قازاقستانعا رۋلى وڭ جاقتاعى كولىكتەردى بولشەكتەپ اكەلۋگە تىيىم ۇزارتىلدى

استانا. KAZINFORM - ەلىمىزگە رۋلى وڭ جاقتاعى كولىكتەردى بولشەكتەلگەن تۇردە اكەلۋگە تاعى 6 ايعا تىيىم سالىنباق. بۇل تۋرالى ونەركاسىپ جانە قۇرىلىس ءمينيسترى قانات شارلاپايەۆتىڭ بۇيرىعى «اشىق ن ق ا» پورتالىندا جاريالاندى.

ەسكە سالا كەتەيىك، بيىل قاڭتاردا ەلىمىزگە وڭ جاقتاعى كولىكتەردى بولشەكتەلگەن تۇردە اكەلۋگە ۋاقىتشا تىيىم سالىنعان ەدى.

«رۋلى وڭ جاقتا ورنالاسقان جەڭىل اۆتوموبيلدەردى قازاقستان رەسپۋبليكاسىنىڭ اۋماعىنا بولشەكتەلگەن تۇردە التى اي مەرزىمگە اكەلۋگە تىيىم سالۋ ەنگىزىلسىن»، - دەلىنگەن جاڭا بۇيرىق ماتىنىندە.

بۇيرىقتىڭ تۇسىندىرمە جازباسىندا، جوبا قابىلدانعان جاعدايدا بولجاناتىن الەۋمەتتىك- ەكونوميكالىق، قۇقىقتىق جانە وزگە دە سالدارى قاراستىرىلماعانى ايتىلعان.

جوبا 2-تامىزعا دەيىن كوپشىلىك نازارىنا تالقىعا ۇسىنىلىپ وتىر.

ايتا كەتسەك، بىلتىر ەلىمىزگە رۋلى وڭ جاقتاعى كولىكتەردى اكەلۋگە تىيىم سالىناتىنى تۋرالى حابارلانعان ەدى.

اۆتور
داۋلەت ىزتىلەۋ