قازاقستاندا اۋا رايى كۇرت وزگەرەدى
استانا. KAZINFORM - «قازگيدرومەت» سينوپتيكتەرى 15، 16-جانە 17-مامىردا قازاقستاندا قانداي اۋا رايى بولاتىنىن بولجادى.
مەزگىل باسىندا يران ايماقتارىنان كەلەتىن جىلى اۋا ماسسالارى قازاقستاننىڭ كوپ بولىگىندە ىستىق ءارى جاۋىن-شاشىنسىز كۇن رايىن ساقتاپ تۇرادى. كۇندىز تەرمومەتر باعاندارى وڭتۇستىك وڭىرلەردە 35-44 گرادۋسقا دەيىن، سولتۇستىك، ورتالىق جانە شىعىس وڭىرلەردە 35-37 گرادۋسقا دەيىن كوتەرىلەدى. اباي مەن ۇلىتاۋ وبلىستارىنىڭ وڭتۇستىگىندە، سونداي-اق قاراعاندى وبلىسىندا 40 گرادۋسقا دەيىن وتە قاتتى ىستىق كۇتىلەدى.
ىستىقتىڭ ورنىن جاڭبىر باسادى
الايدا 16-مامىردا باتىس، سولتۇستىك-باتىس جانە سولتۇستىك وڭىرلەرگە اتموسفەرالىق فرونتتاردىڭ اسەرى ءتيىپ، نايزاعايلى، بۇرشاقتى جاڭبىر جاۋادى. ماڭعىستاۋ وبلىسىندا قاتتى جاڭبىر بولۋى مۇمكىن.
«17-مامىردا قازاقستاننىڭ كوپ بولىگىندە نايزاعايلى، بۇرشاقتى جاڭبىر جاۋادى. كەي وڭىرلەردە قاتتى جاۋىن مەن داۋىلدى جەل بولادى. سوعان بايلانىستى ەلدىڭ سولتۇستىك بولىگىندە كۇندىزگى تەمپەراتۋرا 18-28 گرادۋسقا دەيىن تومەندەيدى. دەگەنمەن، وڭتۇستىك ايماقتاردا 43 گرادۋسقا دەيىنگى ىستىق ساقتالادى»، - دەدى سينوپتيكتەر.
ەل بويىنشا جەل كۇشەيىپ، وڭتۇستىك وڭىرلەردە شاڭدى داۋىل سوعۋى مۇمكىن.
بۇعان دەيىن «قازگيدرومەت» مامىر ايىندا قازاقستاندىقتاردى قانداي اۋا رايى كۇتىپ تۇرعانىن مالىمدەگەن. سينوپتيكتەردىڭ ايتۋىنشا، كوكتەمنىڭ سوڭعى ايىندا اۋا تەمپەراتۋراسى ەلىمىزدىڭ كوپ بولىگىندە كليماتتىق نورمادان 1 گرادۋسقا جوعارى بولادى.
