قازاقستاندا اۆتوكولىكتەردى تەحنيكالىق بايقاۋ پروتسەدۋراسى وزگەرەدى
استانا. KAZINFORM - كولىك ءمينيسترى مارات قارابايەۆ اۆتوكولىكتەردى تەحنيكالىق بايقاۋ پروتسەدۋراسىنىڭ وزگەرۋ سەبەپتەرىن ءتۇسىندىردى.
«اۆتوكولىكتى تەحنيكالىق بايقاۋ پروتسەدۋراسى وزگەرەدى، ءبىراق مەحانيزمى وزگەرىسسىز قالادى. وزگەرىس تەحنيكالىق بايقاۋدى «قازاۆتوجول» كومپانياسىنا بەرۋمەن قاتىستى ەمەس، ءبىز قابىلدايتىن نورماتيۆتىك قۇجاتتارعا بايلانىستى. زاڭ 10 -مامىردا ءماجىلىستىڭ جالپى وتىرىسىنىڭ ەكىنشى وقىلىمىندا قابىلداندى. باقىلاۋ قىزمەتكەرلەرى بارلىق جابدىقتىڭ بار-جوعىن تەكسەرىپ، رۇقسات بەرەدى. بىزدە 900-گە جۋىق ورتالىق بار، ولار قايتا بىلىكتىلىكتەن وتەدى. بۇل كولىك قۇرالدارىنىڭ قاۋىپسىزدىگىن قامتاماسىز ەتۋ ءۇشىن جاسالىپ وتىر»، - دەدى ءماجىلىس الاڭىندا ب ا ق وكىلدەرىنىڭ ساۋالىنا جاۋاپ بەرگەن مارات قارابايەۆ.
سونداي-اق مينيسترگە اۆتوكولىكتى تەحنيكالىق بايقاۋ قۇنى قىمباتتاۋى مۇمكىن بە دەگەن ساۋال قويىلدى.
«بۇل - ەركىن نارىق. تەحنيكالىق بايقاۋداعى تەحنولوگيالار بولىگى وزگەرمەيدى، ياعني، ورتالىقتار ءۇشىن قوسىمشا تالاپتار قويىلمايدى. ەگەر ولاردا بۇرىن جابدىق بولماسا، دەمەك ولار زاڭسىز جۇمىس ىستەپ كەلدى دەگەن ءسوز»، - دەيدى ۆەدومستۆو باسشىسى.
اۆتور
داۋلەت ىزتىلەۋ
