قازاقستانعا شەتەلدىك جۇمىس كۇشىن تارتۋعا قانشا مىڭ كۆوتا ءبولىندى
استانا. KAZINFORM - ەڭبەك جانە حالىقتى الەۋمەتتىك قورعاۋ ءمينيسترى سۆەتلانا جاقىپوۆا ۇكىمەت وتىرىسىندا شەتەلدىك جۇمىسشىلاردىڭ قازاقستانداعى قىزمەتىن ۇيىمداستىرۋ تۋرالى ايتىپ بەردى.
- 2025-جىلعا شەتەلدىك جۇمىس كۇشىن تارتۋعا ارنالعان كۆوتا 16,5 مىڭ كولەمىندە بەلگىلەندى، ونىڭ 14,2 مىڭى بويىنشا رۇقسات بەرىلدى. ەلدەگى شەتەلدىك جۇمىسكەرلەردىڭ جۇمىس ىستەۋ زاڭدىلىعىن، ياعني ولارمەن جاسالعان ەڭبەك شارتتارىن باقىلاۋ ءۇشىن ەڭبەك ينسپەكتسياسى ءوزارا ءىس-قيمىل جۇيەسىن جولعا قويدى. ناتيجەسىندە 9 مىڭنان استام ەڭبەك شارتى جۇيەگە ەنگىزىلدى، - دەدى ەڭبەك ءمينيسترى.
سۇرانىسقا يە كاسىپتەر تىزبەسىنە شەتەلدىك جۇمىسشىلاردى قىزىقتىرۋ ءۇشىن 51 ماماندىق ەنگىزىلىپ، 566 جۇمىسشى تارتىلعان.
- بۇگىنگى كۇنى كوشى-قوننىڭ وڭ سالدوسى 3,8 مىڭ ادامدى قۇرادى. سولتۇستىك وڭىرلەرگە 2 مىڭنان استام قانداس پەن قونىس اۋدارۋشى كوشىرىلدى، بيىلعى 1-شىلدەدەگى جاعداي بويىنشا كەرى قايتۋ جاعدايلارى تىركەلگەن جوق، - دەدى س. جاقىپوۆا.
ايتا كەتەيىك، پلاتفورمالىق جۇمىسپەن قامتۋدى رەتتەۋ شەڭبەرىندە ياندەكس پلاتفورماسىندا جۇمىس ىستەيتىن 87 مىڭعا جۋىق ادامنىڭ قىزمەتى مەن الەۋمەتتىك قورعاۋ راسىمدەلدى. قازىر باسقا وپەراتورلارمەن بەلسەندى جۇمىس جۇرگىزىلۋدە.
