قازاقستان ۆيزاسىز ەلدەر ءتىزىمىن 82-گە دەيىن كەڭەيتتى

قازاقستاندىق پاسپورتتىڭ مارتەبەسىن ارتتىرۋ جۇمىسى بەلسەندى جۇرگىزىلىپ جاتىر. بۇل تۋرالى ق ر سىرتقى ىستەر مينيسترلىگىنىڭ رەسمي وكىلى ايبەك سمادياروۆ جىلدىڭ قورىتىندى بريفينگىندە باياندادى، دەپ حابارلايدى Kazinform.

ونىڭ ايتۋىنشا، 2023 -جىلى ۆيزاسىز ەلدەر ءتىزىمى ءتۇرلى ساناتتاعى پاسپورتتار بويىنشا 82 مەملەكەتكە دەيىن كەڭەيتىلدى، سونىڭ ىشىندە 29 مەملەكەت ۇلتتىق پاسپورتتار بويىنشا كەڭەيتىلدى.

پاسپورتتاردىڭ ءتۇرلى ساناتتارى بويىنشا 3 جاڭا ەلمەن ءوزارا ۆيزاسىز رەجيم تۋرالى كەلىسىمدەر جاسالدى، ولار: بانگلادەش (ديپلوماتيالىق جانە قىزمەتتىك پاسپورتتار بويىنشا)، سەيشەل ارالدارى جانە سان- مارينو (پاسپورتتاردىڭ بارلىق تۇرلەرى بويىنشا) .

«سونىمەن قاتار بيىل قىتاي جانە ۆەتناممەن ۇلتتىق پاسپورت يەلەرىنە ۆيزالىق تالاپتاردان بوساتۋ تۋرالى كەلىسىمدەرگە قول قويىلدى. وزدەرىڭىز بىلەتىندەي، ق ح ر- مەن ۆيزاسىز رەجيم كۇشىنە ەندى. ۆەتناممەن ۆيزاسىز رەجيم جاقىن ارادا تاراپتار بارلىق قاجەتتى مەملەكەتىشىلىك راسىمدەردى اياقتاعان سوڭ باستالادى»، - دەپ ءتۇسىندىردى ا. سمادياروۆ.

سونداي- اق قازاقستاندىق ازاماتتار ءۇشىن ەۋروپا وداعىمەن ۆيزالىق رەجيمىن جەڭىلدەتۋ ماسەلەلەرى بويىنشا رەسمي كونسۋلتاتسيالاردى باستاۋ تۋرالى ۋاعدالاستىققا قول جەتتى.

ق ر ازاماتتارى ءۇشىن ەۋروپالىق ۆيزا رەجيمىن جەڭىلدەتۋدىڭ ءبىرىنشى كەزەڭدەرى رەتىندە: ۆيزالىق الىمدى تومەندەتۋ؛ وتىنىمدەردى قاراۋ مەرزىمدەرىن قىسقارتۋ؛ كوپ مارتەلى ۆيزالاردىڭ قولدانىلۋ مەرزىمىن ۇزارتۋ ماسەلەسى قاراستىرىلىپ جاتىر.

اۆتور

ايجان سەرىكجان قىزى