قازاقستاندا 1-ساۋىردەن باستاپ نە وزگەرەدى؟
استانا. KAZINFORM - ساۋىردەن باستاپ قازاقستاندا ءبىرقاتار جاڭا ەرەجە كۇشىنە ەنەدى. كوكتەمنىڭ ەكىنشى ايىنان باستاپ ەلدە موبيلدى اۋدارىم، تاريف، ازىق-تۇلىك باعاسى جانە مەملەكەتتىك قىزمەت كورسەتۋ سالالارىنا وزگەرىستەر ەنگىزىلەدى.
موبيلدى اۋدارىمدار باقىلاۋعا الىنادى
بانكتەر موبيلدى اۋدارىمدار تۋرالى العاشقى دەرەكتى سالىق ورگاندارىنا جىبەرەدى. ازاماتتار سالىق باقىلاۋىنا ءۇش شارت قاتار ورىندالعان جاعدايدا ىلىگەدى. بۇل دەگەنىمىز - ءبىر ادامعا 100 جانە ودان كوپ تۇلعادان اقشا ءتۇسۋى، بۇل اۋدارىمدار ءۇش اي قاتارىنان جالعاسۋى جانە جالپى سوماسى 1 ميلليون 20 مىڭ تەڭگەدەن اسۋى. الايدا بۇل شوت بىردەن بۇعاتتالادى دەگەن ءسوز ەمەس.
شەكتەۋ تەك ەسكەرتۋ تالاپتارى ورىندالماعان جاعدايدا ەنگىزىلەدى. اۋدارىمدار جەكە ماقساتتا جاسالسا، ازامات مۇنى راستاي الادى.
موراتوري اياقتالادى
1-ساۋىردەن باستاپ اي-92 بەنزينى، ديزەل وتىنى باعاسىن جانە كوممۋنالدىق تاريفتى وسىرۋگە قويىلعان موراتوري ءوز كۇشىن جويادى. ۇكىمەت ەكىنشى توقساندا باعا ءوسىمى تەڭگەرىمدى بولادى دەپ بولجاپ وتىر.
ازىق-تۇلىككە ەڭ تومەنگى باعا ەنگىزىلەدى
1-ءساۋىر مەن 30-ماۋسىم ارالىعىندا ءبىرقاتار ونىمگە ەڭ تومەنگى باعا بەلگىلەنەدى. ولاردىڭ قاتارىندا سۇزبە، بالقىتىلعان ىرىمشىك، جۇمىرتقا، كارتوپ، قىرىققابات، ءسابىز، الما، ۇن، كۇنباعىس مايى بار. باعا توقسان سايىن قايتا قارالادى. بۇل شارا نارىقتى تۇراقتاندىرۋعا باعىتتالعان.
جۇرگىزۋشى كۋالىگىن ونلاين اۋىستىرۋ
ساۋىردەن باستاپ جۇرگىزۋشى كۋالىگىن مەرزىمى ءوتىپ كەتسە دە ونلاين اۋىستىرۋعا بولادى. بۇل جاعدايدا مىندەتتى تۇردە مەديتسينالىق تەكسەرىستەن ءوتۋ قاجەت.
مەملەكەتتىك قىزمەتكە ىرىكتەۋ تالابى وزگەرەدى
اكىمشىلىك مەملەكەتتىك قىزمەتكە قابىلداۋ تولىق تسيفرلىق فورماتقا كوشەدى. ىرىكتەۋ مەرزىمى 5-7 جۇمىس كۇنىنە دەيىن قىسقارادى. ۇزدىك بەس ۇمىتكەر كەلەسى كەزەڭگە وتەدى. باسشىلىق قىزمەتتەرگە ەسسە مەن سۇحبات ەنگىزىلسە، ورىنداۋشى لاۋازىمدارعا پراكتيكالىق تاپسىرمالار مەن پسيحومەتريالىق تەست قاراستىرىلعان.
