قازاقستانعا قاي ەلدەردەن اقشا كوپ كەلەدى؟

2025 -جىلدىڭ العاشقى ەكى ايىندا قازاقستانداعى حالىقارالىق اقشا اۋدارىمدارىنىڭ كولەمى ايتارلىقتاي ازايعان. جەكە تۇلعالاردىڭ شەتەلگە جانە شەتەلدەن اۋدارعان قارجىسىنىڭ جيىنتىق كولەمى 117 ميلليارد تەڭگەدەن ءسال عانا اسقانىمەن، بۇل بىلتىرعى كورسەتكىشتەن 22 پايىزعا تومەن، دەپ حابارلايدى Ozgeris.info.

Finprom.kz دەرەكتەرىنە سۇيەنسەك، جىلدىڭ العاشقى ەكى ايىندا حالىقارالىق اقشا اۋدارىمدارى ەداۋىر قىسقاردى. قازاقستان ارقىلى جۇزەگە اساتىن جەكە تۇلعالاردىڭ شەتەلدىك اۋدارىمدارىنىڭ كولەمى 117,4 ميلليارد تەڭگەنى قۇرادى - بۇل وتكەن جىلمەن سالىستىرعاندا %22,3 عا از. ايتا كەتۋ كەرەك، مۇنداي تومەندەۋ ءۇردىسى 2024 -جىلى دا بايقالعان: سول كەزدە دە %6,8 دىق قۇلدىراۋ بولعان.

كىم اقشا جىبەرەدى، كىم قابىلدايدى؟ حالىقارالىق اۋدارىمدار بويىنشا كوش باستاپ تۇرعان مەملەكەت - رەسەي. قازاقستاننان رەسەيگە 31,8 ميلليارد تەڭگە جونەلتىلسە، كەرىسىنشە باعىتتا - رەسەيدەن قازاقستانعا 7 ميلليارد تەڭگە كەلگەن. ال تۇركياعا 19 ميلليارد تەڭگە جونەلتىلگەن. ا ق ش-تان 5 ميلليارد تەڭگە قازاقستانعا كەلگەن. وزبەكستان - ەكى باعىتتا دا بەلسەندى، 15,2 ميلليارد تەڭگە جونەلتىلىپ، 3,4 ميلليارد تەڭگە الىنعان.

اقشا قاي جۇيەلەر ارقىلى جۇرەدى؟ اقشا اۋدارىمدارىنىڭ باستى ارناسى - «زولوتايا كورونا». وسى جۇيە ارقىلى قاڭتار- اقپان ايلارىندا 65,7 ميلليارد تەڭگە سىرتقا جىبەرىلىپ، 14,8 ميلليارد تەڭگە شەتتەن كەلگەن. Western Union تا تۇراقتى سۇرانىسقا يە. 13,2 ميلليارد تەڭگە جونەلتىپ، 10,5 ميلليارد تەڭگە قابىلدانعان.