قازاقستاندا 111 مىڭ وتباسى اتاۋلى الەۋمەتتىك كومەك الىپ وتىر

1-قاراشاداعى جاعداي بويىنشا 111,2 مىڭ وتباسىنداعى 583,3 مىڭ ادامعا اتاۋلى الەۋمەتتىك كومەك(ا ا ك) تاعايىندالدى. بيىل وسى ماقساتقا بيۋدجەتتەن 64,7 ميلليارد تەڭگە ءبولىندى، دەپ حابارلايدى Kazinform.

ا ا ك نەگىزگى ماقساتى - اقشالاي تولەم تۇرىندە قولداۋدى جۇزەگە اسىرۋ جانە وتباسىنىڭ ەڭبەككە قابىلەتتى مۇشەلەرىن جۇمىسپەن قامتۋعا جاردەمدەسۋدىڭ بەلسەندى شارالارىنا تارتۋ ارقىلى وتباسىن قيىن ومىرلىك جاعدايدان شىعارۋ.

ا ا ك مىنانى كوزدەيدى:

- تابىسى وڭىرلىك ەڭ تومەنگى كۇنكورىس دەڭگەيىنىڭ %70 اسپايتىن ازاماتتارعا توقسان سايىن الەۋمەتتىك كومەك تاعايىنداۋ؛

- تابىسى از وتباسىلارداعى 1 جاس پەن 6 جاس ارالىعىنداعى ءار بالاعا 1,5 ا ە ك (5 175 تەڭگە) مولشەرىندە اي سايىن قوسىمشا تولەم بەرۋ. 1-قاراشاداعى جاعداي بويىنشا ا ا ك الۋشىلار قاتارىنان مەكتەپ جاسىنا دەيىنگى 182 مىڭ بالاعا قوسىمشا تولەم تاعايىندالدى؛

- جۇمىسقا ورنالاستىرۋ، ءوز ءىسىن اشۋعا نيەتتى وتباسىلارعا گرانت بەرۋ، بىلىكتىلىكتى ارتتىرۋ كۋرسىنا جىبەرۋ (قاجەت بولعان جاعدايدا) جانە باسقالار ارقىلى جۇمىسپەن قامتۋعا جاردەمدەسۋ.

قازىرگى ۋاقىتتا قازاقستاندىقتار ا ا ك تاعايىنداۋعا ءوتىنىشتى تۇرعىلىقتى جەرى بويىنشا مانساپ ورتالىعىندا، اۋىل وكرۋگىنىڭ اكىمىنە سونداي-اق egov.kz ەلەكتروندىق ۇكىمەت پورتالى ارقىلى بەرە الادى.