قازاقستانعا زاڭسىز تەمەكى ونىمدەرى قاي ەلدەردەن كەلەدى
استانا. KAZINFORM - ورتالىق ازيا ەلدەرىنە ونىڭ ىشىندە قازاقستانعا زاڭسىز تەمەكى ونىمدەرى قاي ەلدەردەن اكەلىنەتىنى بەلگىلى بولدى.
بۇل تۋرالى QazSpirits اسسوتسياتسياسىنىڭ اتقارۋشى ديرەكتورى دميتريي جۋكوۆ ءمالىم ەتتى.
- ورتالىق ازيا ەلدەرىنە زاڭسىز تەمەكى ونىمدەرىنىڭ نەگىزگى جەتكىزۋشىلەر بىرىككەن اراب امىرلىكتەرى مەن قىتاي. ورتالىق ازيا ءوندىرۋشى ەلدەر مەن ونى وتكىزۋ نارىعى اراسىنداعى ترانزيتتىك توراپ. كونتراباندا جولدارى قىتاي، يران جانە اۋعانستان شەكارالارى ارقىلى وتەدى، - دەدى دميتريي جۋكوۆ ەلوردادا «تەمەكى جانە نيكوتين ونىمدەرىنىڭ كونترابانداسى جانە كونترافاكتىسى: ە ا ە و ەكونوميكاسى مەن ۇلتتىق قاۋىپسىزدىگىنە قاتەر» تاقىرىبىندا وتكەن باسپا ءسوز ءماسليحاتىندا.
ونىڭ ايتۋىنشا، زاڭسىز تەمەكى ونىمدەرى اۆتوموبيل، تەمىرجول جانە اۋە تاسىمالى ارقىلى جۇزەگە اسىرىلادى. ورتالىق ازيا ەلدەرىندە زاڭسىز تەمەكى جانە تەمەكى ونىمدەرى كوتەرمە بازارلار، شاعىن ساۋدا نۇكتەلەرى جانە مەسسەندجەرلەر ارقىلى تاراتىلادى.
سونداي-اق اسسوتسياتسيا باسشىسى زاڭسىز تەمەكى ءوندىرىسى بەلگىلى برەندت ونىمدەردى قولدان جاساۋعا جانە زاڭدى جۇمىس ىستەيتىن ماركالاردىڭ قىزمەتىنە نۇقسان كەلتىرەتىنىن ايتتى.
- قازاقستان تەمەكى ونىمدەرىن رەسەيگە جونەلتەتىن ترانزيتتىك اۋماق. تەمەكى ونىمدەرىنىڭ زاڭسىز ساۋداسى ءوڭىر ەلدەرى ءۇشىن ەلەۋلى پروبلەما. سەبەبى كونتراباندا ماسەلەسى ترانسشەكارالىق سيپاتقا يە، ەكونوميكاعا زيان كەلتىرەدى، قاۋىپسىزدىك تاۋەكەلى جانە حالىقتىڭ دەنساۋلىعىنا كەرى اسەرىن تيگىزەدى، - د. جۋكوۆ.
سپيكەردىڭ مالىمەتىنە سۇيەنسەك، زاڭسىز تەمەكى اينالىمى ب ا ءا- دەن يرانعا پاروممەن جەتكىزىلەدى. سودان كەيىن تاۋار جۇك كولىكتەرىنە تيەلىپ، يران مەن اۋعانستان اۋماعى ارقىلى ترانزيتپەن تاسىمالدانادى. ودان ءارى تاۋار ەكى نەگىزگى باعىت بويىنشا تارالادى، ياعني تۇرىكمەنستان جانە وزبەكستان، سونداي-اق تاجىكستان، قىرعىزستان جانە قازاقستان.
بۇعان دەيىن QazSpirits اسسوتسياتسياسىنىڭ اتقارۋشى ديرەكتورى قازاقستان تەمەكى كونترابانداسى سالدارىنان جىل سايىن 32 ميلليارد تەڭگە جوعالتاتىنىن ايتتى.
ودان بولەك ءىس-شارا بارىسىندا قازاقستاندا ۆەيپ پەن كاليانعا تىيىم سالۋ كولەڭكەلى نارىقتىڭ وسۋىنە الىپ كەلگەنى ايتىلدى.
