قازاقستاندا 1-ناۋرىزدان باستاپ نە وزگەرەدى؟

استانا. KAZINFORM – قازاقستاندا 1-ناۋرىزدان باستاپ نە وزگەرەدى؟ شولۋعا نازار اۋدارايىق.

«وتاۋ» باعدارلاماسى باستالادى

«وتاۋ» باعدارلاماسى 2024 -جىلدىڭ 1-ناۋرىزىندا ىسكە قوسىلادى. سول كۇننەن باستاپ 30-ساۋىرگە دەيىن (قوسا العاندا) قازاقستاندىقتار باسپانا ماركەت (otbasybank.kz) پورتالىندا باعدارلاماعا قاتىسۋ تۋرالى ءوتىنىش جولداي الادى. ءوتىنىش بەرۋ ۋاقىتى ماڭىزدى ەمەس.

«وتاۋ» باعدارلاماسىنا كىمدەر قاتىسا الادى؟

1. وتباسى بانك سالىمشىلارى («بايتەرەك» حولدينگىنىڭ ەنشىلەس ۇيىمى)، ونىڭ ىشىندە تۇرعىن ءۇي كەزەگىندە تۇرعان ازاماتتار قاتىسا الادى؛

2. ۇمىتكەردىڭ جيناق شوتى ەڭ كەمى 18 ايلىق بولۋى كەرەك؛

3. ءوتىنىم بەرۋ ساتىندە دەپوزيتتەگى جيناق سوماسى 1 ميلليون تەڭگەدەن كەم بولماۋى ءتيىس؛

4. قاتىسۋشى جاسى 18 دەن 63 جاسقا دەيىن (قوسا العاندا)؛

5. باعدارلاماعا قاتىسۋشىدا جانە ونىڭ وتباسى مۇشەلەرىندە سوڭعى 5 جىل ىشىندە جىلجىمايتىن مۇلىك بولماۋى كەرەك؛

6. الماتى جانە استانا قالالارىنان تۇرعىن ءۇي الاتىن جاعدايدا اتالمىش قالالاردا تۇراقتى تىركەۋ بولۋى قاجەت.

14 كۇن دەمالامىز

2024 -جىلدىڭ-ناۋرىزىندا قازاقستان حالقى 14 كۇن دەمالادى.

وسى ايدا ەكى رەسمي مەرەكە - 8-ناۋرىز - حالىقارالىق ايەلدەر كۇنى جانە ءاز-ناۋرىز مەيرامى بار.

8-ناۋرىز - حالىقارالىق ايەلدەر كۇنىندە اپتاسىنا بەس كۇن جۇمىس ىستەيتىندەر 8، 9، 10-ناۋرىزدا ءۇش كۇن قاتارىنان دەمالادى.

ال اپتاسىنا التى كۇن جۇمىس ىستەيتىندەر ءۇشىن 8-10-ناۋرىز - دەمالىس، 9-ناۋرىز جۇمىس كۇنى بولىپ سانالادى.

ناۋرىز مەيرامىندا (21-25-ناۋرىزدا) ەل ازاماتتارى بەس كۇن دەمالادى.

ال اپتاسىنا التى كۇن جۇمىس ىستەيتىندەر ءۇشىن 25-ناۋرىز - جۇمىس كۇنى، 21-24-ناۋرىز ارالىعىندا دەمالادى.

وقۋشىلار كانيكۋلعا شىعادى

وقۋشىلاردىڭ 11 كۇندىك كوكتەمگى كانيكۋلى 2024 -جىلدىڭ 21-ناۋرىزىندا باستالىپ، 31-ناۋرىزعا (قوسا العاندا) دەيىن جالعاسادى.

ايتا كەتەيىك، جىل سايىن ءبىرىنشى سىنىپ وقۋشىلارى ءۇشىن ءۇشىنشى توقساندا قوسىمشا دەمالىستار بەرىلەدى، ۇزاقتىعى 7 كۇن - 2024 -جىلدىڭ 5-اقپانىنان 11-اقپانعا (قوسا العاندا) دەيىنگى ۋاقىتتى قامتيدى. ءتورتىنشى توقساننىڭ ۇزاقتىعى 8 وقۋ اپتاسىن قۇرايدى. سونداي-اق 25-مامىردا قورىتىندى شىعارىلىپ، وقۋ جىلى اياقتالادى.

