قازاقستاندا العاش رەت ارتىستەرگە ارنالعان وڭالتۋ ورتالىعى اشىلدى
استانا. KAZINFORM - مادەنيەت جانە اقپارات مينيسترلىگى «استانا وپەرا» تەاتر سالاسىندا جاڭا ستاندارتتاردى ەنگىزۋدى جالعاستىرىپ جاتقانىن مالىمدەدى.
العاش رەت قازاقستاندا تەاتر جانىنان ارتىستەر مەن تەحنيكالىق ۇجىمنىڭ بەلسەندى فيزيكالىق قوزعالىستان جانە جاراقاتتاردان كەيىن قالپىنا كەلۋى ءۇشىن مامانداندىرىلعان كومەك الاتىن وڭالتۋ كابينەتى پايدا بولدى. يگى باستامانىڭ ىسكە اسۋىنا ق ر مادەنيەت جانە اقپارات مينيسترلىگى مەن «سامۇرىق-قازىنا» قورى قولداۋ كورسەتتى.
تەاتر - ءارتىستىڭ جان-تانىمەن بەرىلۋىن تالاپ ەتەتىن ونەر. ءاربىر سپەكتاكلدى ساحنالاۋ ءۇشىن بىرنەشە اي بويى دايىندىقتار قاجەت. كەيدە ولار بەلسەندى فيزيكالىق جۇمىستان كاسىبي جاراقاتتار دا الادى. وسى ۋاقىتقا دەيىن قازاقستاندىق ارتىستەر دەنساۋلىعىنا ءوز بەتىنشە قاراپ نەمەسە جالپى بەيىندىك ەمحانالارعا جۇگىنەتىن.
ەندى وڭالتۋ كابينەتى اشىلعان سوڭ، كاسىبي كومەك قولجەتىمدى بولا تۇسپەك. كابينەت بۇلشىقەتتى قالپىنا كەلتىرۋگە، اۋىرسىنۋدى باسۋعا جانە ءتۇرلى ەم-شارالار جاساۋعا ارنالعان زاماناۋي قۇرالدارمەن جابدىقتالعان. ءدال وسى جەردە ارتىستەردىڭ قالىپتى جۇمىسىنا تەزىرەك ورالۋى ءۇشىن ولارعا قالاي كومەكتەسۋدى بىلەتىن رەابيليتولوگ ماماننىڭ كەڭەسىن الۋعا بولادى.
وڭالتۋ كابينەتىنىڭ اشىلۋى - تەاتر ومىرىندەگى جاڭا كەزەڭنىڭ بەلگىسى. ساحنادا كاسىبي ونەرىمەن حالىقتىڭ ىقىلاسىنا بولەنىپ، ءساتتى ونەر كورسەتىپ جۇرگەن «استانا وپەرا» يننوۆاتسيالىق باستاما جاسادى. مۇنداي قادام ساحناداعى بارلىق ونەرپازدىڭ ەڭبەگىنە دەگەن قۇرمەتتى كورسەتەدى. سونداي-اق ساحنادا اسەرلى ونەر كورسەتكەن ءار ءارتىستىڭ ارتىندا قاجىرلى ەڭبەك، دەنساۋلىق پەن جانكەشتىلىك تۇرعانىن ەسكە سالادى.
ەندى تەاتر ارتىستەرى دەنساۋلىعىن بىلىكتى مامانعا تاپسىرىپ، بار كۇش-جىگەرىن باستى ماقسات - شىعارماشىلىققا ارناي الادى.
قازاق ارتىستەرى قىتايدا ونەر كورسەتكەنىن جازعان بولاتىنبىز.
