قازاقستاندا 20 مىڭ جىگىت اسكەردەن قاشىپ ءجۇر
استانا. قازاقپارات - 2024-جىلى اسكەرگە 40202 ازامات شاقىرىلعان. ال بيىل 42098 ادام مەرزىمدى اسكەري قىزمەتىن وتەۋگە مىندەتتەلدى. دەسە دە، جىگىتتەردىڭ تەڭ جارتىسى وتان الدىنداعى بورىشىن ورىنداۋدان قاشىپ ءجۇر.
- 2024-جىلى مەرزىمدى اسكەري قىزمەتكە 40202 ادام شاقىرىلدى. 2025-جىلى مەرزىمدى اسكەري قىزمەتكە 42098 ادامدى شاقىرۋ جوسپارلانۋدا. كونستيتۋتسيانىڭ 36-بابى جانە پرەزيدەنتتىڭ جارلىعى تالاپتارىنا قاراماستان، شاماسى 20 مىڭ استام ازامات ءوزىنىڭ ازاماتتىق مىندەتتەرىن ورىنداماي، اسكەري قىزمەتكە ءوز ەركىمەن كەلمەي ءجۇر، - دەيدى ق ر قورعانىس مينيسترلىگى Kazinform ءتىلشىسىنىڭ رەسمي ساۋالىنا بەرگەن جاۋابىندا.
جاۋاپتىلار ەشقانداي نەگىزسىز اسكەري قىزمەتتەن جالتارعاندار 1 جىل باس بوستاندىعىنان ايىرىلاتىنىن ەسكەرتتى.
- قازاقستان رەسپۋبليكاسى اكىمشىلىك قۇقىق بۇزۋشىلىق تۋرالى كودەكسىنىڭ 647-بابىنا سايكەس، اسكەري ەسەپتە تۇرعان نەمەسە تۇرۋعا مىندەتتى ازامات جەرگىلىكتى اسكەري باسقارۋ ورگانىنىڭ شاقىرۋى بويىنشا كورسەتىلگەن مەرزىمدە دالەلدى سەبەپسىز كەلمەسە، 5 اەك مولشەرىندە ايىپپۇل سالىنادى. وسى كودەكستىڭ 648-بابىنا سايكەس، ازاماتتاردى اسكەري ەسەپكە قويۋ جونىندەگى كوميسسيانىڭ نەمەسە اسكەرگە شاقىرۋ كوميسسياسىنىڭ جولداماسى بويىنشا مەديتسينالىق كۋالاندىرۋدان نە تەكسەرىلۋدەن جالتارۋ ءۇشىن - 5 ا ە ك مولشەرىندە ايىپپۇلمەن جازالانادى. سونىمەن بىرگە، قىلمىستىق كودەكستىڭ 387-بابىنا سايكەس، اسكەري قىزمەتتەن بوساتۋعا زاڭدى نەگىزدەر بولماعان كەزدە وسى قىزمەتكە شاقىرىلۋدان جالتارۋ 1000 ا ە ك دەيىنگى مولشەردە ايىپپۇل سالۋعا، نە 1 جىلعا دەيىنگى مەرزىمگە باس بوستاندىعىن شەكتەۋگە نە سول مەرزىمگە باس بوستاندىعىنان ايىرۋمەن جازالانادى، - دەيدى ولار.
