قازاقستاندا 1200 تۇتقىن مەرزىمىنەن بۇرىن بوساتىلۋى مۇمكىن

استانا. قازاقپارات - قازاقستاندا ەسىرتكى قىلمىسى ءۇشىن جازا وزگەردى. زاڭ بويىنشا ەسىرتكى تاراتۋشىلار جازاسى جەڭىلدەتىلدى.

رەسمي دەرەكتەرگە سۇيەنسەك، قازىر 16-30 جاس ارالىعىنداعى شامامەن 1200 ادام وسى قىلمىس ءۇشىن قاماۋدا وتىر. بۇل تۋرالى و ك ق- دا وتكەن بريفينگتە ءى ءى م ەسىرتكى قىلمىسىنا قارسى ءىس-قيمىل كوميتەتى ءتوراعاسىنىڭ ورىنباسارى قۋاندىق ءالجانوۆ مالىمدەدى.

پوليتسەيدىڭ ايتۋىنشا، بىلتىر جىل سوڭىندا مەملەكەت باسشىسى ەسىرتكى قىلمىسىنا قارسى ءىس-قيمىلدى جەتىلدىرۋگە باعىتتالعان زاڭعا قول قويعان. بۇل زاڭ 3-ناۋرىزدان باستاپ كۇشىنە ەندى.

زاڭعا ەنگىزىلگەن وزگەرىستەرگە سايكەس قىلمىستىق كودەكستىڭ 297-بابىنداعى ەسىرتكى ساتۋمەن اينالىساتىندار، سونىڭ ىشىندە تاراتۋشىلار ءۇشىن قىلمىستىق جاۋاپكەرشىلىك ساقتالعان. الايدا قىلمىس العاش رەت جاسالسا جانە ەسىرتكىنى ءوندىرۋ، قايتا وڭدەۋ ارەكەتتەرى بولماسا، جازا جەڭىلدەيدى.

جالپى العاش رەت قىلمىس جاساعان ەسىرتكى تاراتۋشىلاردىڭ جازا مەرزىمى قىسقارماق.

«قىلمىستىق كودەكستىڭ 297-بابى 1-بولىگى بويىنشا 5 جىلدان 8 جىلعا دەيىن (بۇرىن 10 جىلعا دەيىن بولعان) قىسقاردى. بۇل از مولشەردەگى ەسىرتكىگە قاتىستى. 2-ءبولىم بويىنشا جازا 6 جىلدان 12 جىلعا دەيىن بولسا، ەندى 10 جىلعا دەيىن قىسقاردى (ءىرى مولشەردەگى ەسىرتكىگە قاتىستى). 3-ءبولىم بويىنشا بۇرىن 10 جىلدان 15 جىلعا دەيىن جازا قاراستىرىلسا، ەندى 7 جىلدان 12 جىلعا دەيىن قىسقارتىلدى. بۇل - مەملەكەت تاراپىنان راقىمشىلىقتىڭ ءبىر ءتۇرى»، - دەدى ۆەدومستۆو وكىلى.

سونداي-اق، زاڭعا سايكەس سوتتالعان ەسىرتكى تاراتۋشىلارعا شارتتى تۇردە مەرزىمىنەن بۇرىن بوساتۋ جانە جازانىڭ وتەلمەگەن بولىگىن جەڭىل جازا تۇرىنە اۋىستىرۋ مۇمكىندىگى قاراستىرىلعان. ءاربىر سوتتالۋشىنىڭ جاعدايى جەكە قارالادى.

«بۇل ءتاسىل قازىر قاماۋدا وتىرعان جاستارعا ەرتەرەك بوساپ، جاڭا ءومىر باستاۋعا مۇمكىندىك بەرەدى»، - دەدى قۋاندىق ءالجانوۆ.