قازاقستان يتالياعا نەگىزگى بيداي جەتكىزۋشى مەملەكەتتەردىڭ ءبىرى - پرەزيدەنت
ريم. KAZINFORM - مەملەكەت باسشىسى قاسىم-جومارت توقايەۆ يتالياعا رەسمي ساپارى اياسىندا Bonifiche Ferraresi كومپانياسىنىڭ باس اتقارۋشى ديرەكتورى فەدەريكو ۆەككونيدى قابىلدادى، دەپ ءمالىم ەتتى اقوردانىڭ باسپا ءسوز قىزمەتىنەن.
ق. توقايەۆ پەن ف. ۆەككوني قازاقستاننىڭ اگرارلىق سەكتورىنداعى ينۆەستيسيالىق جوبالاردى ىسكە اسىرۋ پەرسپەكتيۆالارىن تالقىلادى.
ق ر پرەزيدەنتى ەلىمىز بيداي ءوسىرۋ بويىنشا كوشباسشى ەلدەردىڭ قاتارىنا كىرەتىنىن اتاپ ءوتتى. ونىڭ ايتۋىنشا، قازاقستان يتالياعا نەگىزگى بيداي جەتكىزۋشى مەملەكەتتەردىڭ ءبىرى، سونداي-اق ەل ىشىندە استىق وڭدەۋ ۇلەسىن ارتتىرۋدى جوسپارلاپ وتىر.
ءوز كەزەگىندە فەدەريكو ۆەككوني كومپانيانىڭ قازاقستاندا يتاليالىق تەحنولوگيالاردى پايدالانا وتىرىپ، ءداندى داقىلداردى ءوسىرۋ جانە ءونىمدى ودان ءارى تەرەڭ وڭدەۋ جونىندەگى جوبالاردى ىسكە اسىرۋعا، سونداي-اق ماماندار دايارلاۋعا جانە تەحنولوگيا ترانسفەرتىنە قاتىستى جوسپارى تۋرالى ايتتى.
مەملەكەت باسشىسى ۇكىمەتتىڭ كومپانياعا جان- جاقتى كومەك كورسەتۋگە دايىن ەكەنىن جەتكىزدى.
سونىمەن قاتار يتاليالىق كومپانيا ينتەنسيۆتى باۋ-باقشا شارۋاشىلىعىن جانە تۇقىم شارۋاشىلىعىن دامىتۋ جونىندەگى بىرلەسكەن جوبالاردى ىسكە اسىرۋ مۇمكىندىگىن قاراستىرۋدى ۇسىندى.
