قازاقستاندا 1 ميلليون تەڭگەدەن استام جالاقىنى كىمدەر الادى
استانا. KAZINFORM - قازاقستاندا ورتاشا جالاقى - 382279 تەڭگە. الايدا كەيبىر سالانىڭ ماماندارى ورتاشا ەسەپپەن 1 ميلليون تەڭگەدەن استام جالاقى الادى.
قورىتىندى سوما ەلدىڭ ايماعىنا، سونداي-اق قىزمەتكەردىڭ ماماندىعىنا بايلانىستى. ماسەلەن، بالىق جانە بالىق شارۋاشىلىعى سالاسىندا ورتاشا جالاقى نەبارى 134621 تەڭگەنى قامتىسا، جالپى اۋىل شارۋاشىلىعى قىزمەتكەرلەرىنىڭ جالاقىسى - 212300 تەڭگە شاماسىندا.
دەگەنمەن ۇلتتىق ستاتيستيكا بيۋروسىنىڭ مالىمەتىنشە، كەيبىر ماماندار ەلدەگى ورتاشا دەڭگەيدەن ايتارلىقتاي كوپ جالاقى الادى. مىسالى، تاۋ-كەن جانە كارەرلەردى قازۋ سالالارىندا جۇمىس ىستەيتىندەرگە ورتاشا ەسەپپەن 864029 تەڭگە جالاقى تولەنەدى. الايدا بۇل رەكورد ەمەس.
«كومپيۋتەرلىك باعدارلامالاۋ، كەڭەس بەرۋ جانە باسقا دا ىلەسپە قىزمەتتەر» سالاسىنىڭ ماماندارى الدەقايدا كوپ (ورتاشا ەسەپپەن 938377 تەڭگە) الادى. بۇدان دا باي، «ميلليونەر ماماندىقتاردى» تابۋعا بولادى. مىسالى، كەنشىلەر مەن IT قىزمەتكەرلەرىنە قاراعاندا، «تەڭىز جانە جاعالاۋداعى جۇك كولىگىنىڭ قىزمەتى» سالاسىنداعىلاردىڭ ورتاشا جالاقىسى - ايىنا شامامەن 1028881 تەڭگە. ايتا كەتەيىك، ول ورتاشا جالاقىسى 510648 تەڭگە بولاتىن «كولىك جانە قويمالاۋ» ساناتىنا كىرەدى.
«ميلليونەرلەر» تىزىمىندەگى «باس كومپانيالاردىڭ قىزمەتى؛ باسقارۋ ماسەلەلەرى بويىنشا كەڭەس بەرۋ» سالاسىنداعى ورتاشا جالاقى 1102220 تەڭگە بولدى.
سونداي-اق «قارجىلىق قىزمەتتەر جانە ساقتاندىرۋ سالاسىنداعى قوسالقى قىزمەتتە» ورتاشا جالاقى - 1213112 تەڭگە، ال «مىندەتتى الەۋمەتتىك قامسىزداندىرۋدان باسقا ساقتاندىرۋ، قايتا ساقتاندىرۋ جانە زەينەتاقىمەن قامسىزداندىرۋدا» - 1372158 تەڭگە. بۇل ەكى سالا دا «قارجىلىق جانە ساقتاندىرۋ قىزمەتى» ساناتىنا كىرەدى، وندا ورتاشا جالاقى 780876 تەڭگەگە تەڭ.
«شيكى مۇناي جانە تابيعي گاز ءوندىرۋ» سالاسىندا ورتا ەسەپپەن 1476869 تەڭگەدەن تولەنەدى. ال جالپى «ونەركاسىپ» ساناتىندا ورتاشا جالاقى 546968 تەڭگەنى عانا قامتيدى. الايدا جالاقى مولشەرى بويىنشا ءسوزسىز كوشباسشى - «تەمەكى ونىمدەرىن ءوندىرۋ» سالاسىندا ورتاشا ەسەپپەن 1646590 تەڭگە تولەنەدى. بۇل - «وڭدەۋ ونەركاسىبى» ساناتىنداعى جالپى ورتاشا جالاقىدان 3,6 ەسە (ايىنا 450501 تەڭگە) كوپ.
وسىلايشا، قازاقستاندا ۇلكەن جالاقى تەك رەسۋرستاردى ءوندىرۋ سالاسىندا عانا بەرىلمەيدى. دەگەنمەن ورتاشا نومينالدى جالاقى ءاربىر قازاقستاندىق الاتىن ناقتى سومانى كورسەتپەيتىنىن ەستە ۇستاعان ءجون. بۇل جالاقىسى ەڭ جوعارى سالالارعا دا قاتىستى.
