قازاقستان وزبەكستانعا اي سايىن 20-30 توننا شاي جەتكىزىپ وتىرماق
استانا. KAZINFORM - استانادا وتكەن قازاق-وزبەك بيزنەس فورۋمىندا 43,5 ميلليون دوللاردىڭ قۇجاتىنا قول قويىلدى. ءىس- شاراعا قوس تاراپتان 400-دەن استام ادام قاتىستى.
فورۋم اياسىندا قازاقستاندىق جانە وزبەكستاندىق كاسىپكەرلەر В2В فورماتىندا ەكىجاقتى كەزدەسۋلەر وتكىزىپ، اگروونەركاسىپتىك كەشەن، ساۋدا، جەڭىل جانە تاماق ونەركاسىبى، قۇرىلىس جانە تاعى باسقا سالالارداعى ىنتىماقتاستىق ماسەلەلەرىن تالقىلادى.
بيزنەس فورۋمى بارىسىندا ليفت يندۋسترياسى سالاسىنداعى ىنتىماقتاستىق تۋرالى مەموراندۋمعا قول قويىلدى.
قازاقستاننىڭ ليفتەر ۇلتتىق قاۋىمداستىعىنىڭ پرەزيدەنتى ەرجان يگىبايەۆ وزبەك ارىپتەستەرىمەن بىرلەسكەن كاسىپورىن اشۋعا كەلىستىك دەيدى.
«فورۋم اياسىندا ليفت ءوندىرىسى بويىنشا بىرلەسكەن قازاق- وزبەك كاسىپورنىن قۇرۋدى قامتيتىن ىنتىماقتاستىق تۋرالى مەموراندۋمعا قول قويدىق. سونداي-اق، قازاقستاننىڭ ليفت پاركىن دياگنوستيكالاۋ ءۇشىن ديسپەتچەرلىك ورتالىق قۇرۋعا جانە ليفت سالاسىنداعى قىزمەتتەردىڭ ساپاسىن ارتتىراتىن ءبىرىڭعاي ستاندارتتار مەن تەحنيكالىق رەگلامەنت ازىرلەۋگە كەلىستىك»، - دەيدى ول.
وزبەكستاندىق كاسىپكەر، «تەحنوپارك» ج ش ق باس ديرەكتورى سارۆار احادوۆ ليفت شىعارۋ سالاسىندا تاجىريبە الماسۋعا دايىن ەكەنىن ايتتى.
«ەۋروپالىق ستاندارتپەن ليفت پەن ديسپەتچەرلىك جۇيە ءوندىرۋ سالاسىنداعى تاجىريبە الماسۋعا قۋانىشتىمىز. جاقىن ارادا ءوندىرىستى باستاۋ ءۇشىن كولەمى مەن اۋماعىن انىقتايمىز. بۇگىن ءبىز گازدى اۆتوماتتاندىرىلعان ەسەپكە الۋ جۇيەسىن ەنگىزۋ جانە قازاقستاندا ليفت ءوندىرۋ تۋرالى ەكى كەلىسىمگە قول قويدىق. 18-ايدا اتالعان جوبالاردى جۇزەگە اسىرۋ جوسپارلانىپ وتىر»، - دەيدى سارۆار احادوۆ.
سونداي-اق، كورشى ەلدى شايمەن قامتۋ كوزدەلىپ وتىر.
قازاقستاندىق Unitea شاي فابريكاسى وزبەكستاننىڭ ەڭ ءىرى ساۋدا جەلىسى «كورزينكا» كومپانياسىمەن اي سايىن 20-30 توننا شاي جەتكىزۋ تۋرالى مەموراندۋمعا قول قويدى.
بۇگىندە كومپانيا رەسەي، قىتاي جانە قىرعىزستاندى قوسا العاندا، سىرتقى نارىقتا ءوز كاسىبىن جۇرگىزىپ وتىر.
2023 -جىلدىڭ قورىتىندىسى بويىنشا ەكى ەل اراسىنداعى تاۋار اينالىمى 4,4 ميلليارد ا ق ش دوللارىنا جەتتى.
وزبەكستان قازاقستاننىڭ ەڭ ءىرى ساۋدا سەرىكتەستەرىنىڭ ءبىرى بولىپ قالا بەرەدى.
2023 -جىلدىڭ قورىتىندىسى بويىنشا 7- ورىندا جانە قازاقستاننىڭ ورتالىق ازيامەن تاۋار اينالىمىنىڭ %57- دان استامى وسى ەلگە تيەسىلى.
اۆتور
جانات قاپالبايەۆا
