قازاقستاندا 6-شىلدەدە ءورت قاۋپى مەن اپتاپ ىستىق كۇشەيەدى
استانا. قازاقپارات – 6-شىلدەدە تسيكلون جانە اتموسفەرالىق فرونتالدى بولىمدەردىڭ اسەرىنەن قازاقستان اۋماعىنىڭ باسىم بولىگىندە اۋا رايىنىڭ تۇراقسىز سيپاتى ساقتالادى، دەپ حابارلايدى قازگيدرومەت.
سينوپتيكتەردىڭ بولجاۋىنشا، نايزاعاي ويناپ، جاڭبىر جاۋادى، ەلدىڭ سولتۇستىگى مەن شىعىسىندا قاتتى جاڭبىر جاۋۋى مۇمكىن. كەيبىر وڭىرلەردە بۇرشاق ءتۇسۋ ىقتيمالدىعى بار. رەسپۋبليكا بويىنشا جەلدىڭ كۇشەيۋى بولجانىپ وتىر، سولتۇستىك پەن شىعىستا داۋىل تۇرۋى، سولتۇستىك- باتىس پەن سولتۇستىكتە تۇنگى جانە تاڭەرتەڭگى ۋاقىتتاردا تۇمان ءتۇسۋى مۇمكىن.
تەك ەلدىڭ وڭتۇستىگىندە، وڭتۇستىك- شىعىسىندا جانە ورتالىعىندا انتيتسيكلون سىلەمىنىڭ ىقپالىمەن جاۋىن-شاشىنسىز اۋا رايى كۇتىلەدى.
سونداي-اق بىرنەشە وڭىردە ءورت قاۋپى جوعارىلايدى. اتاپ ايتقاندا، ماڭعىستاۋ وبلىسىندا، اتىراۋ وبلىسىنىڭ باتىسى مەن وڭتۇستىگىندە، الماتى وبلىسىنىڭ وڭتۇستىگى مەن شىعىسىندا، اقمولا وبلىسىنىڭ باتىسىندا، شىعىس قازاقستان وبلىسىنىڭ وڭتۇستىگىندە، اقتوبە وبلىسىنىڭ وڭتۇستىگى مەن وڭتۇستىك- شىعىسىندا، ۇلىتاۋ وبلىسىنىڭ ورتالىعىندا جوعارى ءورت قاۋپى ساقتالادى.
ال جامبىل، قىزىلوردا، تۇركىستان، جەتىسۋ وبلىستارىندا، الماتى وبلىسىنىڭ سولتۇستىگى، باتىسى مەن ورتالىعىندا، قاراعاندى جانە ۇلىتاۋ وبلىستارىنىڭ باتىسى، شىعىسى مەن وڭتۇستىگىندە، اقتوبە وبلىسىنىڭ ورتالىعىندا، ماڭعىستاۋ وبلىسىنىڭ سولتۇستىك-باتىسىندا، قوستاناي وبلىسىنىڭ وڭتۇستىك- باتىسىندا جانە اباي وبلىسىنىڭ وڭتۇستىگىندە توتەنشە ءورت قاۋپى بولجانادى.
كۇندىز كەيبىر وڭىرلەردە قاتتى ىستىق كۇتىلەدى: الماتى وبلىسىندا – 35 گرادۋس، اتىراۋ وبلىسىندا - 35-36 گرادۋس، جەتىسۋ وبلىسىنىڭ شىعىسى، سولتۇستىگى مەن وڭتۇستىگىندە - 35-37 گرادۋس، تۇركىستان وبلىسىنىڭ وڭتۇستىگىندە - 40 گرادۋس، ۇلىتاۋ وبلىسىنىڭ وڭتۇستىگىندە – 35 گرادۋس، اقتوبە وبلىسىنىڭ وڭتۇستىگىندە 35-36 گرادۋسقا دەيىن ىسيدى.
