قازاقستان وڭىرلەرىندە اكۆاپارككە كىرۋ بيلەتىنىڭ قۇنى قانشا
استانا. KAZINFORM - قازاقستاننىڭ كەيبىر وڭىرىندە اكۆاپارك جوق. ال اكۆاپاركى بار وڭىرلەردە كىرۋ قۇنى 1700 تەڭگەدەن باستالىپ، 16000 تەڭگەگە دەيىن جەتەدى دەپ حابارلايدى Kazinform ءتىلشىسى.
قىزمەت ءتۇرى مەن قولجەتىمدىلىگى
قازاقستاننىڭ كەيبىر قالاسىندا اكۆاپارك جوق. بولعان كۇننىڭ وزىندە كوبىندە جالعىز عانا سۋعا ءتۇسۋ ورنى قاراستىرىلعان. قازىرگى كەزدە ورال، جەزقازعان، كوكشەتاۋ، قوستاناي مەن پاۆلوداردان اكۆاپارك تاپپايسىز. سوڭعى ەكى قالادا قۇرىلىس جۇمىستارى ءجۇرىپ جاتىر.
ال اكۆاپاركى بار قالالاردا قىزمەت ءتۇرى ءارقيلى. كەيبىر اكۆاپاركتە كۇنى بويى تىنىعۋعا مۇمكىندىك بولسا، ەكىنشى ءبىرى ۋاقىتتى شەكتەپ، 3-4 ساعات دەپ تالاپ قويادى. سونىمەن بىرگە اياق كيىم مەن سۇلگىنى جالعا الۋعا بولادى. اكۆاپاركتەگى سىرعاناقتىڭ ءتۇرى، ساۋنا دا باعاعا اسەر ەتەدى. كەيبىر وڭىردە كوپبالالى وتباسىنا، مۇگەدەكتىگى بار ادامدارعا جەڭىلدىك بار. ەرەجە بويىنشا 3 نەمەسە 4 جاسقا تولماعان بالالارعا كىرۋ تەگىن. ال وسكەمەن 6 ايلىققا دەيىنگى بالالار عانا تەگىن كىرە الادى. وزگەلەرگە كىرۋ اقىلى. التى ايلىق سابيدەن باستاپ 1 جاستاعى بالالارعا كىرۋ بيلەتىنىڭ تەڭ جارتىسىن تولەيدى. سونىمەن بىرگە جۇمىس كۇندەرى كىرۋ قۇنى ارزان بولسا، دەمالىس كۇندەرى كەيبىر اكۆاپاركتەر باعاسىن كوتەرەدى.
قاي وڭىردە قىمبات؟
ەڭ ارزانى قىزىلوردا قالاسىندا. مۇندا جۇمىس كۇندەرى ءبىر بالاعا كىرۋ بيلەتىنىڭ قۇنى 1700 تەڭگە. دەمالىس كۇندەرى باعا كوتەرىلەدى. ەرەسەكتەرگە كىرۋ قۇنى - 6000 تەڭگە. جالپى ەلىمىزدە ەرەسەكتەرگە ارنالعان بيلەت بالالارعا قاراعاندا 1000-2000 تەڭگەگە جوعارى.
كىرۋ بيلەتىنىڭ قۇنى ارزان وڭىرلەر ءتىزىمى بويىنشا ەكىنشى ورىندا تۇركىستان، تالدىقورعان مەن سەمەي تۇر. مۇندا بالالارعا ارنالعان بيلەت باعاسى 2000 تەڭگەدەن باستالادى. وسى قالالاردىڭ ىشىندە باعا تۇركىستاندا جوعارى. مۇندا بيلەت قۇنى - 4000 تەڭگە. ال سەمەيدە اكۆاپارككە كىرۋ كەزىندە بالا مەن ەرەسەك دەپ بولمەي، بارىنە ءبىر تاريف ۇسىنىلادى. تەك دەمالىس كۇندەرى بيلەت باعاسى ادەتتەگىدەن 2500 تەڭگەگە قىمبات بولىپ كەلەدى. ال تالدىقورعاندا بۇل اقشاعا ۇرمەلى اكۆاپارك قىزمەتىن پايدالانۋعا بولادى. مۇندا دا سىرعاناق، باسسەين بار. تەك ءبارى اشىق اسپان استىندا نەمەسە ۇرمەلى اكۆاپارك ىشىندە.
رەيتينگ بويىنشا كەلەسى كەزەكتە شىمكەنت قالاسى تۇر. مۇندا باعا 2500-6000 تەڭگە ارالىعىندا. قالا ۇلكەن، سوعان سايكەس بىرنەشە اكۆاپارك جۇمىس ىستەيدى. ال باعا بىركەلكى.
اتىراۋدا باعا 3000-12000 تەڭگە ارالىعىندا. مۇندا دەمالىسقا ارنالعان ەكى ورىن بار. بىرىندە باعا 6000 تەڭگەگە دەيىن بارادى. ودان ءارى قاراعاندى قالاسى جايعاستى. مۇندا باعا 3500-5500 تەڭگە ارالىعىندا. تاراز قالاسىن دا ءبىر جابىق، ءبىر اشىق اكۆاپارك بار. بيلەت قۇنى 3600 - 5200 تەڭگە ارالىعىندا.
اقتاۋدا اكۆاپارككە كىرۋ قۇنى بالالارعا 4000 تەڭگەدەن باستالادى. ەرەسەكتەر ءۇشىن 8000 تەڭگە بولىپ تۇر. شىلدە ايىنداعى باعاسى وسى. ال ماۋسىمدا كىرۋ قۇنى ارزان بولدى.
اقتوبە، پەتروپاۆلدا اكۆاپارككە كىرۋ قۇنى 5000 تەڭگەدەن باستالادى. وسى تىزىمگە بۋرابايدى دا قوسۋعا بولادى. مۇندا كوكشەتاۋلىقتار بارادى. كۋرورتتىق ايماقتا باعا 10000 تەڭگەگە دەيىن جەتەدى.
وسكەمەندە 5500 تەڭگە تولەپ، كۇنى بويى سۋلى سىرعاناقتا سىرعاناۋعا بولادى. مۇندا دا كىرۋ بيلەتىنىڭ قۇنى بالا مەن ەرەسەكتەرگە دەپ بولىنبەيدى. ال دەمالىس كۇندەرى باعا 8000 تەڭگە بولىپ تۇر.
الماتىدا اكۆاپارك كوپ. سوعان قاراماستان بۇل باعاعا ەش اسەر ەتپەي تۇر. ەڭ ارزان بيلەت قۇنى بالالارعا 6000 تەڭگەدەن باستالادى. ال ەڭ قىمباتى ەرەسەكتەر ءۇشىن 16000 تەڭگە.
قازاقستان بويىنشا استانادا اكۆاپارك قىزمەتى قىمبات. استانادا 4 ساعاتتىق قىزمەت بالالارعا 6600 تەڭگە بولسا، ەرەسەكتەرگە 12 200 تەڭگە. كۇنى بويى اكۆاپاركتە جۇرگىڭىز كەلسە، 14 جاسقا تولماعان بالالارعا 8600-9000 تەڭگە، ال وزگەلەرگە 14000-15200 تەڭگە تولەۋگە تۋرا كەلەدى.
ايتىپ وتەيىك، بۇعان دەيىن بالالار لاگەرىنە جولداما قۇنى تۋرالى جازىلدى.
