قازاقستاندا اۆتوۆوكزالدارعا قويىلاتىن تالاپتار وزگەردى

استانا. KAZINFORM — قازاقستاندا اۆتوۆوكزالدار مەن اۆتوستانتسيالارعا جانە جولاۋشىلار تاسىمالى بويىنشا تالاپتار بەلگىلەندى.

ق ر سيم تەحنيكالىق رەتتەۋ جانە مەترولوگيا كوميتەتى ۇلتتىق ستاندارتتاردى بەكىتتى. اتاپ ايتقاندا:

— ق ر س ت 2271-2020 «ساپارجايلاردىڭ، اۆتوستانتسيالاردىڭ جانە جولاۋشىلارعا قىزمەت كورسەتۋ پۋنكتتەرىنىڭ قىزمەتتەرى»؛

— ق ر س ت 2272-2020 «تاكسيمەن تاسىمالداۋ بويىنشا اۆتوكولىك قىزمەتتەرى. جالپى تالاپتار»؛

— ق ر س ت 2273-2020 «تۇراقتى جانە تۇراقتى ەمەس جولاۋشى تاسىمالدارى بويىنشا اۆتوكولىك قىزمەتتەرى. جالپى تالاپتار»؛

ستاندارتتاردى ق ر كولىك مينيسترلىگىنىڭ باستاماسىمەن «قازاقستان ستاندارتتاۋ جانە مەترولوگيا ينستيتۋتى» ازىرلەدى.

سونىمەن ق ر س ت 2271-2024 «ساپارجايلاردىڭ، اۆتوستانتسيالاردىڭ جانە جولاۋشىلارعا قىزمەت كورسەتۋ پۋنكتتەرىنىڭ قىزمەتتەرى» ۇلتتىق ستاندارتىنا سايكەس:

— اۆتوۆوكزالدار مەن اۆتوستانتسيالار اۆتوموبيل تاسىمالداۋشىلارىمەن، ونىڭ ىشىندە اۆتوتاسىمالداۋشىلار پالاتاسىنىڭ مۇشەلەرىمەن شارت بولعان كەزدە اۆتوبۋستاردى رەيس الدىنداعى تەحنيكالىق تەكسەرۋدى ۇيىمداستىرۋعا ءتيىس.

— اۆتوۆوكزالداردا اۆتوبۋس جۇرگىزۋشىلەرى ەكيپاجدارىنىڭ ۇزاق (تۇنگى) دەمالىسىن ۇيىمداستىرۋعا ارنالعان ءۇي-جايلار بولۋى ءتيىس جانە ت. ب.

ال ق ر س ت 2272-2024 جاڭا ستاندارتقا سايكەس «تاكسيمەن تاسىمالداۋ بويىنشا اۆتوكولىك قىزمەتتەرى. جالپى تالاپتار» اۆتوموبيل تاسىمالداۋشىلار پالاتاسىنىڭ ەرەجەلەرى مەن ستاندارتتار تالاپتارىنا سايكەس جابدىقتالعان جەڭىل سەريالى اۆتوموبيلدەرمەن جۇزەگە اسىرىلادى. سونداي- اق، مۇگەدەكتىگى بار ادامدار ءۇشىن تاكسي تاسىمالدارىنىڭ قولجەتىمدىلىگى، ونىڭ ىشىندە مۇگەدەكتىگى بار ادامداردى تاسىمالداۋعا ارنالعان ارنايى تۇرلەندىرىلگەن اۆتوموبيلدەر، قاجەتتى احۋالدىق كومەك كورسەتۋ، باگاجدى تيەۋ جانە ءتۇسىرۋ، سونىمەن قاتار مۇگەدەكتىگى بار ادامداردىڭ تىنىس-تىرشىلىگىن جانە ءجۇرىپ-تۇرۋىن قامتاماسىز ەتۋگە ارنالعان جابدىقتار جانە باسقا دا جاعدايلار كورسەتىلگەن.

بۇدان بولەك، ق ر س ت 2273-2024 «تۇراقتى جانە تۇراقتى ەمەس جولاۋشى تاسىمالدارى بويىنشا اۆتوكولىك قىزمەتتەرى. جالپى تالاپتار» تاسىمالداۋشىعا، سونداي- اق كولىك قۇرالىن دايىنداۋشىنىڭ تەحنيكالىق قۇجاتتاماسىنىڭ تالاپتارىنا، «دوڭعالاقتى كولىك قۇرالدارىنىڭ قاۋىپسىزدىگى تۋرالى» تەحنيكالىق رەگلامەنتىنە جانە ق ر س ت 41.36، ق ر س ت 41.52 ۇلتتىق ستاندارتتارىنا سايكەس كەلەتىن اۆتوبۋستارعا قويىلاتىن تالاپتاردى بەلگىلەيدى. سونداي-اق ستاندارتتار اۆتوبۋستاردى شۇعىل جەدەل قىزمەتتەردى شاقىرۋ قۇرىلعىسىمەن جابدىقتاۋدى كوزدەيدى.

— بۇل وزگەرىستەر قازاقستانداعى جول قوزعالىسىنىڭ بارلىق قاتىسۋشىلارى ءۇشىن جوعارى دەڭگەيدەگى جايلىلىق پەن قاۋىپسىزدىكتى قالىپتاستىرۋعا باعىتتالعان، — دەپ ءتۇسىندىردى ۆەدومستۆو.

ەسكە سالساق، قىزىلوردادا زاماناۋي ۇلگىدەگى جاڭا اۆتوۆوكزال پايدالانۋعا بەرىلگەنى حابارلاندى.