قازاقستاندا 2026 -جىلى قانشا ازامات اسكەرگە بارادى
استانا. KAZINFORM - پرەزيدەنتتىڭ اسكەري قىزمەتشىلەردى زاپاسقا بوساتۋ جانە ازاماتتاردى كەزەكتى مەرزىمدى اسكەري قىزمەتكە شاقىرۋ تۋرالى جارلىعىن ىسكە اسىرۋ ماقساتىندا ۇكىمەت قاۋلىسى قابىلداندى.
قۇجاتقا سايكەس، 2026 -جىلعى ناۋرىز - ماۋسىم جانە قىركۇيەك - جەلتوقسان ايلارىندا 18-27 جاس ارالىعىنداعى، كەيىنگە قالدىرۋعا نەمەسە اسكەرگە شاقىرۋدان بوساتىلۋعا قۇقىعى جوق 43231 ەر ازامات مەرزىمدى اسكەري قىزمەتكە شاقىرىلادى.
وبلىستاردىڭ، استانا، الماتى جانە شىمكەنت قالالارىنىڭ اكىمدەرىنە شاقىرۋ كوميسسيالارىنىڭ جۇمىسىن ۇيىمداستىرۋ، سونداي-اق اسكەرگە شاقىرۋ ناۋقانىن بەلگىلەنگەن مەرزىمدە وتكىزۋ تاپسىرىلدى. سونىمەن بىرگە شاقىرۋ پۋنكتتەرىن زاڭناما تالاپتارىنا ساي مەديتسينالىق قىزمەتپەن قامتاماسىز ەتۋ مىندەتتەلدى.
ىشكى ىستەر مينيسترلىگىنە اسكەرگە شاقىرىلۋشىلاردى جيناۋ جانە اسكەرگە اتتاندىرۋ ورىندارىندا قوعامدىق ءتارتىپتى كۇشەيتۋ جۇكتەلدى.
كولىك مينيسترلىگى قورعانىس مينيسترلىگىنىڭ وتىنىمدەرى نەگىزىندە مەرزىمدى اسكەري قىزمەتكە شاقىرىلعان ازاماتتار مەن زاپاسقا بوساتىلعان اسكەري قىزمەتشىلەردى قارۋلى كۇشتەرگە، ىشكى ىستەر مينيسترلىگىنە، توتەنشە جاعدايلار مينيسترلىگىنە، ۇلتتىق قاۋىپسىزدىك كوميتەتىنە جانە مەملەكەتتىك كۇزەت قىزمەتىنە جەتكىزۋدى ۇيىمداستىرادى.
سونداي-اق قورعانىس، ىشكى ىستەر جانە توتەنشە جاعدايلار مينيسترلىكتەرىنە تاسىمالداۋ قىزمەتىن كورسەتكەن ۇيىمداردىڭ شىعىندارىن رەسپۋبليكالىق بيۋدجەتتە كوزدەلگەن قاراجات شەگىندە وتەۋ تاپسىرىلدى.
قاۋلى 20-ناۋرىزدان باستاپ كۇشىنە ەندى.
ەسكە سالا كەتەيىك، بۇعان دەيىن اسكەرگە شاقىرۋ ناۋقانى كەزىندە جاستارعا myarmy.kz پلاتفورماسى ارقىلى مەرزىمدى قىزمەتكە ونلاين ءوتىنىم تاپسىرۋ مۇمكىندىگى بەرىلگەنىن جازعان ەدىك.
