قازاقستان-وزبەكستان مەملەكەتتىك شەكاراسىن شەگەندەۋ تۋرالى شارت ب ۇ ۇ حاتشىلىعىنا تىركەۋ ءۇشىن تابىستالدى
نيۋ-يورك. KAZINFORM - ب ۇ ۇ باس اسسامبلەياسىنىڭ 79-سەسسياسىنىڭ جوعارى دەڭگەي اپتالىعى قارساڭىندا ۇيىم جارعىسىنىڭ 102-بابىنا سايكەس قازاقستان رەسپۋبليكاسى مەن وزبەكستان رەسپۋبليكاسى اراسىنداعى قازاقستان-وزبەكستان مەملەكەتتىك شەكاراسىن شەگەندەۋ تۋرالى شارتتى ب ۇ ۇ حاتشىلىعىندا تىركەۋ جانە جاريالاۋ ءۇشىن قاجەتتى قۇجاتتار وتكىزىلدى.
بۇل تۋرالى ق ر سىرتقى ىستەر مينيسترلىگىنىڭ باسپا ءسوز قىزمەتى ءمالىم ەتتى.
«شارتقا قازاقستان رەسپۋبليكاسىنىڭ پرەزيدەنتى قاسىم-جومارت توقايەۆ پەن وزبەكستان رەسپۋبليكاسىنىڭ پرەزيدەنتى شاۆكات ميرزيەيەۆ 2022 -جىلعى 22 -جەلتوقساندا قازاقستان باسشىسىنىڭ تاشكەنتكە مەملەكەتتىك ساپارى بارىسىندا قول قويىپ، ول 2023 -جىلعى 4-شىلدەدە كۇشىنە ەندى»، - دەلىنگەن اقپاراتتا.
بۇل قۇجات قازاقستان-وزبەكستان مەملەكەتتىك شەكاراسىن حالىقارالىق-قۇقىقتىق رەسىمدەۋ بويىنشا كوپ جىلدىق بىرلەسكەن جۇمىستىڭ ناتيجەسى بولدى.
اعىمداعى جىلدىڭ 25-قىركۇيەگىندە نيۋ-يوركتە ب ۇ ۇ باس اسسامبلەياسى سەسسياسىنىڭ الاڭىندا وتكەن كەزدەسۋ بارىسىندا قازاقستان مەن وزبەكستاننىڭ سىرتقى ساياسي ۆەدومستۆولارىنىڭ باسشىلارى مەملەكەتتىك شەكارانى شەگەندەۋ تۋرالى شارتتى ب ۇ ۇ حاتشىلىعىندا تىركەۋ ورتالىق ازيا ءوڭىرى ەلدەرى ءۇشىن مۇنداي قۇجاتتارعا قاتىستى تەڭدەسسىز تاجىريبە بولىپ تابىلاتىنىن اتاپ ءوتتى.
قۇجاتتىڭ تاريحي ماڭىزدىلىعىنا نازار اۋدارىلىپ، بۇل قادام ەكى ەلدىڭ تاتۋ كورشىلىك پەن ماڭگىلىك دوستىق قاعيداتتارىنا، وداقتاستىق قاتىناستار رۋحىنا، ورتاق وركەندەۋ يگىلىگى ءۇشىن ءوزارا ءتيىمدى ىنتىماقتاستىققا بەيىلدىگىنىڭ كەزەكتى راستاۋى ەكەنىن، سونداي-اق ورتالىق ازياداعى قاۋىپسىزدىك پەن تۇراقتىلىقتى ودان ءارى نىعايتۋعا ىقپال ەتەتىنى اتالىپ ءوتتى.