«Zhas Project»

قازاقستاندا جاستاردى قولداۋعا ارنالعان جوبا ىسكە قوسىلماق.

«Zhas Project» ماقساتى - جاستار اراسىندا جوبالاردى ىسكە اسىرۋ بويىنشا اقپاراتتىق ءتۇسىندىرۋ، ءبىلىم بەرۋ جانە جۇرگىزىلەتىن جۇمىستار ارقىلى NEET ساناتىنداعى جاستار اراسىندا كاسىپكەرلىكتى دامىتۋ ءۇشىن قولايلى جاعدايلار جاساۋ.

بيىل «Zhas project» جوباسى ەلىمىزدىڭ 20 وڭىرىندە ىسكە اسىرىلادى. «Zhas project» جوباسى شەڭبەرىندە NEET ساناتىنان جەرگىلىكتى قوعامداستىقتاردىڭ پروبلەمالارىن شەشۋگە باعىتتالعان الەۋمەتتىك جوبالارعا كونكۋرستىق نەگىزدە 1000000 تەڭگەگە دەيىنگى سوماعا شاعىن گرانتتار بەرۋ كوزدەلگەن.

ءوتىنىم قابىلداۋ 25-ناۋرىزدان باستاپ 24-ءساۋىر ساعات 23:59-عا دەيىن جۇرگىزىلەدى.

ۋاقىت بەلدەۋى اۋىسادى

«قازاقستان رەسپۋبليكاسىنىڭ اۋماعىندا ۋاقىتتى ەسەپتەۋ ءتارتىبى تۋرالى» ۇكىمەت قاۋلىسىنا وزگەرىستەر ەنگىزىلگەن بولاتىن. وزگەرىستەرگە سايكەس، 2024 -جىلعى 1-ناۋرىزدا ساعات 00:00-دەن باستاپ ەلدىڭ بۇكىل اۋماعىندا ءبىرىڭعاي ۋاقىت بەلدەۋى ورناتىلادى.

وسىلايشا، قازاقستان رەسپۋبليكاسىنىڭ بۇكىل اۋماعىنا 5-شى ۋاقىت بەلدەۋى (UTC+5) قولدانىلادى.

«قازاقستان رەسپۋبليكاسىنىڭ اۋماعىنداعى ۋاقىتتى ەسەپتەۋ ءتارتىبى تۋرالى» قازاقستان رەسپۋبليكاسى ۇكىمەتىنىڭ 2000 -جىلعى 23-قاراشاداعى N 1749 قاۋلىسىنا ەنگىزىلگەن وزگەرتۋلەرگە سايكەس، «استانا، الماتى قالالارىنىڭ اكىمدىكتەرى، شىمكەنت، اقمولا، الماتى، جامبىل، قاراعاندى، قوستاناي، پاۆلودار، سولتۇستىك قازاقستان، تۇركىستان، شىعىس قازاقستان وبلىستارىندا جانە اباي، جەتىسۋ، ۇلىتاۋ وبلىستارىندا 2024 -جىلعى 29-اقپاننان 1-ناۋرىزعا قاراعان ءتۇنى (ساعات 00:00-دە) جەرگىلىكتى ۋاقىتتى 1 ساعاتقا ارتقا قويۋ كەرەك».

دەمەك ۋاقىت بەلدەۋى 1 ساعاتقا ارتقا جىلجىسا قازاقستاندىقتاردىڭ ومىرىندە دە ءبىرشاما وزگەرىستەر بولادى دەگەن ءسوز.

