قازاقستان، وزبەكستان جانە ازەربايجان بىرلەسىپ، كاسپي تۇبىمەن كابەل تارتادى

تاشكەنت. KAZINFORM -  تاشكەنت قالاسىندا قازاقستان، وزبەكستان جانە ازەربايجاننىڭ ەنەرگەتيكا مينيسترلەرى كاسپي تەڭىزىنىڭ استىمەن ەلەكتر كابەلىن تارتۋ جوباسىن ىسكە اسىرۋ مەموراندۋمىنا قول قويدى، دەپ حابارلايدى Kazinform اگەنتتىگىنىڭ تاشكەنتتەگى مەنشىكتى ءتىلشىسى ءاليحان اسقار.

قۇجاتقا ساي، اتالعان ءۇش مەملەكەت كۇن، جەل جانە سۋ ەلەكتر ستانسياسى سياقتى ەكولوگيالىق تازا كوزدەردەن وندىرىلگەن ەلەكتر ەنەرگياسىن وزگە ەلدەرگە ەكسپورتتايدى. ول ءۇشىن الدىمەن كاسپي تەڭىزىنىڭ استىمەن جوعارى ۆولتتى كابەل تارتۋ جوسپارلانىپ وتىر.

بۇل رەتتە ق ر ەنەرگەتيكا ءمينيسترى الماسادام ساتقاليەۆ بۇعان دەيىن كاسپي تۇبىمەن كابەل وتكىزۋ جوباسىن ىسكە اسىرۋ ماقساتىندا تەحنيكالىق تاپسىرما ازىرلەنگەنىن اتاپ ءوتتى.

«تەحنيكالىق تاپسىرما شەڭبەرىندە حالىقارالىق ترانسميسسيالىق دالىزدەردى دامىتۋ جانە ەۋرووداق ەلدەرىنە جاسىل ەنەرگيانى ساتۋ ءۇشىن جوبالىق بيزنەس-مودەل ازىرلەنەتىن بولادى. جوعارىدا ايتىلعانداردىڭ نەگىزىندە ءۇش ەلدىڭ ەنەرگەتيكا مينيسترلىكتەرى وزدەرىنىڭ ەنەرگەتيكالىق جۇيەسىن ءبىر-بىرىمەن بايلانىستىرۋ جونىندەگى ىنتىماقتاستىق مەموراندۋمىنا قول قويدى»، - دەدى الماسادام ساتقاليەۆ.

ۆەدومستۆو باسشىسىنىڭ اقپاراتىنا سايكەس، قازىرگى ۋاقىتتا اتالعان جوبانى ىسكە اسىرۋ بويىنشا بازالىق مەحانيزمدەر تالقىلانىپ، بارلىق تاراپتارمەن كەلىسىلدى.

اۆتور
ءاليحان اسقار