قازاقستان پوليتسياسى كۇشەيتىلگەن رەجيمگە كوشتى

استانا. قازاقپارات - ىشكى ىستەر مينيسترلىگى مەرەكەلىك ءىس-شارالار كەزىندە قوعامدىق قاۋىپسىزدىكتى قامتاماسىز ەتۋ ءۇشىن بارلىق قاجەتتى شارالاردى قابىلداپ جاتىر. 

14-جەلتوقساننان باستاپ ادام كوپ جينالاتىن جەرلەردە پاترۋلدىك پوليتسيا سانى ارتادى. تاۋەلسىزدىك كۇنىنە دايىندىق اياسىندا 14-جەلتوقساننان باستاپ قازاقستاننىڭ ىشكى ىستەر ورگاندارىنىڭ بارلىق جەكە قۇرامى كۇشەيتىلگەن قىزمەت كورسەتۋ رەجيمىنە كوشتى، دەپ حابارلادى Polisia.kz.
«تاۋەلسىزدىك كۇنىن مەرەكەلەۋ قارساڭىندا پوليتسيا قىزمەتكەرلەرى قوعامدىق ءتارتىپتى، ازاماتتاردىڭ تىنىشتىعى مەن قاۋىپسىزدىگىن قامتاماسىز ەتۋ جۇمىستارىن كۇشەيتتى. قوسىمشا شارالار رەتىندە ادام كوپ جينالاتىن ورىنداردا، مەرەكەلىك ءىس-شارالار وتەتىن الاڭداردا جانە مەملەكەتتىك قورعاۋعا الىنعان نىسانداردا پاترۋلدەر سانى ارتتى»، - دەلىنگەن حابارلامادا.

سونىمەن قاتار جەدەل باسقارۋ ورتالىقتارىندا بەينەباقىلاۋ جۇيەلەرى ارقىلى مونيتورينگ كۇشەيتىلىپ جاتىر. بۇل شارالار ىقتيمال قۇقىق بۇزۋشىلىقتاردىڭ الدىن الۋعا جانە قوعامدىق قاۋىپسىزدىك دەڭگەيىن ارتتىرۋعا باعىتتالعان.

«ىشكى ىستەر مينيسترلىگى مەرەكەلىك ءىس- شارالار كەزىندە قوعامدىق قاۋىپسىزدىكتى قامتاماسىز ەتۋ ءۇشىن بارلىق قاجەتتى شارالاردى قابىلداپ جاتىر»، - دەلىنگەن ۆەدومستۆونىڭ حابارلاماسىندا.