ب ۇ ۇ اياسىنداعى بىتىمگەرلىك

بىتىمگەرلىك كونتينگەنت گولان جوتالارىنا كەتۋگە دايىن جۋىردا نيۋ-يوركتەگى ب ۇ ۇ شتاب- پاتەرىندە گولان جوتالارىنداعى بولىنگەن جەرلەردى «ب ۇ ۇ-نىڭ باقىلاۋ كۇشتەرى» (SONNR) ميسسياسىنا بىتىمگەرلىك كونتينگەنتتى جىبەرۋ ءۇشىن قازاقستان رەسپۋبليكاسىنىڭ ۇكىمەتى مەن بىرىككەن ۇلتتار ۇيىمى اراسىندا ءوزارا تۇسىنىستىك تۋرالى مەموراندۋمعا قول قويىلدى، - دەپ حابارلادى قورعانىس مينيسترلىگى.

ەسكە سالا كەتسەك، ب ۇ ۇ شاقىرۋىنا سايكەس 2024 -جىلعى-ناۋرىزدان باستاپ «ب ۇ ۇ-نىڭ گولان بيىكتىكتەرىندەگى ءبولىنۋدى باقىلاۋ جونىندەگى كۇشتەرى» ميسسياسىنا ءوزىنىڭ اسكەري تەحنيكاسى، قارۋ-جاراعى جانە رەزەرۆ روتاسى رەتىندە مۇلكى بار 139 اسكەري قىزمەتشى سانىنداعى قازاقستاننىڭ العاشقى دەربەس ۇلتتىق بىتىمگەرشىلىك كونتينگەنتىن ورنالاستىرۋ جوسپارلانعان.

كونتينگەنت قۇرامىندا اسكەري ەر ازاماتتارمەن بىرگە ايەلدەر دە بولادى. ايەلدەر ىشىندە 2 اتقىش- سانيتار، 1 مەرگەن، 2 اسپازشى جانە 2 مەديتسينالىق قىزمەتشى بار.

جالپى ب ۇ ۇ-نىڭ بىرنەشە ميسسياسىنا قاتىسۋ ءۇشىن قارۋلى كۇشتەردىڭ ساپىنان 430 ادامنان اسپايتىن اسكەري قىزمەتشى جىبەرىلەدى. ولار «ب ۇ ۇ-نىڭ گولان بيىكتىكتەرىندەگى ءبولىنۋدى باقىلاۋ كۇشتەرى»، «ب ۇ ۇ-نىڭ بىتىمگەرشىلىك شارتتارىنىڭ ورىندالۋىن باقىلاۋ ورگانى» (UNTSO، پالەستينا- يزرايل)، «ب ۇ ۇ-نىڭ وڭتۇستىك سۋدان رەسپۋبليكاسىنداعى ميسسياسى» (UNMISS، وڭتۇستىك سۋدان) جانە «ب ۇ ۇ-نىڭ ۋاقىتشا قاۋىپسىزدىك جانە ابە كۇشتەرى» (UNISFA، سۋدان) قاراماعىندا قىزمەت ەتەدى.

الماتى - كۋالا-لۋمپۋر باعىتىنداعى رەيس اشىلادى

2024 -جىلعى 14-ناۋرىزدان باستاپ ازيالىق ءىرى لوۋ-كوست «Air Asia» كومپانياسى الماتى - كۋالا- لۋمپۋر باعىتىندا رەيستەردى ورىنداۋعا كىرىسەدى جانە «اشىق اسپان» رەجيمىن قولدانا وتىرىپ، الماتىدان ءارى قاراي دجيددا قالاسىنا رەيستەردى ورىندايدى.

كادر رەزەرۆتەرىنە ىرىكتەۋ باستالادى

1-ناۋرىزدان باستاپ وبلىستاردىڭ، رەسپۋبليكالىق ماڭىزى بار قالالاردىڭ جانە استانانىڭ وڭىرلىك كادر رەزەرۆتەرىنە ىرىكتەۋ باستالادى.

وڭىرلىك كادر رەزەرۆىنىڭ باستى ماقساتى - ءار وڭىردە تالانتتى جاستار اراسىنان جاڭاشىل ويلايتىن كوشباسشىلار، جاس باسقارۋشىلاردىڭ توبىن قالىپتاستىرۋ.

ىرىكتەۋگە قاتىسۋ رەزەرۆشىلەرگە جەرگىلىكتى جەرلەردە جاڭاشا وزگەرىستەردى جۇزەگە اسىرۋعا مۇمكىندىك بەرەدى.

