قازاقستاندا 1-شىلدەدەن باستاپ سۇيىتىلعان گاز باعاسى ءوستى
استانا. KAZINFORM - ءبىر توننا سۇيىتىلعان مۇناي گازىنىڭ شەكتى كوتەرمە باعاسى 45158 تەڭگەنى (بۇرىنعى باعاسى — 40320 تەڭگە) قۇرادى. بۇل رەتتە شەكتى بولشەك ساۋدا باعاسى وڭىرگە قاراي ليترىنە 5-8 تەڭگەگە دەيىن شامالى ءوستى.
بۇل تۋرالى ق ر ەنەرگەتيكا مينيسترلىگىنىڭ باسپا ءسوز قىزمەتى حابارلادى.
استانادا جانە اقمولا، قوستاناي، قاراعاندى، اباي، جەتىسۋ، شىعىس قازاقستان جانە ۇلىتاۋ وبلىستارىندا - سۇيىتىلعان گاز ءليترى 76 تەڭگەدەن 84 تەڭگەگە ءوستى. باتىس قازاقستان، قىزىلوردا، تۇركىستان وبلىسى جانە شىمكەنت — 64 تەڭگەدەن 79 تەڭگەگە، اقتوبە، اتىراۋ، ماڭعىستاۋ وبلىستارىندا - 54 تەڭگەدەن 59 تەڭگەگە قىمباتتادى. الماتى قالاسىندا، الماتى جانە سولتۇستىك قازاقستان وبلىستارىندا - 81 تەڭگەدەن 89 تەڭگەگە وزگەرگەن.
جامبىل وبلىسىندا - ليترىنە 78 تەڭگە (71 تەڭگە)، پاۆلودار وبلىسىندا - 81 تەڭگە (74 تەڭگە) بولىپ وزگەرگەن.
مينيسترلىك بۇل شارانى قابىلداۋعا بىرنەشە سەبەپ بار ەكەنىن ءتۇسىندىردى:
* سۇيىتىلعان مۇناي گازىنىڭ باعاسى ونى ءوندىرۋ قۇنىنان الدەقايدا تومەن؛
* ت م د- دا تۇتىنۋ كۇرت وسكەن؛
* ت م د- دا زاۋىتتار وندىرىسكە دەگەن قىزىعۋشىلىعىن جوعالتۋدا؛
* قازاقستاندا 54-86 تەڭگەگە دەيىن ت م د- داعى ەڭ تومەن باعالاردىڭ ءبىرى بايقالعان.
«سالىستىرمالى تۇردە رەسەيدە ءبىر ليتر گازدىڭ باعاسى 132 تەڭگە، ازەربايجاندا — 171 تەڭگە، تاجىكستاندا — 273 تەڭگە. ساراپشىلاردىڭ بولجامىنشا، 2024-جىلى ىشكى نارىقتا تۇتىنۋ كولەمى تاعى 200 مىڭ تونناعا ارتىپ، 2,4 ميلليون تونناعا جەتەدى. بۇل رەتتە گاز تاپشىلىعى 30-40 پايىزدى قۇراۋى مۇمكىن»، - دەيدى مينيسترلىك.