قازاقستان يۋنەسكو تىزىمىنە جاڭا مۇرا نىساندارىن ۇسىندى
استانا. KAZINFORM - ۇكىمەت يۋنەسكو جانە يسەسكو اياسىندا مادەني مۇرانى ساقتاۋ جانە ىلگەرىلەتۋدىڭ 2026-2028-جىلدارعا ارنالعان كەشەندى جوسپارىن بەكىتتى.
رۋنا جازۋلارى جانە اباي مۇراسى: قازاقستان يۋنەسكودا جاڭا نوميناتسيالاردى ناسيحاتتاۋدا
ونىڭ جەكە ءبولىمى «الەم جادى» باعدارلاماسى شەڭبەرىندەگى دەرەكتى مۇراعا ارنالعان. يۋنەسكو تىزىمىنە قانداي نىساندار ەنگىزىلگەنى جانە قازاقستاننان قانداي نوميناتسيالار جىبەرىلگەنى تۋرالى ۇلتتىق اكادەميالىق كىتاپحاناسىنىڭ ديرەكتورى كۇمىس سەيىتوۆا ايتىپ بەردى.
ونىڭ ايتۋىنشا، بۇگىنگى تاڭدا قازاقستان يۋنەسكونىڭ «الەم جادى» حالىقارالىق تىزىلىمىنە ءتورت دەرەكتى مۇرا ۇسىنىپ وتىر. ولاردىڭ قاتارىندا قوجا احمەت ياسساۋيگە، «نيەۆادا - سەمەي» حالىقارالىق انتيادرولىق قوزعالىسىنا قاتىستى ماتەريالدار مەن ارال تەڭىزىنە ارنالعان دەرەكتى مۇرا، سونداي-اق وتكەن جىلى تىزىمگە ەنگىزىلگەن «حاندار شەجىرەسى» بار.
ەندى قازىر قازاقستان حالىقارالىق تىزىلىمگە جاڭا نوميناتسيالار جولدادى. ولاردىڭ اراسىندا اباي قۇنانبايەۆتىڭ شىعارمالارىمەن بايلانىستى دەرەكتى مۇرا، سونداي-اق «قىز جىبەك» اتتى العاشقى قازاق وپەراسى بويىنشا ماتەريالدار بار.
سونىمەن قاتار، قازاقستان يۋنەسكونىڭ ورتالىق ازيا مەن ازيا-تىنىق مۇحيتى ءوڭىرى ەلدەرىنە ارنالعان وڭىرلىك تىزىلىمىنە دە قاتىسىپ جاتىر. وڭىرلىك تىزىمگە ەكى قۇجات - ەسىك قورعانىنان تابىلعان ەسىك توستاعانىنداعى رۋنا جازۋلارى مەن ءماشھۇر ءجۇسىپ شىعارمالارىنا بايلانىستى قۇجاتتار جىبەرىلدى.
سونداي-اق 2025-جىلى ۇلتتىق كوميتەت العاش رەت «الەم جادى» دەرەكتى مۇراسىنىڭ ۇلتتىق ءتىزىمىن جاساپ، بەكىتتى.
- بۇگىندە وعان 79 نىسان كىرەدى. الداعى ۋاقىتتا ءتىزىمدى 500 گە دەيىن كەڭەيتۋ جوسپاردا بار، ويتكەنى قازاقستاندا وسى تىزىمدە بولۋعا لايىقتى 6 مىڭعا جۋىق دەرەكتى مۇرا نىسانى بار، - دەپ اتاپ ءوتتى كۇمىس سەيىتوۆا.
ونىڭ ايتۋىنشا، الداعى ۋاقىتتا يۋنەسكوعا جاڭا نوميناتسيالار وسى ۇلتتىق تىزىمنەن الىنىپ ۇسىنىلاتىن بولادى. بۇل رەتتە، ۇيىمنىڭ قاعيدالارىنا سايكەس ءاربىر ەل حالىقارالىق جانە وڭىرلىك تىزىلىمدەرگە ەنگىزۋ ءۇشىن ەكى جىلدا ءبىر رەت ءبىر نىساننان عانا ءوتىنىش بەرە الادى.
وڭىرلىك تىزىمگە وتىنىمدەردى قاراۋ ناتيجەلەرى 2026-جىلدىڭ ءبىرىنشى جارتىجىلدىعىندا بەلگىلى بولادى، ال حالىقارالىق تىزىلىمگە وتىنىمدەر كەلەسى جىلى قارالادى.
ايتا كەتەلىك ەلدە مادەني مۇرانى ساقتاۋدىڭ 2026-2028-جىلدارعا ارنالعان كەشەندى جوسپارى بەكىتىلگەن ەدى.
