولىپ تاعايىندالدى.
ازيا دامۋ بانكىنىڭ باسپا ءسوز قىزمەتى اتاپ وتكەندەي، ۋتساۆ كۋمار بانكتىڭ وپەراتسيالارىنا باسشىلىق جاسايدى، ونىڭ ۇكىمەتپەن جانە باسقا دا مۇددەلى تاراپتارمەن قارىم-قاتىناسىن نىعايتادى. سونىمەن قاتار ازيا دامۋ بانكىنىڭ 2023-2027-جىلدارعا ارنالعان ارىپتەستىك ستراتەگياسىن ىسكە اسىرۋعا جەتەكشىلىك ەتەدى. ستراتەگيا - مەملەكەتتىك جانە جەكە سەكتورلاردىڭ ينۆەستيتسيالارى، ءبىلىم جانە ينستيتۋتسيونالدىق دامۋ سالاسىنداعى يننوۆاتسيالىق شەشىمدەر ەسەبىنەن تۇراقتى جانە ينكليۋزيۆتى وسۋگە قول جەتكىزۋگە كومەك كورسەتۋگە باعىتتالعان.
«ازيا دامۋ بانكى 30 جىل بويى قازاقستاننىڭ دامۋ سالاسىنداعى سەنىمدى سەرىكتەسى. مەن ەل دامۋىنىڭ باسىمدىقتارىن قولداۋ ءۇشىن ءبىزدىڭ بەرىك سەرىكتەستىگىمىزدى نىعايتۋدى جانە ۇكىمەت، جەكە سەكتور جانە باسقا دا مۇددەلى تاراپتارمەن تىعىز جۇمىس ىستەۋدى اسىعا كۇتەمىن. ءبىز قازاقستانعا كليماتتىڭ وزگەرۋى مەن ەكونوميكانى دەكاربونيزاتسيالاۋ سالدارىن ەڭسەرۋدە، ينكليۋزيۆتى ەكونوميكالىق وسۋگە جاردەمدەسۋدە جانە مەملەكەتتىك باسقارۋدى نىعايتۋدا كومەك كورسەتۋدى جالعاستىرامىز»، - دەدى ۋتساۆ كۋمار.
ونىڭ 18 جىلدىق حالىقارالىق تاجىريبەسى بار، ونىڭ ىشىندە ازيا دامۋ بانكىندە 11 جىلدان اسا ەڭبەك ەتىپ كەلەدى. قازاقستاندا لاۋازىمدى قىزمەتكە تاعايىندالعانعا دەيىن ول شري-لانكاداعى ازيا دامۋ بانكىنىڭ ەل ديرەكتورىنىڭ ورىنباسارى قىزمەتىن اتقاردى. ۋ. كۋمار ەلدىك باعدارلامالار، ءبىلىم جانە ەكونوميكا بويىنشا جۇمىستى باسقاردى، سونىمەن قاتار كليەنتتەرمەن ءوزارا ارەكەتتەسۋدىڭ جانە دامۋ سەرىكتەستەرىن ۇيلەستىرۋدىڭ ءارتۇرلى اسپەكتىلەرىن باسقارۋعا كومەكتەستى.
ۋتساۆ كۋمار - ءۇندىستان ازاماتى، ا ق ش- تاعى كوللەدج پاركىندە مەريلەند ۋنيۆەرسيتەتىنىڭ ەكونوميكا عىلىمدارىنىڭ دوكتورى جانە ماگيسترى، ءۇندىستانداعى دەلي ۋنيۆەرسيتەتىنىڭ ەكونوميكا ماگيسترى جانە باكالاۆرى.
