قازاقستاندا اۋىر كولىكتەرگە اۆتوجولدا جۇك تاسىمالداۋعا تىيىم سالىنباق

استانا. KAZINFORM - كارەردە جۇرۋگە ارنالعان HOWO جانە SHACMAN كولىكتەرىنە ەلىمىزدىڭ جولدارىندا جۇك تاسىمالداۋعا تىيىم سالىنادى. بۇل تۋرالى ق ر كولىك ءمينيسترى مارات قارابايەۆ ءمالىم ەتتى.

Жүк көліктері
Фото: Максат Шагырбаев/ Kazinform

ءماجىلىستىڭ جالپى وتىرىسىندا دەپۋتاتتار اۆتوجولداردى كۇتىپ ۇستاۋ ماسەلەسىنە قاتىستى سۇراق قويدى.

ءوز كەزەگىندە م. قارابايەۆ جولداردى كۇتىپ ۇستاۋدا ءۇش باسىم باعىتقا ەكپىن قويىلعانىن ايتتى.

«بىرىنشىدەن، 25 مىڭ شاقىرىم رەسپۋبليكالىق جولدى كۇتىپ ۇستاۋ ءۇشىن جىلىنا 80 ميلليارد تەڭگە قاراجات قاجەت. وكىنىشكە قاراي، بۇل سومانى تولىق بولە المايمىز، 35 ميلليارد تەڭگەسى عانا باعىتتالادى. قالعان اقشانى قازىر اقىلى جولدان تۇسەتىن قاراجات ەسەبىنەن باعىتتاپ جاتىرمىز. ەكىنشىدەن، جولدار جاقسى جاعدايدا بولۋى ءۇشىن ءتيىستى جابدىقتار مەن تەحنيكا كەرەك. نورماتيۆ بويىنشا 3600 تەحنيكا قاجەت بولسا، سونىڭ 2,5 مىڭى بار، ياعني 1100 تەحنيكا جەتپەيدى. سوندىقتان بىلتىر 350 تەحنيكا جانە بيىل تاعى 350 تەحنيكانى ساتىپ الدىق. بۇل ءوز كەزەگىندە جولدى كۇتىپ ۇستاۋعا ەلەۋلى ىقپال ەتەدى»، - دەدى مينيستر.

سونىمەن قاتار ول جولدى كوبىنە اۋىر جۇك كولىكتەرى بۇزىپ جاتقانىن ايتتى.

«ۇشىنشىدەن، جۇكتى شامادان تىس ارتىق جۇك تيەگەن اۋىر كولىكتەر جولعا زالال كەلتىرىپ وتىر. 25 مىڭ شاقىرىم جولدا نەبارى 18 عانا ولشەۋ قۇرالى ورناتىلعان. ءبىزدىڭ ماقساتىمىز - قوسىمشا 220 ولشەۋ ستانسياسىن ەل اۋماعىندا ورناتۋ. بيىل 20 قۇرىلعى قويىلادى. وسى ءۇش باسىم باعىت جولدى كۇتىپ ۇستاۋعا مۇمكىندىك بەرەدى»، - دەدى م. قارابايەۆ.

ۆەدومستۆو باسشىسى جۇك كولىكتەرىن باقىلايتىن جاڭا جۇيە تامىز ايىندا ىسكە قوسىلاتىنىن ايتتى.

«اتالعان 18 ولشەۋ كامەراسىنا توقتالساق، بۇل جۇيە اۆتوماتتاندىرىلعان. «سەرگەك» سياقتى ءبىزدىڭ ولشەۋ جۇيەمىز سۋرەتكە ءتۇسىرىپ، ايىپپۇلدى تاسىمالداۋشىعا جولداپ وتىرادى. ءتيىستى زاڭ سەناتتا ماقۇلدانعاننان كەيىن، جۇيەنى بيىل تامىز ايىندا ىسكە قوسۋ جوسپارلانعان. استانانىڭ ماڭىندا 29 كارەر بار. ەلورداعا كىرەتىن 6 جولدا وسىنداي كامەرا قويدىق. HOWO جانە SHACMAN (قىتايدا وندىرىلەتىن كولىكتەر) كولىكتەرى اۋىر جۇك تاسىمالداۋعا ارنالعان. شەتەلدە مۇنداي كولىكتەر تەك كارەردە جۇرەدى. بۇل تاقىرىپ بويىنشا پارلامەنتكە زاڭنامالىق ۇسىنىسپەن كەلمەكپىز. ەلىمىزدە 60 مىڭعا جۋىق وسىنداي جۇك كولىگى بار. ولارعا اۆتوجولدا جۇرۋگە مۇلدەم تىيىم سالۋ ۇسىنىلىپ وتىر. ياعني، ولارعا جۇكپەن جولدا جۇرۋگە تىيىم سالىنباق. ەگەر كرەرگە بارۋ كەرەك بولسا، وندا وسى اۋىر كولىكتەر جولدا تەك جۇكسىز ءجۇرۋى ءتيىس. بۇل زاڭنامالىق ۇسىنىستاردى ەنگىزبەكپىز. وسى ارقىلى جولداعى اۋىر جۇكتى مۇلدەم توقتاتپاقپىز»، - دەدى مارات قارابايەۆ.

بۇل تۇرعىدا ءماجىلىس ءتوراعاسى ەرلان قوشانوۆ اۋىر جۇك كولىكتەرىنە قاتىستى پىكىر ءبىلدىردى.

«جولدىڭ ساپاسىنا وسى جۇك كولىكتەرى اسەر ەتىپ وتىرعانىن ءبارىمىز بىلەمىز. ولاردىڭ ءبارى جولداردا باقىلاۋسىز ءجۇرىپ جاتىر. سەبەبى ولشەيتىن قۇرالدار ءتيىستى دەڭگەيدە قامتىماي وتىر. سونىمەن قاتار، موبيلدى بەكەتتەر دە جوق»، - دەدى ە. قوشانوۆ.

اۆتور

رۋسلان عابباسوۆ

سوڭعى جاڭالىقتار