ىرىكتەۋگە جوعارى ءبىلىمى جانە 3 جىلدان كەم ەمەس ەڭبەك ءوتىلى بار، 35 جاستان اسپاعان ەلىمىزدىڭ ازاماتتارى قاتىسا الادى.

ءاربىر وڭىرلىك رەزەرۆ بويىنشا ناقتى سالالىق باعىتتار مەن رەزەرۆشىلەردىڭ سانى وڭىردەگى الەۋمەتتىك- ەكونوميكالىق جاعداي جانە مەملەكەتتىك باسقارۋ جۇيەسىن دامىتۋدىڭ باسىمدىقتارى ەسكەرىلە وتىرىپ، وڭىرلىك كادر كوميسسيالارىمەن ايقىندالادى.

قاتىسۋعا وتىنىمدەردى قابىلداۋ بيىلعى جىلدىڭ 1-31-ناۋرىزى ارالىعىندا onir.pkrezerv.gov.kz سايتىندا قولجەتىمدى بولادى.

بلوگەرلەرگە قاتىستى جاڭا ەرەجە كۇشىنە ەنەدى

ەلىمىزدە بلوگەرلەرگە قاتىستى جاڭا ەرەجە 2-ناۋرىزدا كۇشىنە ەنەدى.

«ونلاين-پلاتفورمالار جانە ونلاين-جارناما تۋرالى» زاڭىنا سايكەس ينفليۋەنسەرلەر (بلوگەرلەر) كوممەرتسيالىق نەمەسە شارتتىق نەگىزدە ورنالاستىراتىن ونلاين- جارنامانى تاڭبالاۋعا ءتيىس. ولار جاريالانىمنىڭ باسىندا نەمەسە سوڭىندا ونلاين ورتادا بەلسەندى قولدانىلاتىن تومەندەگىدەي تۇجىرىمداردىڭ ءبىرىن كورسەتۋ كەرەك:

«جارناما»؛

«جارنامالىق ماتەريال»؛

«سەرىكتەستىك ماتەريال»؛

«دەمەۋشىلىك ماتەريال»؛

«جارناما قۇقىعىندا»؛

«دەمەۋشىمەن تولەنگەن»؛

«PR قۇقىعىندا»؛

«رەكلاما»؛

«رەكلامنىي ماتەريال»؛

«پارتنەرسكيي ماتەريال»؛

«سپونسورسكيي ماتەريال»؛

«نا پراۆاح رەكلامى»؛

«وپلاچەنو سپونسوروم»؛

«نا پراۆاح PR».

جۇك كولىكتەرىنە شەكتەۋ قويىلادى

1-ناۋرىزدان باستاپ قازاقستاننىڭ سەگىز وڭىرىندە اۋىر جۇك كولىكتەرىنىڭ قوزعالىسىنا شەكتەۋ ەنگىزىلەدى.

جىل سايىن كوكتەم مەزگىلىندە رەسپۋبليكالىق ماڭىزى بار جولداردى قىستان كەيىن ساقتاۋ جانە كۇتىپ ۇستاۋ ءۇشىن ءبىر وسكە جۇكتەمەسى 8 توننادان اساتىن اۆتوكولىك قۇرالدارىنىڭ قوزعالىسىن ۋاقىتشا شەكتەۋ ەنگىزىلەدى. ءبىرىنشى-ناۋرىزدان باستاپ مۇنداي ەرەجەلەر 8 وبلىستاعى تراسسالاردا قولدانىلادى.

اتاپ ايتقاندا، الماتى، اتىراۋ، جامبىل، ۇلىتاۋ، قىزىلوردا، ماڭعىستاۋ، جەتىسۋ جانە تۇركىستان وبلىستارى «بەسىنشى جول- كليماتتىق ايماققا» كىرەدى. اتالعان ۋاقىتشا شەكتەۋ شارالارى 1-ناۋرىزدان 1-ساۋىرگە دەيىن قولدانىلادى.

 

 

BAQ. KZ