قازاقستاندا 250 دەن استام سيفرلىق جوبا ىسكە اسىرىلدى
استانا. KAZINFORM - قازاقستاندا سيفرلىق جوبالاردى قارجىلاندىرۋدىڭ جاڭا تەتىگى ەنگىزىلىپ، ونىڭ ناتيجەسىندە 250 دەن استام جوبا ىسكە اسىرىلدى. بۇل تۋرالى ۇكىمەت وتىرىسىندا پرەمەر-ءمينيستردىڭ ورىنباسارى - جاساندى ينتەللەكت جانە سيفرلىق دامۋ ءمينيسترى جاسلان ماديەۆ ءمالىم ەتتى.
ءمينيستردىڭ ايتۋىنشا، مەملەكەتتىك قولداۋ شارالارىنىڭ اشىقتىعى مەن تيىمدىلىگىن ارتتىرۋ ماقساتىندا astanahub.com پلاتفورماسى نەگىزىندە ۇلتتىق يننوۆاتسيالىق جۇيەنىڭ ءبىرىڭعاي تەرەزەسى ىسكە قوسىلعان.
- قازاقستاندا العاش رەت عىلىمي ينفراقۇرىلىم دەرەكتەرى تولىق سيفرلاندىرىلدى. قازىرگى تاڭدا پلاتفورمادا 2000 نان استام IT كومپانيا، 100 دەن استام ونەركاسىپ كاسىپورنى جانە 900 دەن استام عىلىمي ۇيىم مەن زەرتحانا بىرىكتىرىلگەن. 2025 -جىلى پورتالعا 1,7 ميلليون پايدالانۋشى كىرىپ، جالپى قارالىم سانى 35 ميلليوننان استى، - دەدى جاسلان ماديەۆ.
ونىڭ سوزىنشە، سيفرلىق جوبالاردى قارجىلاندىرۋدىڭ تۇراقتى تەتىگى قالىپتاسقان.
- جەر قويناۋىن پايدالانۋشىلاردىڭ %1 اۋدارىمدارى ەسەبىنەن 120 دان استام كاسىپورىن قامتىلىپ، 250 دەن استام سيفرلىق جوبا ىسكە اسىرىلدى. بۇل جوبالاردى جۇزەگە اسىرۋعا 280 گە جۋىق وتاندىق IT كومپانيا تارتىلدى. جالپى قارجىلاندىرۋ كولەمى 32 ميلليارد تەڭگەنى قۇرادى، - دەدى مينيستر.
مينيستر ناقتى جوبالاردىڭ ناتيجەسىنە دە توقتالدى. ونىڭ ايتۋىنشا، قىزىلوردا وبلىسىندا ەنگىزىلگەن «سيفرلىق كەن ورنى» جوباسى مۇناي الۋ كوەففيتسيەنتىن %92 عا دەيىن ارتتىرعان. سونىمەن قاتار شىعىندار %10 عا قىسقارىپ، باسقارۋ تيىمدىلىگى %20 عا وسكەن.
ال اباي وبلىسىندا ەنگىزىلگەن پوزيتسيالاۋ جۇيەسى ءوندىرىس الاڭىنداعى قىزمەتكەرلەردىڭ ورنالاسقان جەرىن 1 مەترگە دەيىنگى دالدىكپەن انىقتاۋعا مۇمكىندىك بەرەدى. بۇل ءوز كەزەگىندە وندىرىستەگى قاۋىپسىزدىكتى ارتتىرۋعا ىقپال ەتەدى.
جاسلان ماديەۆتىڭ سوزىنشە، سيفرلىق جوبالاردى قارجىلاندىرۋ تەتىگى الداعى ۋاقىتتا ودان ءارى جەتىلدىرىلەدى.
- جاڭارتىلعان تاسىلگە سايكەس، قارجىنىڭ %0,5 ى Astana Hub ارقىلى سيفرلاندىرۋعا، ال تاعى %0,5 ى عىلىمي- زەرتتەۋ جۇمىستارىنا باعىتتالادى. بارلىق پروتسەستەردىڭ اشىقتىعى ءبىرىڭعاي تەرەزە ارقىلى ونلاين رەجيمدە قامتاماسىز ەتىلەدى. سونىمەن قاتار مونيتورينگ جۇيەسى جاساندى ينتەللەكت قۇرالدارى ارقىلى كۇشەيتىلەدى، - دەدى ول.
ايتا كەتەيىك، بۇعان دەيىن جاسلان ماديەۆ يننوۆاتسيالىق جوبالارعا سالىنعان ءاربىر تەڭگە ەكى ەسە قايتارىم بەرىپ وتىرعانىن مالىمدەگەن ەدى.
